Vietnamese
中文
日本語
한국어
Français
Русский
Deutsch
Español
Bahasa Indonesia
ไทย
ພາສາລາວ
ខ្មែរ
(vovworld) – ພ້ອມກັບໜ້າທີ່ອົບຮົມເຝິກແອບ, ກຽມພ້ອມສູ້ຮົບ, ປົກປັກຮັກສາອະທິປະໄຕເຂດຊາຍແດນຢ່າງໝັ້ນຄົງນັ້ນ. ດ້ວຍຄວາມຮັບຜິດຊອບ ແລະ ອາລົມຈິດອັນສະໜິດສະໜົມຂອງຕົນ, ພະນັກງານ, ນັກຮົບປ້ອງກັນຊາຍແດນແຂວງນາມດິ້ງ ພວມເຂົ້າຮ່ວມຂະບວນການ “ທົ່ວປະເທດຮ່ວມແຮງຮ່ວມໃຈກໍ່ສ້າງຊົນນະບົດໃໝ່“ ຢ່າງຕັ້ງໜ້າ ແລະ ມີປະສິດທິຜົນ.
ທະຫານຊ່ວຍເຫຼືອປະຊາຊົນເກັບກ່ຽວເຂົ້າ
(ພາບ: ອິນເຕີແນດ)
ພວກຂ້າພະເຈົ້າໄປຍັງເມືອງຢາວຖູຍ, ແຂວງນາມດິ້ງ, ໃນຂະນະທີ່ປ້ອມປ້ອງກັນຊາຍແດນ ບາຫຼາດ ພວມພ້ອມກັບປະຊາຊົນໃນເມືອງກໍ່ສ້າງທາງຄົມມະນາຄົມ, ບຸລະນະຄອງເໝືອງ. ພົນທະຫານຊັ້ນໜຶ່ງ ຫງວຽນຮືວວັນ, ປ້ອມປ້ອງກັນຊາຍແດນ ບາຫຼາດ, ໃຫ້ຮູ້ວ່າ ເຂົ້າຮ່ວມການກໍ່ສ້າງຊົນນະບົດໃໝ່ພ້ອມກັບພໍ່ແມ່ປະຊາຊົນນັ້ນ ແມ່ນໜ້າທີ່ ແລະ ຄວາມຮັບຜິດຊອບຂອງອ້າຍ ແລະ ເພື່ອນຮ່ວມກົມກອງ. ຕາມອ້າຍແລ້ວ, ທະຫານບໍ່ພຽງແຕ່ແມ່ນກຳລັງສູ້ຮົບເທົ່ານັ້ນ, ຫາກຍັງແມ່ນກຳລັງປະຕິບັດວຽກງານ, ກຽມພ້ອມຊ່ວຍເຫຼືອປະຊາຊົນໃນວຽກງານຕ່າງໆອີກດ້ວຍ, ພິເສດແມ່ນບັນດາວຽກງານທີ່ມີຄວາມໝາຍຄື: “ໂຄງການກໍ່ສ້າງຊົນນະບົດໃໝ່“ ພົນທະຫານຊັ້ນໜຶ່ງ ຫງວຽນຮືວວັນ, ແບ່ງປັນວ່າ:
“ນອກຈາກໜ້າທີ່ຕົ້ນຕໍ່ແມ່ນສູ້ຮົບແລ້ວ, ພວກຂ້າພະເຈົ້າຍັງປະກອບສ່ວນ ຊ່ວຍເຫຼືອປະຊາຊົນທຳການຜະລິດ ເພື່ອຮັກສາຊີວິດຂອງປະຊາຊົນໃນທ້ອງຖີ່ນໃຫ້ເປັນປົກກະຕິ. ພວກຂ້າພະເຈົ້າຮູ້ສຶກເອກອ້າງທະນົງໃຈທີ່ໄດ້ມີການພົວພັນຢ່າງແໜ້ນແຟ້ນກັບປະຊາຊົນ ແລະ ພ້ອມກັບປະຊາຊົນຮ່ວມແຮງຮ່ວມໃຈກໍ່ສ້າງຊົນນະບົດໃໝ່, ພັດທະນາເສດຖະກິດ - ສັງຄົມໃນທ້ອງຖີ່ນ“.
ທະຫານແນະນຳໃຫ້ປະຊາຊົນວິທີປູກຝັງທີ່ມີປະສິດທິຜົນ
(ພາບ: ອິນເຕີແນດ)ເພື່ອເຮັດໃຫ້ວຽກງານສົມທົບກັນ, ຊ່ວຍເຫຼືອປະຊາຊົນມີປະສິດທິຜົນ, ຄະນະບັນຊາການປ້ອມປ້ອງກັນຊາຍແດນບາຫຼາດ ໄດ້ພ້ອມກັບຄະນະກຳມະການປະຊາຊົນ 4 ຕາແສງໃນບໍລິເວນຕັ້ງທັບຄື: ຢາວອານ, ຢາວຊວນ, ຢາວຫຼາກ, ຢາວທ້ຽນ, ດຳເນີນການສຳຫຼວດກ່ຽວກັບການປະຕິບັດ 19 ມາດຖານກໍ່ສ້າງຊົນນະບົດໃໝ່. ໃນນັ້ນມາດຖານຮັບປະກັນຄວາມສະຫົງບປອດໄພ, ຄວາມເປັນລະບຽບຮຽບຮ້ອຍທາງສັງຄົມ, ການກໍ່ສ້າງບັນດາກິດຈະກຳຊົນລະປະທານ - ຂູດຄອງເໝືອງ ລ້ວນແຕ່ໄດ້ຮັບການຊ່ວຍເຫຼືອຢ່າງມີປະສິດທິຜົນຈາກພະນັກງານ, ນັກຮົບປ້ອມປ້ອງກັນຊາຍແດນ. ຄະນະຊາວໜຸ່ມຂອງປ້ອມປ້ອງກັນຊາຍແດນ ກໍ່ໄດ້ມີການສົບທົບກັນຢ່າງແໜ້ນແຟ້ນກັບຄະນະຊາວໜຸ່ມບັນດາຕາແສງດັ່ງກ່າວເປັນປະຈຳ ເພື່ອຊ່ວຍເຫຼືອພໍ່ແມ່ປະຊາຊົນໃນວຽກງານກະສີກຳ. ເມື່ອເວົ້າເຖິງການຮ່ວມແຮງຮ່ວມໃຈຂອງພະນັກງານ, ນັກຮົບປ້ອມປ້ອງກັນຊາຍແດນບາຫຼາດ, ປ້າ ຫງວຽນທິເສົ໋າ, ປະຊາຊົນໃນຕາແສງຢາວຫຼາກ, ເມືອງຢາວຖູຍ, ແຂວງນາມດິ້ງ, ໃຫ້ຮູ້ວ່າ:
“ການສົມທົບລະຫວ່າງປ້ອມປ້ອງກັນຊາຍແດນບາຫຼາດ ກັບທ້ອງຖີ່ນແມ່ນມີປະສິດທິຜົນທີ່ສຸດ. ຕົວຢ່າງຄື: ພະນັກງານນັກຮົບໃນປ້ອມປ້ອງກັນຊາຍແດນ ໄດ້ພ້ອມກັບບັນດາອົງການຈັດຕັ້ງມະຫາຊົນຢູ່ທ້ອງຖີ່ນໂຄສະນາກ່ຽວກັບການຕ້ານໄພເສບຢາເສບຕິດ, ໄພສັງຄົມໃນທ້ອງຖີ່ນ ພ້ອມທັງຊ່ວຍຊາວກະສີກອນສ້າງແຜນການກໍ່ສ້າງຊົນນະບົດໃໝ່ອີກດ້ວຍ“.
ທະຫານລົງແຕ່ລະຄອບຄົວເພື່ອຂົນຂວາຍປະຊາຊົນເຂົ້າຮ່ວມການກໍ່ສ້າງຊົນນະບົດໃໝ່
(ພາບ: ອິນເຕີແນດ)ທ່ານ ຫງວຽນວັນຄ໋ວຽນ, ເລຂາຄະນະພັກຕາແສງຊວນຢາວ, ໃຫ້ຮູ້ວ່າ ໃນຈຳນວນມາດຖານກ່ຽວກັບການກໍ່ສ້າງຊົນນະບົດໃໝ່ເຊິ່ງຕາແສງບັນລຸໄດ້ນັ້ນ ແມ່ນມີການປະກອບກຳລັງເຫື່ອແຮງຢ່າງໃຫຍ່ຫຼວງຂອງພະນັກງານ, ນັກຮົບປ້ອມປ້ອງກັນຊາຍແດນບາຫຼາດ. ທ່ານເວົ້າວ່າ:
“ເມື່ອພວກຂ້າພະເຈົ້າປະຕິບັດໂຄງການກໍ່ສ້າງຊົນນະບົດໃໝ່ ແມ່ນໄດ້ຮັບການໂຄສະນາແຜນນະໂຍບາຍຂອງພັກ ແລະ ລັດກ່ຽວກັບການກໍ່ສ້າງຊົນນະບົດໃໝ່ຈາກພະນັກງານ, ນັກຮົບປ້ອມປ້ອງກັນຊາຍແດນໃນທ້ອງຖີ່ນ. ພິເສດ, ໃນຕາແສງພວກຂ້າພະເຈົ້າ, ຜູ້ເຊື່ອຖືສາສະໜາຄິດກວມ 29% ຈຳນວນພົນລະເມືອງໃນຕາແສງ. ພະນັກງານນັກຮົບປ້ອງກັນຊາຍແດນ ໄດ້ພ້ອມກັບພວກຂ້າພະເຈົ້າເຮັດວຽກງານຂົນຂວາຍປະຊາຊົນ, ພິເສດແມ່ນຊາວຄິດເຂົ້າຮ່ວມການກໍ່ສ້າງຊົນນະບົດໃໝ່ເປັນຢ່າງດີ“.
ທະຫານຊ່ວຍເຫຼືອປະຊາຊົນກໍ່ສ້າງທາງໃນຕາແສງ
(ພາບ: ອິນເຕີແນດ)ດ້ວຍຄວາມຮັບຜິດຊອບ ແລະ ອາລົມຈິດຂອງນັກຮົບ. ໃນໄລຍະຜ່ານມາ, ທະຫານປ້ອງກັນຊາຍແດນແຂວງນາມດິ້ງ ໄດ້ຕັ້ງໜ້າພ້ອມກັບອຳນາດການປົກຄອງ ແລະ ປະຊາຊົນທ້ອງຖີ່ນສູ້ຊົນປະຕິບັດບັນດາມາດຖານຂອງໂຄງການໃຫ້ສຳເລັດໂດຍໄວ. ພ້ອມກັບການຮ່ວມແຮງຮ່ວມໃຈປະຕິບັດໂຄງການກໍ່ສ້າງຊົນນະບົດໃໝ່. ພະນັກງານ, ນັກຮົບປ້ອງກັນຊາຍແດນແຂວງນາມດິ້ງ ຍັງລົງທຶນກໍ່ສ້າງ ສະຖານີບຳບັດນ້ຳສະອາດ 3 ແຫ່ງ ທີ່ມີມູນຄ່າ 8 ຕື້ດົ່ງ ເພື່ອຊ່ວຍປະຊາຊົນໃນເຂດນ້ຳເຄັມມີນ້ຳສະອາດນຳໃຊ້. ພິເສດ, ປະຈຸບັນ, ທະຫານປ້ອງກັນຊາຍແດນແຂວງນາມດິ້ງ ພວມຜັນຂະຫຍາຍການກໍ່ສ້າງເຂດລີ້ໄພໃຫ້ກຳ່ປັ່ນ, ເຮືອແພ ເມື່ອປະສົບພາຍຸ. ທ່ານພັນເອກ ເລວັນເວີ່ຍ, ເລຂາຄະນະພັກການເມືອງ ກອງບັນຊາການທະຫານປ້ອງກັນຊາຍແດນແຂວງນາມດິ້ງ, ໃຫ້ຮູ້ວ່າ:
“ນັບແຕ່ມີແຜນນະໂຍບາຍກ່ຽວກັບການກໍ່ສ້າງຊົນນະບົດໃໝ່, ກອງບັນຊາການທະຫານປ້ອງກັນຊາຍແດນແຂວງນາມດິ້ງ ໄດ້ມີແຜນນະໂຍບາຍ, ແຜນການຊີ້ນຳໃຫ້ກົມກອງຕ່າງໆເຂົ້າຮ່ວມການກໍ່ສ້າງຊົນນະບົດໃໝ່ ດ້ວຍບັນດາວຽກງານອັນລະອຽດ. ໃນນັ້ນເອົາໃຈໃສ່ເປັນພິເສດເຖິງການຮັບປະກັນຄວາມປອດໄພ, ຄວາມເປັນລະບຽບຮຽບຮ້ອຍໃນບໍລິເວນທະຫານປ້ອງກັນຊາຍແດນຕັ້ງທັບ, ເພື່ອສ້າງເງື່ອນໄຂສະດວກໃຫ້ປະຊາຊົນທຳການຜະລິດ. ທະຫານປ້ອງກັນຊາຍແດນກໍ່ຕັ້ງໜ້າເຂົ້າຮ່ວມການກໍ່ສ້າງທາງຄົມມະນາຄົມໃນເຂດຊົນນະບົດ, ສົ່ງເສີມການຮຽນ, ຂົນຂວາຍປະຊາຊົນຫັນປ່ຽນຜົນລະປູກ ແລະ ສັດລ້ຽງ, ສ້າງຕັ້ງສະມາຄົມຊ່ວຍເຫຼືອກັນພັດທະນາເສດຖະກິດ ແລະ ວັດທະນະທຳຢູ່ທ້ອງຖີ່ນ“.
ທະຫານຊ່ວຍເຫຼືອປະຊາຊົນກໍ່ສ້າງເຮືອນ
ດ້ວຍການເຂົ້າຮ່ວມຢ່າງຕັ້ງໜ້າ ແລະ ມີປະສິດທິຜົນຂອງພະນັກງານ, ນັກຮົບປ້ອງກັນຊາຍແດນແຂວງນາມດິ້ງ ໃນການກໍ່ສ້າງຊົນນະບົດໃໝ່ນັ້ນ, ຍິ່ງເຮັດໃຫ້ການພົວພັນລະຫວ່າງກຳລັງປະກອບອາວຸດ ແລະ ປະຊາຊົນມີຄວາມສະໜິດສະໜົມກວ່າອີກ. ສິ່ງດັ່ງກ່າວສະແດງໃຫ້ເຫັນວ່າ ເພື່ອເຮັດໃຫ້ “ໂຄງການກໍ່ສ້າງຊົນນະບົດໃໝ່“ ປະສົບຜົນສຳເລັດ ແມ່ນຈຳເປັນຕ້ອງໄດ້ຮັບການຮ່ວມແຮງຮ່ວມໃຈ, ການຊ່ວຍເຫຼືອຂອງທຸກຂັ້ນ, ທຸກຂະແໜງການ ແລະ ທົ່ວສັງຄົມ.
