(ທ່ານປະທານປະເທດ ເຈືອງເຕີ໋ນຊາງ ແລະ
ທ່ານເລຂາທິການໃຫຍ່, ປະທານປະເທດ ຈີນ ສີຈິ້ນຜິງ)
(vovworld) – “ຫວຽດນາມ ເພີ່ມທະວີ ແລະ ປັບປຸງການພົວພັນຄູ່ຮ່ວມມືຍຸດທະສາດຮອບດ້ານກັບ ຈີນ” ນີ້ແມ່ນຄຳຢືນຢັນຂອງທ່ານປະທານປະເທດ ຫວຽດນາມ ເຈືອງເຕີ໋ນຊາງ ການເຈລະຈາກັບທ່ານເລຂາທິການໃຫຍ່, ປະທານປະເທດ ຈີນ ສີຈິ້ນຜິງ ໃນຕອນເຊົ້າວັນທີ 06/11 ຢູ່ຮ່າໂນ້ຍ. ທ່ານປະທານປະເທດ ເຈືອງເຕີ໋ນຊາງ ເນັ້ນໜັກວ່າ: ໃນສະພາວະສະພາບການສາກົນປະຈຸບັນພວມຜັນແປຢ່າງສັບສົນ, 2 ປະເທດຄວນສະໜັບສະໜູນເຊິ່ງກັນ ແລະ ກັນ, ພ້ອມກັນປັບປຸງນ້ຳໃຈມິດຕະພາບການຮ່ວມມື, ປະກອບສ່ວນຢ່າງແທດຈິງເຂົ້າໃນການປົກປັກຮັກສາສັນຕິພາບ, ສະຖຽນລະພາບຂອງພາກພື້ນ ແລະ ໂລກ.
ທ່ານປະທານປະເທດ ເຈືອງເຕີ໋ນຊາງ ສະເໜີ 2 ຝ່າຍເພີ່ມທະວີສ້າງຄວາມໄວ້ເນື້ອເຊື່ອໃຈດ້ານການເມືອງ, ຊຸກຍູ້ການຮ່ວມມື, ຕັ້ງໜ້າຊອກຫາວິທີແກ້ໄຂບັນດາບັນຫາທີ່ຍັງຄົງຄ້າງສົມເຫດສົມຜົນ. ຄວາມບໍ່ລົງລອຍລະຫວ່າງ 2 ປະເທດກ່ຽວກັບບັນຫາທະເລຕາເວັນອອກແມ່ນຄວາມຈິງ, ແຕ່ວ່າ ສິ່ງສຳຄັນທີ່ສຸດນັ້ນແມ່ນ 2 ຝ່າຍຕ້ອງເຄົາລົບຜົນປະໂຫຍດອັນຊອບທຳຂອງກັນ, ຄວບຄຸມສະພາບການໃຫ້ດີ, ຕ້ອງປະຕິບັດບັນດາຂໍ້ຕົກລົງ ແລະ ຄວາມຮັບຮູ້ລວມຂອງການນຳຂັ້ນສູງ 2 ພັກ, 2 ລັດຢ່າງເຂັ້ມງວດ. ທ່ານປະທານປະເທດ ເຈືອງເຕີ໋ນຊາງ ເນັ້ນໜັກວ່າ: 2 ປະເທດຄວນຜ່ານການເຈລະຈາແກ້ໄຂບັນດາການຂັດແຍ່ງໃຫ້ສົມເຫດສົມຜົນ, ບໍ່ໃຫ້ເກີດການກະທຳເຮັດໃຫ້ສະພາບການສັບສົນຂຶ້ນຕື່ມ ແລະ ເປີດກ້ວາງການຂັດແຍ້ງກັນ, ບໍ່ໄປຕາມຈຸດໝາຍນຳໃຊ້ການທະຫານຢູ່ທະເລຕາເວັນອອກ; ຮັບປະກັນຄວາມປອດໄພການເດີນທະເລ, ທາງອາກາດ ແລະ ບັນດາການເຄື່ອນໄຫວການປະມົງເປັນປົກກະຕິຂອງຊາວປະມົງ, ພ້ອມກັນກໍ່ສ້າງ ແລະ ຮັກສາສະພາບແວດລ້ອມສັນຕິພາບ, ສະຖຽນລະພາບ ຮັບໃຊ້ຈຸດໝາຍພັດທະນາທັງ 2 ປະເທດ ແລະ ໃນພາກພື້ນ. 2 ຝ່າຍສາມາດຜັນຂະຫຍາຍຊຸກຍູ້ບັນດາຂົງເຂດ, ໂຄງການຮ່ວມມືບົນທະເລ, ເໝາະສົມກັບກົດໝາຍສາກົນ.
ສ່ວນທ່ານເລຂາທິການໃຫຍ່, ປະທານປະເທດ ຈີນ ສີຈິ້ນຜິງ ຢືນຢັນວ່າ: ເລື່ອງປົກປັກຮັກສາການພົວພັນ ຈີນ - ຫວຽດນາມ ພັດທະນາປອດໃສເປັນປົກກະຕິ, ເພີ່ມທະວີການພົບປະແລກປ່ຽນການຮ່ວມມືລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດ ແມ່ນປັດໃຈສຳຄັນທີ່ສຸດສຳລັບການພັດທະນາຂອງແຕ່ລະປະເທດ, ເໝາະສົມກັບຄວາມມຸ່ງມາດປາດຖະໜາຂອງປະຊາຊົນ 2 ປະເທດ, ມີປະໂຫຍດໃຫ້ສັນຕິພາບ, ສະຖຽນລະພາບ, ພັດທະນາຂອງພາກພື້ນ ແລະ ໂລກ. ທ່ານເລຂາທິການໃຫຍ່, ປະທານປະເທດ ຈີນ ສີຈິ້ນຜິງ ຖືວ່າ: ການພົວພັນ ຈີນ - ຫວຽດນາມ ພວມຢືນຢູ່ຕໍ່ໜ້າກາລະໂອກາດພັດທະນາໃໝ່, 2 ຝ່າຍຄວນປັບປຸງມູນເຊື້ອມິດຕະພາບ, ສືບຕໍ່ຮັກສາການພົບປະແລກປ່ຽນຂັ້ນສູງ, ເປີດກ້ວາງບັນດາຂົງເຂດຮ່ວມມືລະຫວ່າງ 2 ປະເທດ.
ກ່ຽວກັບບັນຫາທະເລຕາເວັນອອກ, ທ່ານເລຂາທິການໃຫຍ່, ປະທານປະເທດ ຈີນ ສີຈິ້ນຜິງ ຖືວ່າ: 2 ຝ່າຍຕ້ອງມານະພະຍາຍາມຄວບຄຸມບັນດາຄວາມບໍ່ລົງລອຍ ໂດຍຜ່ານການເຈລະຈາ ເພື່ອຮັກສາສັນຕິພາບ, ສະຖຽນລະພາບບົນທະເລ.