ຫວຽດນາມຮັບປະກັນ ແລະ ປັບປຸງບັນດາສິດພື້ນຖານຂອງປະຊາຊົນຢ່າງບໍ່ຢຸດຢັ້ງ

ເມື່ອຕອບຄຳຖາມຂອງນັກຂ່າວສະເໜີໃຫ້ຮູ້ປະຕິກິລິຍາຂອງຫວຽດນາມ ກ່ຽວກັບເລື່ອງກະຊວງການຕ່າງປະເທດສະຫະລັດອາເມລິກາ ອອກບົດລາຍງານກ່ຽວກັບສິດທິມະນຸດປະຈຳປີ 2016,

ໂຄສົກກະຊວງການຕ່າງປະເທດຫວຽດນາມ ເລຫາຍບິງ

(vovword)- ເມື່ອຕອບຄຳຖາມຂອງນັກຂ່າວສະເໜີໃຫ້ຮູ້ປະຕິກິລິຍາຂອງຫວຽດນາມ ກ່ຽວກັບເລື່ອງກະຊວງການຕ່າງປະເທດສະຫະລັດອາເມລິກາ ອອກບົດລາຍງານກ່ຽວກັບສິດທິມະນຸດປະຈຳປີ 2016, ວັນທີ 13/3/2017 ໂຄສົກກະຊວງການຕ່າງປະເທດຫວຽດນາມ ເລຫາຍບິງ ຊີ້ແຈ້ງວ່າ ນະໂຍບາຍສະເໝີຕົ້ນສະເໝີປາຍຂອງຫວຽດນາມ ແມ່ນປົກປ້ອງ ແລະ ຊຸກຍູ້ບັນດາສິດພື້ນຖານຂອງປະຊາຊົນ. ບັນດາຄວາມມານະພະຍາຍາມ ແລະ ຜົນສຳເລັດຂອງຫວຽດນາມໃນການຮັບປະກັນ ແລະ ປັບປຸງບັນດາສິດພື້ນຖານຂອງປະຊາຊົນ ໃນໄລຍະຜ່ານມາໄດ້ຮັບການຮັບຮູ້ ແລະ ຕີລາຄາສູງຈາກປະຊາຄົມສາກົນ ຢ່າງບໍ່ຢຸດຢັ້ງ. ທ່ານເລຫາຍບິງ ໃຫ້ຮູ້ວ່າ ຫວຽດນາມ ຍາມໃດກໍ່ພ້ອມແລ້ວທີ່ຈະແລກປ່ຽນຢ່າງກົງໄປກົງມາ, ເປີດອົກເປີດໃຈ ແລະ ບົນນ້ຳໃຈສ້າງສັນກັບບັນດາປະເທດ, ໃນນັ້ນມີສະຫະລັດອາເມລິກາ ກ່ຽວກັບບັນດາບັນຫາທີ່ຍັງມີຄວາມແຕກຕ່າງກັນ. ມາຮອດປະຈຸບັນ, ຫວຽດນາມ-ສະຫະລັດອາເມລິກາ ໄດ້ດຳເນີນ 20 ຮອບເຈລະຈາສອງຝ່າຍເປັນປະຈຳ ກ່ຽວກັບສິດທິມະນຸດ. ບົດລາຍງານສິດທິມະນຸດປະຈຳປີ 2016 ຂອງກະຊວງການຕ່າງປະເທດສະຫະລັດອາເມລິກາ ເຖິງວ່າໄດ້ຮັບຮູ້ບາງຜົນງານກ່ຽວກັບການປົກປ້ອງສິດທິມະນຸດຂອງຫວຽດນາມກໍ່ຕາມ, ແຕ່ຍັງຍົກອອກບາງຂໍ້ສັງເກດທີ່ຂາດພາວະວິໄສ, ສ່ອງແສງບໍ່ຖືກຕ້ອງກັບສະພາບການຕົວຈິງຢູ່ຫວຽດນາມ.

ເມື່ອຕອບຄຳຖາມຂອງນັກຂ່າວກ່ຽວກັບປະຕິກິລິຍາຂອງຫວຽດນາມ ຕໍ່ເລື່ອງຈີນເປີດສາຍທ່ອງທ່ຽວຢ່າງຜິດກົດໝາຍໄປຍັງເກາະຮວ່າງຊາ ແລະ ເລື່ອງກ່ຳປັ່ນຕຳຫຼວດທະເລຂອງຈີນ ຂັບໄລ່ກ່ຳປັ່ນຫາປາຫວຽດນາມລຳໜຶ່ງຢູ່ໝູ່ເກາະຮວ່າງຊາ, ໂຄສົກກະຊວງການຕ່າງປະເທດຫວຽດນາມ ເລຫາຍບິງ ຢືນຢັນວ່າ ຫວຽດນາມມີເອກະສານນິຕິທຳ ແລະ ພະຍານຫຼັກຖານປະຫວັດສາດ ຢ່າງຄົບຖ້ວນ ຢັ້ງຢືນອະທິປະໄຕຂອງຫວຽດນາມ ສຳລັບສອງໝູ່ເກາະຮ່ວາງຊາ ແລະ ເຈື່ອງຊາ. ຫວຽດນາມເດັດດ່ຽວຄັດຄ້ານ ແລະ ຮຽກຮ້ອງຝ່າຍຈີນເຄົາລົບອະທິປະໄຕຂອງຫວຽດນາມ ແລະ ກົດໝາຍສາກົນ, ຢຸດຕິໃນທັນທີແລະ ບໍ່ດຳເນີນບັນດາການກະທຳຄືດັ່ງກ່າວ, ປະກອບສ່ວນເຂົ້າໃນການສ້າງສັນ ແລະ ຮັກສາສັນຕິພາບ, ສະຖຽນລະພາບຢູ່ທະເລຕາເວັນອອກ.