ເພີ່ມທະວີຊຸກຍູ້ ການເຊື່ອມຕໍ່ ອາຊຽນ - ອີນເດຍ
(ພາບປະກອບ)
(vovworld) - ຕາມຖະແຫຼງຂ່າວສື່ມວນຊົນໃນວັນທີ 29/11 ຂອງຄະນະເລຂາອາຊຽນ ໃຫ້ຮູ້ວ່າ, ກອງປະຊຸມຫົວເລື່ອງສະເພາະ “ມຸ່ງໄປເຖິງການຫັນການເຊື່ອມຕໍ່ອາຊຽນ+ : ເພີ່ມທະວີການເຊື່ອມຕໍ່ອາຊຽນ - ອີນເດຍ” ເຊິ່ງດຳເນີນໄປໃນວັນທີ 27/11 ຢູ່ນະຄອນຫຼວງ ບາງກອກ, ປະເທດໄທ ດ້ວຍການເຂົ້າຮ່ວມຂອງບັນດາເຂົ້າໜ້າທີ່ຂັ້ນສູງບັນດາປະເທດສະມາຊິກອາຊຽນ, ອີນເດຍ, ຍີ່ປຸ່ນ ແລະ ພາກເອກະຊົນທີ່ກ່ຽວຂ້ອງເຖິງພາກພື້ນ. ກອງປະຊຸມໄດ້ສຸມໃສ່ແລກປ່ຽນທັດສະນະກ່ຽວກັບການກໍ່ສ້າງພື້ນຖານໂຄງລ່າງສຳຄັນໃນການເຊື່ອມຕໍ່ອາຊຽນ - ອີນເດຍ, ເຊິ່ງລວມທັງບັນດາໂຄງການກໍ່ສ້າງເສັ້ນທາງຄວາມໄວສູງໄທ - ມຽນມາ - ອີນເດຍ, ແລວເສດຖະກິດແມ່ຂອງ - ອີນເດຍ.
ກ່າວຄຳເຫັນທີ່ກອງປະຊຸມ, ທ່ານເລຂາທິການໃຫຍ່ອາຊຽນ ເລເລືອງມິງ ໄດ້ເນັ້ນໜັກເຖິງຄວາມສຳຄັນຂອງການສຳເລັດ ແລະ ເຄື່ອນໄຫວບັນດາການເຊື່ອມຕໍ່ພື້ນຖານໂຄງລ່າງສຳຄັນລະຫວ່າງອາຊຽນ ແລະ ອີນເດຍ, ສ້າງເງື່ອນໄຂສະດວກໃຫ້ແກ່ການແລກປ່ຽນດ້ານການຄ້າ 2 ຝ່າຍ. ເພື່ອເຮັດໄດ້ຄືແນວນັ້ນ, ຮຽກຮ້ອງໃຫ້ທັງອາຊຽນ ແລະ ອີນເດຍ ຕ້ອງມີວິທີສຳພັດຢ່າງມີຫົວຄິດປະດິດສ້າງກັບບັນດາແຫຼ່ງທຶນ, ສ້າງສະພາບແວດລ້ອມທີ່ສະດວກ, ພ້ອມທັງສ້າງຕັ້ງບັນດາກົນໄກປະຕິບັດ, ຮ່ວມມືຢ່າງມີປະສິດທິຜົນລະດັບຊາດ, ອະນຸພາກພື້ນ ແລະ ພາກພື້ນໃຫ້ໄດ້.