ເສີມຂະຫຍາຍປະສິດທິຜົນແນວພັນໝາກລຳໄຍໃນການກໍ່ສ້າງ ຊົນນະບົດໃຫມ່ຢູ່ ຮືງອຽນ

(vovworld)- ແຕ່ດົນນານມາແລ້ວ, ຮືງອຽນ ແມ່ນທ້ອງຖິ່ນທີ່ມີຊື່ສຽງດ້ວຍ ໝາກລຳໄຍທີ່ແຊບນົວ

(vovworld)- ແຕ່ດົນນານມາແລ້ວ, ຮືງອຽນ ແມ່ນທ້ອງຖິ່ນທີ່ມີຊື່ສຽງດ້ວຍ ໝາກລຳໄຍທີ່ແຊບນົວ, ຊື່ງແມ່ນປະເພດໝາກໄມ້ເຄີຍຖະຫວາຍໃຫ້ເຈົ້າຊີວິດ. ເຖິງຢ່າງໃດກໍຕາມ ເພື່ອຮັກສາແນວພັນໝາກລຳໄຍອັນລຳ້ຄ່າ ຮັບປະກັນຄຸນນະພາບໃຫ້ສະມັດຕະພາບສູງ ບໍ່ແມ່ນເລື່ອງງ່າຍ. ໃນເກືອບ 10 ປີຜ່ານມາ, ບັນດາຕົ້ນໝາກລຳໄຍຂອງຄອບຄົວລຸງ ຫງວຽນວັນແກງ ຢູ່ ບ້ານ ກີມດັງ ຕາແສງ ລາມເຊີນ ນະຄອນ ຮືງອຽນ ລ້ວນແຕ່ໃຫ້ໝາກເປັນປະຈຳ, ນຳມາເຊິ່ງລາຍຮັບສູງ, ສະແດງໃຫ້ເຫັນຄວາມມານະພະຍາຍາມຂອງປະຊາຊົນສ້າງຄວາມຮັ່ງມີຈາກຕົ້ນລຳໄຍ.

ໝາກລຳໄຍຢູ່ ຮືງອຽນ
ພາບ:sachtuoingon.vn

ເມື່ອມາຢ້ຽມຢາມຮືງອຽນໃນຕົ້ນເດືອນ 7, ໄປຮອດບ່ອນໃດກໍເຫັນວ່າຕົ້ນລຳໄຍໃຫ້ໝາກດົກ ແລະ ປະຊາຊົນຢູ່ທີ່ນີ້ພວມກະກຽມເກັບກູ້. ເມື່ອຖືກຖາມກ່ຽວກັບໝາກໄລຍຳຂອງເຂດນີ້, ຊາວ ຮືງອຽນ ຜູ້ໃດກໍມີຄວາມເອກອ້າງທະນົງໃຈ. ຍ້ອນການປ່ຽນແປງຂອງດິນຟ້າອາກາດ, ໝາກລຳໄຍຢູ່ບາງແຫ່ງບໍ່ຄ່ອຍດີ, ພຽງແຕ່ຄອບຄົວໃດມີເຕັກນິກໃນການປູກຝັງ ໝາກລຳໄຍຂອງຄອບຄົວນັ້ນຈຶ່ງຮັບປະກັນຄຸນນະພາບ ແລະ ໃຫ້ສະມັດຕະພາບສູງ. ຄອບຄົວຂອງລຸງ ຫງວຽນວັນແກງ, ຢູ່ບ້ານ ກີມດັງ, ຕາແສງ ລາມເຊີນ ນະຄອນ ຮືງອຽນ ແມ່ນຄອບຄົວຄືແນວນັ້ນ. ລຸງຫງວຽນວັນແກງ ໃຫ້ຮູ້ວ່າ: ປູກຕົ້ນລຳໄຍ ຕ້ອງອົດທົນ ໄລຍະ 5 ປີທຳອິດ ຕົ້ນລຳໄຍບໍ່ໃຫ້ໝາກ. ສະນັ້ນ ລຸງຕ້ອງຊອກຮູ້, ຄົ້ນຄ້ວາ, ໝູນໃຊ້ບັນດາຄວາມຮູ້ໃຫມ່ ເພື່ອຊອກຫາວິທີປູກຕົ້ນລຳໄຍຕາມວິທີຂອງຕົນກໍຄືຕອບສະຫນອງຄວາມຕ້ອງການບໍລິໂພກຂອງປະຊາຊົນ. ເມື່ອແບ່ງປັນບົດຮຽນໃນການບົວລະບັດແນວພັນລຳໄຍຂອງຕົນ, ລຸງ ແກງ ໃຫ້ຮູ້ວ່າ: ເພື່ອໃຫ້ຕົ້ນລຳໄຍໃຫ້ສະມັດຕະພາບສູງຕ້ອງມີການສົມທົບລະຫວ່າງ ບົດຮຽນໃນເມື່ອກ່ອນ ແລະ ເຕັກນິກບົວລະບັດທັນສະໄຫມ ໃຫ້ເໝາະສົມ. ເມື່ອເຫັນວ່າ ອາກາດຮ້າຍແຮງ ຕ້ອງຕິດຕາມຢ່າງລະອຽດ ແລະ ຕ້ອງມີເຕັກນິກບົວລະບັດຕາມລະດູ, ພິເສດ ລຸງສາມາດດັດປັບເພື່ອໃຫ້ລະດູເກັບກູ້ແກ່ຍາວຕື່ມອີກ 4 ເດືອນ. ເມື່ອຕີລາຄາກ່ຽວກັບບົດຮຽນປູກຕົ້ນລຳໄຍຂອງລຸງ ແກງ, ທ່ານ ຫງວຽນວັນເທ ຢູ່ຕາແສງ ເຢີນຕຽນ ເມືອງ ຄວາຍເຈົາ ຊື່ງແມ່ນຜູ້ປູກຕົ້ນລຳໄຍມາແຕ່ດົນນານແລ້ວ ໃຫ້ຮູ້ວ່າ:

“ອ້າຍແກງ ແມ່ນຜູ້ມີຄວາມປະສົບການໃນການປູກຕົ້ນລຳໄຍ, ມີເຕັກນີກດີ. ຫລາຍປີມານີ້ ຮູບແບບຂອງຄອບຄົວອ້າຍແກງ ໄດ້ສ້າງລາຍຮັບສູງໃຫ້ແກ່ຄອບຄົວ. ນີ້ແມ່ນຮູບແບບໃຫມ່, ນຳມາເຊິ່ງປະສິດທິຜົນ ແລະ ມີຫລາຍຄົນມາຮຽນຕາມ. ອ້າຍແກງ ແມ່ນຜູ້ມີຫົວຄິດປະດິດສ້າງ ສະນັ້ນຕົ້ນລຳໄຍຂອງຄອບຄົວອ້າຍໃຫ້ສະມັດຕະພາບສູງ.”

ປູກຕົ້ນລຳໄຍມາເປັນເວລາເກືອບ 20 ປີ, ປະຈຸບັນ ຄອບຄົວອ້າຍ ຫງວຽນວັນແກງ ມີ ເນື້ອທີ່ຕົ້ນລຳໄຍ ປະມານ 2 ເຮັກຕາ. ໃນນັ້ນ 1 ເຮັກຕາ ມີສະມັດຕະພາບປີນີ້ສູງກວ່າປີກອ່ນ. ພິເສດ ປີ 2014 ນີ້, ຕົ້ນລຳໄຍ ເກືອບ 300 ຕົ້ນຂອງຄອບຄົວລຸງ ຫງວຽນວັນແກງ ຈະໃຫ້ໝາກເກືອບ 20 ໂຕນ ແລະ ສ້າງລາຍຮັບມາໄດ້ກວ່າ 500 ລ້ານດົງ. ໃນລະດູເກັບກູ້, ລຸງ ຫງວຽນວັນແກງ ໄດ້ສ້າງວຽກເຮັດງານທຳໃຫ້ແກ່ຄົນງານນັບສິບຄົນ, ນຳລາຍຮັບມາໃຫ້ເຂົາເຈົ້າ ແຕ່ 150.000-200.000/ມື້. ຮູບແບບປູກຕົ້ນລຳໄຍຂອງຄອບຄົວລຸງ ຫງວຽນວັນແກງ ຍັງແມ່ນຮູບແບບທົດລອງ ຊື່ງບັນດາສະມາຊິກໃນສະມາຄົມຊາວກະສິກອນທັງຢູ່ພາຍໃນ ແລະ ນອກແຂວງ ມາຮຳ່ຮຽນຕາມ. ທ່ານ ຫງວຽນຕວນຫວຽດ, ສະມາຊິກສະມາຄົມຊາວກະສິກອນ ແຂວງ ຮືງອຽນ ໃຫ້ຮູ້ວ່າ:

“ຄອບຄົວອ້າຍ ຫງວຽນວັນແກງ ແມ່ນຫນຶ່ງໃນບັນດາຄອບຄົວຊາວກະສິກອນຜະລິດ, ດຳເນີນທຸລະກິດເກັ່ງຂອງແຂວງ ຮືງອຽນ. ອ້າຍ ຫງວຽນວັນແກງ ຕັ້ງຫນ້າເຂົ້າຮ່ວມການອະນຸລັກຮັກສາແນວພັນລຳໄຍອັນລຳ້ຄ່າຂອງແຂວງ ພ້ອມທັງຊ່ວຍເຫລືອບັນດາຄອບຄົວຊາວກະສິກອນໃນແຂວງ ປູກຕົ້ນລຳໄຍໃຫ້ສະມັດຕະພາບສູງ. ຈາກຄອບຄົວຫນຶ່ງທີ່ທຸກຍາກ ພາຍຫລັງຫລາຍປີແຫ່ງການຜະລິດດຳເນີນທຸລະກິດ, ຄອບຄົວອ້າຍ ຫງວຽນວັນແກງ ບືນຕົວຂຶ້ນກາຍເປັນຄອບຄົວຮ່ັງມີ, ເຂົ້າຮ່ວມການເຄື່ອນໄຫວຕ່າງໆຂອງທ້ອງຖິ່ນ.”

ນາງງາມ ຫລີຍາກີ ຢ້ຽມຢາມ ຮືງອຽນ
ພາບ:giaitri.vn

ດ້ວຍຄວາມມານະພະຍາຍາມໃນການໝູນໃຊ້ວິທະຍາສາດເຕັກນີກເຂົ້າໃນການປູກຕົ້ນລຳໄຍ, ລຸງ ຫງວຽນວັນແກງ ກາຍເປັນຊາວກະສິກອນຜະລິດເກັ່ງຂອງແຂວງ ຮືງອຽນ ແລະ ໄດ້ຮັບຫລາຍລາງວັນ. ແຕ່ສຳລັບລຸງແລ້ວ, ຄວາມເບິກບານມ່ວນຊື່ນໃຫຍ່ສຸດ ນັ້ນແມ່ນ ສວນຕົ້ນລຳໄຍຂອງລຸງ ເຖິງວ່າຖືກຜົນສະທ້ອນຈາກອາກາດຮ້າຍແຮງແນວໃດກໍຕາມ ແຕ່ຍາມໃດກໍນຳມາເຊິ່ງລາຍຮັບສູງໃຫ້ແກ່ຄອບຄົວ, ປະກອບສ່ວນພັດທະນາເສດຖະກິດຂອງທ້ອງຖິ່ນ, ຄ່ອຍໆສຳເລັດມາດຖານກໍ່ສ້າງຊົນນະບົດໃຫມ່. ບັນດາບົດຮຽນຂອງລຸງ ຫງວຽນວັນແກງໃນການປູກຕົ້ນລຳໄຍພວມ ໄດ້ຮັບການທະວີຄູນຈາກສະມາຄົມຊາວກະສິກອນແຂວງ ຮືງອຽນ ເພື່ອນຳມາເຊິ່ງລາຍຮັບສູງ ໃຫ້ຊາວກະສິກອນຢູ່ ຮືງອຽນ ນັບພັນໆຄອບຄົວ.