ນາຍົກລັດຖະມົນຕີກຳປູເຈຍຕີລາຄາສູງບົດບາດຂອງສະມາຄົມມິດຕະພາບຫວຽດນາມ-ກຳປູເຈຍ
ທ່ານນາຍົກລັດຖະມົນຕີກຳປູເຈຍ Hun Sen ຕ້ອນຮັບຄະນະຜູ້ແທນ
ສູນກາງສະມາຄົມມິດຕະພາບຫວຽດນາມ-ກຳປູເຈຍ
(ພາບ: Xuân Khu/Vietnam+)
(vovworld)- ຕອນບ່າຍວັນທີ 9/7, ທ່ານນາຍົກລັດຖະມົນຕີກຳປູເຈຍ Hun Sen ໄດ້ໃຫ້ການຕ້ອນຮັບຄະນະຜູ້ແທນສູນກາງສະມາຄົມມິດຕະພາບຫວຽດນາມ-ກຳປູເຈຍ ໂດຍທ່ານຫວູເວືອງວຽດ, ຮອງປະທານຜູ້ປະຈຳການສູນກາງສະມາຄົມນຳໜ້າ, ທີ່ພວມຢ້ຽມຢາມ ແລະ ເຮັດວຽກຢູ່ກຳປູເຈຍ ໃນລະຫວ່າງວັນທີ 8-12/7. ທີ່ການຕ້ອນຮັບ, ທ່ານນາຍົກລັດຖະມົນຕີກຳປູເຈຍ Hun Sen ໄດ້ຊົມເຊີຍບັນດາຜົນສຳເລັດໃນການເຄື່ອນໄຫວຮ່ວມມືລະຫວ່າງ ສະມາຄົມມິດຕະພາບຫວຽດນາມ-ກຳປູເຈຍ ແລະ ກຳປູເຈຍ-ຫວຽດນາມ ໃນໄລຍະຜ່ານມາ, ປະກອບສ່ວນຢ່າງຕັ້ງໜ້າຍົກສູງຄວາມເຂົ້າອົກເຂົ້າໃຈ ແລະ ນ້ຳໃຈມິດຕະພາບທີ່ເປັນມູນເຊື້ອລະຫວ່າງປະຊາຊົນ 2 ປະເທດ.
ທ່ານຮອງປະທານຜູ້ປະຈຳການສະມາຄົມມິດຕະພາບຫວຽດນາມ-ກຳປູເຈຍ ຫວູເວືອງວຽດ ຢືນຢັນວ່າ: ສະມາຄົມມິດຕະພາບ ຫວຽດນາມ-ກຳປູເຈຍ ຈະຈົນສຸດຄວາມສາມາດຂອງຕົນ ເພື່ອແນໃສ່ພັດທະນາການພົວພັນລະຫວ່າງປະຊາຊົນ 2 ປະເທດ, ປະກອບສ່ວນເພີ່ມພູນຄູນສ້າງນ້ຳໃຈມິດຕະພາບອັນດີງາມລະຫວ່າງ 2 ປະເທດຊາດໃຫ້ນັບມື້ນັບໝັ້ນຄົງ.
ແລະກໍໃນວັນດຽວກັນ, ຄະນະຜູ້ແທນສູນກາງສະມາຄົມມິດຕະພາບຫວຽດນາມ-ກຳປູເຈຍ ໄດ້ມີການເຈລະຈາກັບຄະນະການນຳສະມາຄົມຕະພາບກຳປູເຈຍ-ຫວຽດນາມ ໂດຍທ່ານນາງ Men Som On, ຮອງນາຍົກລັດຖະມົນຕີກຳປູເຈຍ, ປະທານສະມາຄົມນຳໜ້າ ແລະ ຄະນະກໍມີການເຮັດວຽກກັບສະພາພັດທະນາກຳປູເຈຍ (CDC).