( vovworld ) - ວັນທີ່ 8/6, ຄະນະຜູ້ແທນຜູ້ປະສົບເຄາະຮ້າຍຈາກທາດພິດສີສົ້ມດີໂອຊີນຫວຽດນາມ 80 ຄົນໄດ້ສິ້ນສຸດການຢ້ຽມຢາມ ແລະ ປິ່ນປົວພະຍາດຢູ່ສ.ເກົາຫຼີ ຕາມລາຍການ “ ຕ້ອນຮັບຜູ້ປະສົບເຄາະຮ້າຍຈາກທາດພິດສີສົ້ມດີໂອຊີນຫວຽດນາມ ”. ໃນການຢ້ຽມຢາມຄັ້ງນີ້, ມີຄົນເຈັບ 5 ຄົນທີ່ມີອາການສຸຂະພາບອ່ອນເພຍທີ່ໄດ້ຮັບການຜ່າຕັດປີ່ນປົວຈາກບັນດາທ່ານໝໍຢູ່ໂຮງໝໍ Severance, ເຊີອູນ ແລະຄົນເຈັບ 5 ຄົນນີ້ຍັງພວມໄດ້ຮັບການປິ່ນປົວຢູ່ສ.ເກົາຫຼີ, ອາການສຸຂະພາບຄ່ອຍດີຂຶ້ນ ແລະ ອາດຈະກັບເມືອປະເທດໃນອາທິດຈະມາເຖິງ. ເມື່ອເວົ້າເຖິງໝາກຜົນຂອງການໄປຢ້ຽມຢາມນີ້, ທ່ານ Tran Xuan Thu, ຮອງປະທານທັງເປັນເລຂາທິການໃຫຍ່ສະມາຄົມຜູ້ປະສົບເຄາະຮ້າຍຈາກທາດພິດດີໂອຊີນຫວຽດນາມ ຢືນຢັນວ່າ.
“ ນີ້ແມ່ນລາຍການໃຫຍ່ກວ່າໝູ່ນັບແຕ່ກ່ອນເປັນຕົ້ນມາຮອດ ແລະ ບໍ່ເຄີຍມີມາກ່ອນ. ຫວັງວ່າ, ການຢ້ຽມຢາມຄັ້ງນີ້ ຈະເປີດໄລຍະໄໝ່ກ່ຽວກັບການຊ່ວຍເຫຼືອຂອງວົງຄະນະຍາດສາກົນທີ່ມີຕໍ່ຜູ້ປະສົບເຄາະຮ້າຍຈາກທາດພິດດີໂອຊີນຫວຽດນາມ, ພິເສດແມ່ນລະບົບສາທາລະນະສຸກສາກົນໄດ້ເອົາໃຈໃສ່ເຖິງບັນຫານີ້. ຄວາມເອົາໃຈໃສ່ຂອງສາກົນໄດ້ສົ່ງຜົນສະທ້ອນທີ່ໃຫຍ່ຫຼວງເຖິງຈິດໃຈຂອງຜູ້ປະສົບເຄາະຮ້າຍ. ພວກເຂົາເຈົ້າໄດ້ເຫັນວ່າ ບໍ່ພຽງແຕ່ປະຊາຊົນຢູ່ພາຍໃນປະເທດເທົ່ານັ້ນ ຫາກຍັງໄດ້ຮັບຄວາມເອົາໃຈໃສ່ຈາກສາກົນ, ນັບທັງດ້ານສຸຂະພາບ ແລະ ການຕໍ່ສູ້ທ່ວງເອົາຄວາມຍຸດຕິທຳອີກດ້ວຍ ”
ກ່ອນໜ້ານັ້ນ, ວັນທີ 6/6, ຢູ່ໂຮງນະຄອນໃຫຍ່ Sejong ທີ່ນະຄອນຫຼວງ ເຊີອູນ, ຄະນະຜູ້ແທນຜູ້ປະສົບເຄາະຮ້າຍຈາກທາດພິດສີສົ້ມດີໂອຊີນຫວຽດນາມ ໄດ້ມີການພົບປະແລກປ່ຽນກັບບັນດາຜູ້ປະສົບເຄາະຮ້າຍຈາກທາດພິດສີສົ້ມດີໂອຊີນສ.ເກົາຫຼີ. ກ່າວຄຳເຫັນທີ່ການພົບປະ, ທ່ານ Vu Xuan Hong, ປະທານສະຫະສະມາຄົມບັນດາອົງການມິດຕະພາບຫວຽດນາມ ໄດ້ຢືນຢັນວ່າ ລາຍການ“ ຕ້ອນຮັບຜູ້ປະສົບເຄາະຮ້າຍຈາກທາດພິດສີສົ້ມດີໂອຊີນຫວຽດນາມ ຢູ່ສ.ເກົາຫຼີ ” ໄດ້ນຳມາເຊິ່ງຄວາມໝາຍວັດທະນະທຳມະນຸດອັນສູງສົ່ງ, ນຳຈິດວິນຍານສອງຊາດຫວຽດນາມ - ສ.ເກົາຫຼີ ຫຍັບມໍ່ເຂົ້າກັນເພື່ອພ້ອມກັນສ້າງຄວາມຮັກແພງມະນຸດ ແລະ ຄວາມຍຸດຕິທຳ.