Vietnamese
中文
日本語
한국어
Français
Русский
Deutsch
Español
Bahasa Indonesia
ไทย
ພາສາລາວ
ខ្មែរ
ຫໍພິພິດທະພັນປະທານ ໂຮ່ຈີມິນ ມີສະຖາປັດຕະຍະກຳຄືສາລາ, ວັດທີ່ເຄີຍເຫັນຢູ່ພາກເໜືອ
(ພາບ: http://yeudulich.vn)
(vovworld) - ເມືອງນາມດ່ານ, ແຂວງເຫງ້ອານ ແມ່ນບ້ານເກີດເມືອງນອນຂອງປະທານ ໂຮ່ຈີມິນ, ບ້ານພໍ່ຂອງປະທານ ໂຮ່ຈີມິນ ຢູ່ບ້ານກິມລຽນ, ສ່ວນບ້ານແມ່ຢູ່ບ້ານຮ່ວາງຈູ່, ຫຼືເອີ້ນວ່າບ້ານຈົ່ວ, ເຊິ່ງຫ່າງຈາກບ້ານກິມລຽນ ບໍ່ໄກປານໃດ. ກຸ່ມປູຊະນີຍະສະຖານຮ່ວາງຈູ່ ລວມມີຫໍບູຊາຕະກູນ ຮ່ວາງຊວນ, ເຮືອນຂອງພໍ່ຕູ້ ຮ່ວາງເດື່ອງ ແລະເຮືອນມຸ້ງຫຍ້າ - ບ່ອນທີ່ປະທານ ໂຮ່ຈີມິນ ໄດ້ຮັບການກຳເນີດ. ເຊີນເພື່ອນມາຢ້ຽມຢາມບ້ານຮ່ວາງຈູ່, ຕາແສງກິມລຽນ, ເມືອງນາມດ່ານ, ແຂວງເງ້ອານ, ແຫ່ງທີ່ໄດ້ຕິດພັນກັບອະນຸສອນທີ່ດີໃນຍາມເຍົາໄວຂອງລູກຜູ້ດີເລີດຂອງຊາດຫວຽດນາມ ໃນໂອກາດສະເຫຼີມສະຫຼອງ 122 ປີ ແຫ່ງວັນຄ້າຍວັນເກີດປະທານ ໂຮ່ຈີມິນ ຜ່ານບົດຂຽນຂອງນັກຂ່າວ Le Phuong ທີ່ມີຫົວຂໍ້ວ່າ: ” ຮ່ວາງຈູ່, ບ້ານແມ່, ແຫ່ງທີ່ປະທານ ໂຮ່ຈີມິນ ໄດ້ຮັບການກຳເນີດ”.
ກຸ່ມປູຊະນີຍະສະຖານຮ່ວາງຈູ່ ຕັ້ງໃນເນື້ອທີ່ 3.500 ຕາລາງແມັດ ແມ່ນເຮືອນຂອງພໍ່ຕູ້ ຮ່ວາງຊວນເດືອ່ງ, ເຊິ່ງແມ່ນພໍ່ເຖົ້າ ຂອງປະທານ ໂຮ່ຈີມິນ, ໃນເຮືອນມຸ້ງຫຍ້າ 3 ຫ້ອງ, ໃຕ້ພຸ່ມໄມ້ໄຜ່ທີ່ຂຽວອຸ່ມທຸ່ມ, ທ້າວນ້ອຍ Nguyen Sinh Cung ໄດ້ຮັບການກຳເນີດໃນຕອນເຊົ້າວັນທີ 19/5/1890. ປະທານ ໂຮ່ຈີມິນ ພຽງແຕ່ດຳລົງຊີວິດຢູ່ບ້ານແມ່ເຖິງເວລາມີອາຍຸ 5 ປີເທົ່ານັ້ນ, ແຕ່ຮູບພາບບ້ານແມ່, ພິເສດແມ່ນບັນດາອະນຸສອນທີ່ຕິດພັນກັບຍາມເຍົາໄວຂອງເພິ່ນຍັງຄົງຝັງເລິກໃນດວງໃຈ Nguyen Sinh Cung, ຈົນຮອດເວລາທີ່ເພິ່ນໄດ້ກາຍເປັນປະທານປະເທດ. ນັບແຕ່ເວລາຍັງນ້ອຍ, ເມື່ອດຳລົງຊີວິດຢູ່ບ້ານຮ່ວາງຈູ່, Nguyen Sinh Cung ສາມາດຮັບຮູ້ໄດ້ຄຳສັ່ງສອນ, ຕັກເຕືອນຂອງພໍ່ເຖົ້າ, ແມ່ເຖົ້າ, ກໍຄືຄວາມຮັກຂອງພໍ່ແມ່ທີ່ສະຫງວນໃຫ້ແກ່ຕົນ. ບ້ານຮ່ວາງຈູ່ຍັງໄດ້ຮັບການຮູ້ຈັກກັນດີແມ່ນອູ່ວັດທະນະທຳຂອງແຂວງເງ້ອານ, ດັ່ງນັ້ນສຽງຂັບກ່ອມ, ທຳນອງເພງພື້ນເມືອງໄດ້ຕິດພັນກັບ Nguyen Sinh Cung ນັບແຕ່ໄດ້ຮັບການກຳເນີດຈົນເຖິງເວລາກ່ອນທີ່ຈະລ່ວງລັບໄປ:
”ນັ້ນແມ່ນຄຳສັ່ງສອນຂອງແມ່ທີ່ວ່າ, ລູກຈົ່ງຕັ້ງໃຈຮ່ຳຮຽນໃຫ້ສົມກັບບຸນຄູນພໍ່ແມ່, ຈົ່ງເປັນຄົນດີ, ບໍ່ຖືຖານະຕຳແໜ່ງເປັນສຳຄັນ, ຫາກຕ້ອງເຮັດທຸກສິ່ງທຸກຢ່າງເພື່ອປະເທດຊາດ”.
ເຮືອນຂອງພໍ່ຕູ້ ຮ່ວາງຊວນເດືອ່ງ, ເຊິ່ງແມ່ນພໍ່ເຖົ້າ ຂອງປະທານ ໂຮ່ຈີມິນ
(ພາບ: http://yeudulich.vn)
ຕະຫຼອດຊີວິດແມ່ນອຸທິດໃຫ້ແກ່ປະເທດຊາດ, ປະທານໂຮ່ຈີມິນໄດ້ໄປຊອກຫາເສັ້ນທາງກູ້ຊາດຢູ່ຫຼາຍປະເທດ, ຫຼາຍທ້ອງຖີ່ນໃນທົ່ວປະເທດ, ແຕ່ເພິ່ນພຽງແຕ່ມີເງື່ອນໄຂກັບເມືອບ້ານເທື່ອດຽວເທົ່ານັ້ນ. ນັ້ນແມ່ນວັນທີ 9/12/1961, ນີ້ແມ່ນເທື່ອທຳອິດ ແລະ ກໍ່ແມ່ນເທື່ອສຸດທ້າຍທີ່ທ່ານປະທານ ໂຮ່ຈີມິນ ກັບເມືອບ້ານຮ່ວາງຈູ່ ພາຍຫຼັງຫຼາຍປີທີ່ເດີນທາງອອກຈາກບ້ານ. ວັດຖຸ, ສິ່ງຂອງທັງໝົດໃນເຮືອນຫຼັງນີ້ຍັງຄົງໄດ້ຮັບການຮັກສາໄວ້ຄື: ໂຕະ - ບ່ອນທີ່ພໍ່ລຸງໂຮ່ ທ່ານ Nguyen Sinh Sac ສອນລູກຮຽນ, ກີ່ຕ່ຳຫູກຂອງແມ່ລຸງໂຮ່ ທ່ານນາງ Hoang Thi Loan, ຕຽງ - ບ່ອນທີ່ບັນດານັກຮຽນຮູ້ຜູ້ຮັກຊາດມາປຶກສາເລື່ອງສະຖານະການຂອງປະເທດຊາດກັບທ່ານ Nguyen Sinh Sac. ພິເສດແມ່ນຫີບໄມ້ຍັງຄົງຕັ້ງຢູ່ບ່ອນເຊິ່ງກ່ອນນີ້ທ້າວນ້ອຍ Nguyen Sinh Cung ໄດ້ເປາະໃສ່ເພື່ອແອບຍ່າງຫາບ່ອນພໍ່ອ່ານປື້ມ. ເມື່ອເຫັນປະຈັກຕາບັນດາວັດຖຸພັນທີ່ຕິດພັນກັບປະທານ ໂຮ່ຈີມິນ ໃນຄາວຍັງນ້ອຍ, ປ້າ Nguyen Thi Khuyen, ນັກທ່ອງທ່ຽວມາຈາກຮ່າໂນ້ຍ, ເວົ້າວ່າ:
”ເມື່ອເຫັນວັດຖຸ, ສິ່ງຂອງເຫຼົ່ານີ້, ຂ້າພະເຈົ້າຮູ້ສຶກຕື້ນຕັນໃຈຫຼາຍ ແລະ ເຫັນວ່າມັນມີຄວາມຊິນເຄີຍກັບຕົນແທ້ໆ. ມາຢ້ຽມຢາມບ້ານຂອງລຸງໂຮ່, ຂ້າພະເຈົ້າຈຶ່ງຮູ້ໄດ້ວ່າ, ນັບແຕ່ເວລາຍັງນ້ອຍ ລຸງໂຮ່ ໄດ້ສືບທອດມູນເຊື້ອອັນດີງານຈາກພໍ່, ແມ່. ແບບແຜນດຳລົງຊີວິດຂອງລຸງເຖິງວ່າທຳມະດາງ່າຍດາຍ, ແຕ່ພັດສູງສົ່ງທີ່ສຸດ”.
ເຮືອນທີ່ປະທານ ໂຮ່ຈີມິນ ໄດ້ຮັບການກຳເນີດ
(ພາບ: http://yeudulich.vn)
ໂດຍເຮັດວຽກງານອະທິບາຍ, ແນະນຳກ່ຽວກັບກຸ່ມປູຊະນີຍະສະ ຖານຮ່ວາງຈູ່ ມາເປັນເວລາ 8 ປີແລ້ວ, ເອື້ອຍ Nguyen Thi Kim Chi ໄດ້ເຫັນປະຈັກຕາອາລົມຈິດ, ຄວາມສະເທືອນໃຈຂອງນັກທ່ອງທ່ຽວເມື່ອໄດ້ຮັບຟັງການເລົ່າເລື່ອງກ່ຽວກັບບ້ານແມ່ຂອງປະທານ ໂຮ່ຈີມິນ
”ຂ້າພະເຈົ້າບໍ່ພຽງແຕ່ອະທິບາຍ, ແນະນຳກ່ຽວກັບບ້ານແມ່ຂອງລຸງເທົ່ານັ້ນ, ຫາກຍັງອະທິບາຍ, ແນະນຳກ່ຽວກັບເຂດສຸສານຂອງທ່ານນາງ Hoang Thi Loan, ແລະບ້ານແຊນ - ເຊິ່ງແມ່ນບ້ານພໍ່ຂອງລຸງໂຮ່ອີກດ້ວຍ. ເມື່ອອະທິບາຍ, ແນະນຳໃຫ້ນັກທ່ອງທ່ຽວຟັງບັນດາເລື່ອງລາວກ່ຽວກັບລຸງໂຮ່ໃນຍາມເຍົາໄວ, ກໍ່ຄືອາລົມຈິດຂອງລຸງທີ່ມີຕໍ່ບ້ານຮ່ວາງຈູ່, ຂ້າພະເຈົ້າເຫັນວ່າຕົນເອງເວົ້າມ່ວນກວ່າ, ແລະ ມີຄວາມຕື້ນຕັນໃຈ ກວ່າ”.
ທ່ານ Nguyen Van Chung, ຮອງຫົວໜ້າອຳນວຍການຄະນະຄຸ້ມຄອງເຂດປູຊະນີຍະສະຖານກິມລຽນ, ໃຫ້ຮູ້ວ່າ:
”ສຳຫຼັບນັກທ່ອງທ່ຽວຕ່າງປະເທດ, ພວກຂ້າພະເຈົ້າພະຍາຍາມແນະນຳໃຫ້ເຂົາເຈົ້າໄດ້ຮັບຊາບກ່ຽວກັບແນວຄິດ, ອາລົມຈິດຂອງປະທານ ໂຮ່ຈີມິນ ໃນໄລຍະທີ່ເພິ່ນດຳລົງຊີວິດຢູ່ບ້ານຮ່ວາງຈູ່. ພິເສດ, ນັກທ່ອງທ່ຽວຕ່າງປະເທດເມື່ອມາຢ້ຽມຢາມເຂດປູຊະນີຍະສະຖານຮ່ວາງຈູ່ ລ້ວນແຕ່ສະແດງຄວາມຕື້ນຕັນໃຈ. ເຂົາເຈົ້າຄິດວ່າ, ໂດຍແມ່ນປະທານປະເທດຜູ້ໜຶ່ງທີ່ມີຊື່ສຽງຢູ່ໃນໂລກຄືແນວນັ້ນ ແຕ່ເພິ່ນພັດມີແບບແຜນດຳລົງຊີວິດທຳມະດາລຽບງ່າຍທີ່ສຸດ, ເຂົາເຈົ້າກໍ່ຕີລາຄາວ່າ, ຜົນສຳເລັດຂອງປະທານ ໂຮ່ຈີມິນ ແມ່ນເລີ່ມມາຈາກມູນເຊື້ອຂອງບ້ານເກີດເມືອງນອນ, ມູນເຊື້ອຂອງຄອບຄົວ, ພິເສດແມ່ນເຈດຈຳນົງຂອງເພິ່ນ.”
ກ່ອນທີ່ລ່ວງລັບໄປ, ປະທານ ໂຮ່ຈີມິນ ຍັງຢາກໄດ້ຮັບຟັງທຳນອງເພງພື້ນເມືອງຂອງເງ້ອານ, ເພື່ອຫວນຄືນສຽງຂັບທີ່ອ່ອນຫວານຂອງແມ່ໃນເມື່ອກ່ອນ. ອາດເວົ້າໄດ້ວ່າ, ບ້ານຮ່ວາງຈູ່, ບ້ານແມ່ຂອງປະທານ ໂຮ່ຈີມິນ ແມ່ນແຫ່ງທີ່ສ້າງເປັນນິດໄສ, ບຸກຄະລິກອັນສູງສົ່ງຂອງປະທານ ໂຮ່ຈີມິນ ຜູ້ນຳທີ່ຍິ່ງໃຫຍ່ຂອງຊາດຫວຽນາມ.
