(vovworld) - ວັນທີ 20 ສິງຫາ, ຢູ່ສຳນັກງານທີ່ນິວຢອກ, ສະພາຄວາມໝັ້ນຄົງສະຫະປະຊາຊາດ ໄດ້ເປີດວາລະປຶກສາຫາລືກ່ຽວກັບສະພາບການຢູ່ຕາເວັນອອກກາງ ໃນສະພາບທີ່ນັບມື້ນັບມີການຜັນແປ່ຢ່າງສັບສົນ ຢູ່ບາງປະເທດໃນພາກພື້ນນີ້, ພິເສດແມ່ນຢູ່ອີຢີບ ແລະ ຊີຣີ, ອັນໄດ້ນາບຂູ່ເຖິງຄວາມສະຫງົບປອດໄພ ແລະ ສະຖຽນລະພາບໃນທົ່ວເຂດ. ທ່ານ Oscar Fenandez Taranco, ຮອງເລຂາທິການໃຫຍ່ສະຫະປະຊາຊາດ ຜູ້ຮັບຜິດຊອບດ້ານການເມືອງ ສະແດງຄວາມວິຕົກກັງວົນວ່າ ຖ້າວິກິດການຢູ່ 2 ປະເທດນີ້ບໍ່ໄດ້ຮັບການແກ້ໄຂດ້ວຍສັນຕິວິທີໂດຍໄວ, ອາດຈະກໍ່ໃຫ້ເກີດບັນດາຜົນສະທ້ອນບໍ່ດີເຖິງທົ່ວເຂດ.
ກ່ຽວກັບສະພາບການຢູ່ຊີຣີ, ທ່ານ Fenandez Taranco ໃຫ້ຮູ້ວ່າ ການປະທະກັນທີ່ນອງເລືອດຢູ່ນີ້ ຍັງບໍ່ທັນມີສັນຍານຫຼຸດລົງ. ປະຈຸບັນມີປະຊາຊົນຊີຣີ ເກືອບ 7 ລ້ານຄົນ ຈຳເປັນຕ້ອງໄດ້ຮັບການຊ່ວຍເຫຼືອມະນຸດສະຖຳຢ່າງຮີບດ່ວນ. ທ່ານ Fenandez Taranco ຢືນຢັນວ່າ ການທະຫານບໍ່ແມ່ນມາດຕະການແກ້ໄຂໃຫ້ແກ່ການປະທະກັນໃນປະຈຸບັນຢູ່ຊີຣີ ແລະ ຮຽກຮ້ອງໃຫ້ບັນດາຝ່າຍຕ້ອງເຂົ້າຮ່ວມການເຈລະຈາ, ຊອກຫາມາດຕະການແກ້ໄຂສັນຕິພາບ ແລະ ຜັນຂະຫຍາຍວິວັດການປອງດອງຊາດ. ກ່ຽວກັບສະພາບການຢູ່ອີຢີບ, ທ່ານ Fenandez Taranco ສະແດງຄວາມວິຕົກກັງວົນຕໍ່ບັນດາການຜັນແປ່ທີ່ນອງເລືອດລ້າສຸດຢູ່ປະເທດອາຟະລິກາເໜືອ ນີ້, ຮຽກຮ້ອງໃຫ້ບັນດາຝ່າຍຕ້ອງຊອກຫາມາດຕະການແກ້ໄຂໂດຍໄວ ບົນພື້ນຖານຢຸດຕິການນຳໃຊ້ກຳລັງອາວຸດຕ້ານສາມັນຊົນ. ເມື່ອເຕື້ອງເຖິງການເຈລະຈາທີ່ຫາກໍ່ໄດ້ຮັບການເຊື່ອມຕໍ່ລະຫວ່າງອິດສຣາແອນ ແລະ ປາແລດສຕິນ, ທ່ານ Fenandez Taranco ເນັ້ນໜັກວ່າ, ຖ້າຫາກ 2 ຝ່າຍແກ້ໄຂໄດ້ຄວາມບໍ່ລົງລອຍກັນ ຈະຊຸກຍູ້ເລື່ອງຊອກຫາມາດຕະການແກ້ໄຂບັນດາບັນຫາທີ່ຍັງຄົງຄ້າງອື່ນໆຢູ່ຕາເວັນອອກກາງ ນີ້.