ທ່ານປະທານປະເທດຫວຽດນາມເຈືອງເຕີນຊາງ ແລະ ປະທານາທິບໍດີ ເຊັກໂກ Milos Zeman
ພາບ:vov
|
(vovworld)- ນຳການພົວພັນມິດຕະພາບຫວຽດນາມ-ເຊັກໂກຂຶ້ນສູ່ລະດັບສູງໃຫມ່, ນີ້ແມ່ນຄຳຢືນຢັນຂອງທ່ານປະທານປະເທດຫວຽດນາມເຈືອງເຕີນຊາງ ແລະ ປະທານາທິບໍດີ ເຊັກໂກ Milos Zeman ທີ່ການປະຊຸມຂ່າວຮ່ວມ ພາຍຫລັງການເຈລະຈາຊື່ງດຳເນີນໄປໃນວັນທີ 11/5. ປະມຸກລັດທັງສອງທ່ານລ້ວນແຕ່ຢືນຢັນວ່າ: ນີ້ແມ່ນຈຸດເວລາເໝາະສົມເພື່ອນຳການພົວພັນຮ່ວມມືລະຫວ່າງສອງປະເທດຂຶ້ນສູ່ລະດັບສູງໃຫມ່. ທ່ານປະທານປະເທດເຈືອງເຕີນຊາງ ອີກຄັ້ງຫນຶ່ງຢືນຢັນການພົວພັນມິດຕະພາບລະຫວ່າງສອງປະເທດ ແມ່ນພື້ນຖານເພື່ອຊຸກຍູ້ການຮ່ວມມືໃນຫລາຍຂົງເຂດ.
“ສ.ເຊັກໂກ ມີການພົວພັນກັບຫວຽດນາມ ມາແຕ່ດົນນານ ແລະ ໄດ້ຊ່ວຍຫວຽດນາມຫລາຍຢ່າງໃນກິດຈະການຕໍ່ສູ້ຍາດເອົາເອກະລາດ ແລະ ສ້າງສາ, ພັດທະນາປະເທດຊາດ. ພວກຂ້າພະເຈົ້າຕົກລົງຈະຮ່ວມມືຮອບດ້ານໃນທຸກຂົງເຂດ ຈາກການເມືອງຕະຫລອດຮອດເສດຖະກິດ, ການຄ້າ, ການລົງທຶນ, ການສຶກສາ, ປ້ອງກັນຄວາມສະຫງົບ. ໃນນັ້ນ ເນັ້ນຫນັກວ່າ: ຈະເພີ່ມທະວີການພົວພັນດ້ານເສດຖະກິດ, ການຄ້າ, ການລົງທຶນໃຫ້ສົມກັບການພົວພັນລະຫວ່າງສອງປະເທດ.”
ກ່ຽວກັບສັນຍາການຄ້າເສລີ ຫວຽດນາມ - ອີຢູ, ທ່ານປະທານປະເທດເຈືອງເຕີນຊາງໃຫ້ຮູ້ວ່າ: ເຊັກໂກ ພວມມານະພະຍາຍາມສະຫນັບສະຫນູນ ຫວຽດນາມ ເພື່ອສິ້ນສຸດການເຈລະຈາສັນຍາດັ່ງກ່າວໂດຍໄວ.
“ເຊັກໂກ ສະແດງການສະຫນັບສະຫນູນຢ່າງແຮງຕໍ່ເລື່ອງ ຫວຽດນາມ ແລະ ອີຢູ ສິ້ນສຸດການເຈລະຈາສັນຍາການຄ້າເສລີ FTA ໂດຍໄວ. ນັ້ນແມ່ນພື້ນຖານເພື່ອເພີ່ມທະວີການແລກປ່ຽນດ້ານການຄ້າລະຫວ່າງຫວຽດນາມ ແລະ ອີຢູ ເວົ້າລວມ, ຫວຽດນາມແລະ ເຊັກໂກ ເວົ້າສະເພາະ.”
ການນຳສອງທ່ານຖືວ່າ: ບົນພື້ນຖານຄວາມຕັດສິນໃຈດ້ານການເມືອງທີ່ໄດ້ຮັບການຢັ້ງຢືນນັ້ນ, ຫວຽດນາມ ແລະ ເຊັກໂກ ຄວນສືບຕໍ່ເສີມຂະຫຍາຍບັນດາກົນໄກຮ່ວມມືລະຫວ່າງລັດຖະບານ, ກົນໄກທາບທາມຄຳເຫັນດ້ານເສດຖະກິດກໍຄືບັນດາກົນໄກຮ່ວມມືອື່ນເພື່ອນຳການພົວພັນຮ່ວມມືເຂົ້າສູ່ລວງເລິກ, ແທດຈິງ, ເໝາະສົມກັບຄວາມມຸ່ງມາດປາດຖະຫນາຂອງການນຳ, ປະຊາຊົນ, ພ້ອມກັນນຳມາເຊິ່ງຜົນປະໂຫຍດໃຫ້ແກ່ທັງສອງປະເທດ.
ຕອນບ່າຍວັນດຽວກັນ, ທ່ານປະທານປະເທດເຈືອງເຕີນຊາງ ໄດ້ພົບປະກັບປະທານສະພາສູງ ເຊັກໂກ Milan Stech ແລະ ປະທານສະພາຕ່ຳ Jan Hamacek. ທີ່ການພົບປະ, ສອງຝ່າຍເຫັນດີນຳກັນໂດຍຖືວ່າ: ບັນດາຜົນງານທີ່ບັນລຸໄດ້ໃນກິດຈະການພັດທະນາຢູ່ແຕ່ລະປະເທດ ພ້ອມກັບບັນດາທ່າແຮງ ແລະ ຄວາມສາມາດບົ່ມຊ້ອນອັນໃຫຍ່ຫລວງ ຂອງສອງຝ່າຍ ສາມາດເພີ່ມເຕີມໃຫ້ກັນ ນັ້ນແມ່ນພື້ນຖານອັນໝັ້ນແກ່ນເພື່ອນຳການພົວພັນ ຫວຽດນາມ- ເຊັກໂກ ສືບຕໍ່ພັດທະນາຢ່າງມີປະສິດທິຜົນໃນໄລຍະຈະມາເຖິງ.