ບັນດານັກເຕະບານຍິງຂອງ ຫວຽດນາມ ໄດ້ແຂ່ງຂັນດ້ວຍຄວາມຕັດສິນໃຈຢ່າງເດັດດ່ຽວ ຈົນສຸດຄວາມສາມາດຂອງຕົນ ຄືບັນດານັກຮົບທີ່ຕໍ່ສູ້ໃນສະໜາມຮົບ ເຕັມໄປດ້ວຍຄວາມດຸເດືອດ, ຂ້ຽວຂາດ ແລະ ຫຍຸ້ງຍາກທີ່ສຸດ. ບົດຂຽນຂອງນັກຂ່າວ VOV.

ທິມບານເຕະຍິງ ຫວຽດນາມ ແລະ ຜົນງານໂດດເດັ່ນຢູ່ SEA Games 30

ກ່ອນການແຂ່ງຂັນ SEA Games ຄັ້ງທີ 30, ປະເພດກິລາບານເຕະຍິງໄດ້ຈັດຕັ້ງຢູ່ SEA Games ລວມທັງໝົດໄດ້ 10 ຄັ້ງແລ້ວ, ໃນນັ້ນ ຫວຽດນາມ ໄດ້ແຊມ 5 ຄັ້ງ. ດ້ວຍເລື່ອງຍາດໄດ້ໄຊຊະນະຕໍ່ທິມບານເຕະຍິງ ໄທ ໃນນັດແຂ່ງຂັນຊີງຊະນະເລີດ ເຊິ່ງດຳເນີນໃນວັນທີ 08 ທັນວາ ຜ່ານມາ, ທິມບານເຕະຍິງ ຫວຽດນາມ ຄວ້າໄດ້ຫຼຽນຄຳດວງທີ 6, ກາຍເປັນທິມບານເຕະທີ່ມີຜົນງານດີເດັ່ນທີ່ສຸດໃນປະເພດກິລາບານເຕະຍິງຢູ່ງານມະຫາກຳກິລາພາກພື້ນ ອາຊຽນ.

ໃນນັດແຂ່ງຂັນຊີງຊະນະເລີດ ບັນດານັກເຕະບານຍິງຕ້ອງຕັດສິນໃຈແຂ່ງຂັນຢ່າງດຸເດືອດເພື່ອໃຫ້ຄົບເວລາການແຂ່ງຂັນ 90 ນາທີທາງການ ຕໍ່ກັບຄູ່ແຂ່ງທີ່ມີພື້ນຖານຄວາມແຂ່ງແກ່ນ, ບັນດານັກກິລາຕ້ອງແຂ່ງຂັນເກີນຄວາມສາມາດຂອງຕົນຄື: ກິມແທັງ, ຮີ່ງຍື, ຕ໊ວຽດຢຸງ, ຫງວຽນທິຊ໊ວຽນ, ເຈືອງທິກ່ຽວ…ລ້ວນແຕ່ໝົດກຳລັງ ແຕ່ຈິດໃຈຂອງເຂົາເຈົ້າຍັງເປັນນັກຮົບທີ່ມີຄວາມກ້າຫານ, ເດັດດ່ຽວ. ນັກເຕະບານຍິງ ເຈືອງທິກ່ຽວ ແບ່ງປັນວ່າ:

“ນ້ອງຍັງໄດ້ຮັບບາດເຈັບຢູ່ ເມື່ອລົງເດີ່ນນັ້ນ ຮູ້ແຕ່ວ່າ ຕົນເອງຕ້ອງແຂ່ງຂັນຈົນສຸດຄວາມສາມາດຂອງຕົນ ເພື່ອສົມກັບຄວາມຄອງຄອຍຂອງແຟນບານ. ຫົວໜ້າຄູຝຶກ ມາຍດຶກຈູງ ໄດ້ປຸກລະດົມ, ໃຫ້ກຳລັງໃຈພວກນ້ອງ ເພື່ອຍາດເອົາໄຊຊະນະໃຫ້ໄດ້.”

ຄວາມມານະພະຍາຍາມຂອງບັນດານັກເຕະບານຍິງ ຫວຽດນາມ ໃນນາທີທີ 2 ຂອງນັດຕໍ່ເວລາທຳອິດ ນັກເຕະ ຫ໋າຍອ໊ຽນ ໄດ້ຍິງເຂົ້າປະຕູຂອງຄູ່ແຂ່ງ. ກອງໜ້າ ຫ໋າຍອ໊ຽນ ໃຫ້ຮູ້ວ່າ:

“ນ້ອງຮູ້ສຶກດີໃຈທີ່ສຸດ ເມື່ອຍາດໄດ້ໄຊຊະນະ. ນ້ອງກໍ່ມີຄວາມຕື້ນຕັນໃຈ ທີ່ໄດ້ປະກອບສ່ວນໜ້ອຍໜຶ່ງ ເພື່ອຍາດເອົາໄຊຊະນະມາໃຫ້ແກ່ປະເທດຊາດ ແລະ ຄວ້າໄດ້ຫຼຽນຄຳດວງທີ 2 ໃນພາລະກິດຂອງຕົນ.”

ທິມບານເຕະຍິງ ຫວຽດນາມ ແລະ ຜົນງານໂດດເດັ່ນຢູ່ SEA Games 30

ພາຍຫລັງຍິງເຂົ້າປະຕູຂອງຄູ່ແຂ່ງ, ບັນດານັກເຕະບານຍິງ ຫວຽດນາມ ໄດ້ສືບຕໍ່ແຂ່ງຂັນຢ່າງເດັດດ່ຽວກ້າແກ່ນ ເພື່ອປົກປ້ອງຜົນງານຂອງຕົນ. ບັນດານັກຮົບຍິງດາວຄຳ ໄດ້ມີການແຂ່ງຂັນຢ່າງດຸເດືອດ, ເອົາຊະນະຕົນເອງ. ຫົວໜ້າທິມບານເຕະຍິງ ຮີ່ງຍື ແບ່ງປັນວ່າ:

“ເມື່ອສິ້ນສຸດການແຂ່ງຂັນໃນເຄິ່ງເວລາທຳອິດ, ຂາຂອງ ເຈືອງທິກ່ຽວ ຖືກບາດເຈັບມີເລືອດໄຫຼອອກ, ບັນດາທ່ານໝໍຕ້ອງໄດ້ດູແລ ແລະ ຮຳບາດແຜໃຫ້ ກ່ຽວ. ນັກເຕະບານທັງໝົດໃນທິມ ລ້ວນແຕ່ລະດົມກຳລັງໃຈກັນ ເພື່ອແຂ່ງຂັນໃຫ້ດີທີ່ສຸດ. ພວກນ້ອງໄດ້ພະຍາຍາມແຂ່ງຂັນຈົນສຸດຄວາມສາມາດຂອງຕົນໃນເວລາ 120 ນາທີ.”

ຫຼຽນຄຳແມ່ນຜົນງານທີ່ສົມກັບຄວາມມານະພະຍາຍາມຂອງ ລູກສິດ ແລະ ຄູຝຶກ ມາຍດຶກຈູງ. ຄູຝຶກ ມາຍດຶກຈູງ ໃຫ້ຮູ້ດ້ວຍຄວາມຕື້ນຕັນໃຈວ່າ:

“ຂ້າພະເຈົ້າມີຄວາມຮູ້ສຶກເບີກບານໃຈທີ່ສຸດ. ນີ້ແມ່ນຄັ້ງທີ 6 ທີ່ທິມບານເຕະຍິງ ຫວຽດນາມ ໄດ້ເປັນແຊ້ມ ອາຊຽນ. ນັ້ນແມ່ນການປະກອບສ່ວນຂອງນັກກິລາທັງໝົດໃນທິມ. ໝົດທຸກຄົນໃນທິມໄດ້ແຂ່ງຂັນຈົນສຸດຄວາມສາມາດຂອງຄົນ ເຖິງວ່າມີບາງຄົນຂາປັ້ນ, ໄດ້ຮັບບາດເຈັບກໍ່ຕາມ ແຕ່ເຂົາເຈົ້າກໍ່ຍັງພະຍາຍາມແຂ່ງຂັນ ແລະ ຍາດໄດ້ໄຊຊະນະ.”

ໄຊຊະນະຂອງທິມບານເຕະຍິງ ຫວຽດນາມ ໄດ້ຮັບຄວາມນິຍົມ, ນັບຖືຈາກມະຫາຊົນຜູ້ນິຍົມບານເຕະ ພ້ອມດ້ວຍວົງການສື່ມວນຊົນທັງຢູ່ພາຍໃນ ແລະ ຕ່າງປະເທດ, ອີກຄັ້ງໜຶ່ງເປັນການຢັ້ງຢືນເຖິງທີ່ຕັ້ງອັນດັບ 1 ຂອງກິລາບານເຕະຍິງ ຫວຽດນາມ ຢູ່ ພາກພື້ນອາຊີຕາເວັນອອກສ່ຽງໃຕ້./.