ເວທີປາໄສຮ່າໂນ້ຍ ປີ 2018 ໄດ້ອັດລົງໃນວັນທີ 10 ພະຈິກ ພາຍຫຼັງການປຶກສາຫາລື ມາເປັນເວລາ 02 ວັນ ກ່ຽວກັບບັນດາບັນຫາພັດທະນາແບບຍືນຍົງ, ຮັບມືກັບການປ່ຽນແປງຂອງດິນຟ້າອາກາດ. ຜູ້ແທນເຂົ້າຮ່ວມສ່ວນຫຼາຍ ຖືວ່າ, ບັນດາການແລກປ່ຽນ, ປຶກສາຫາລື ຂອງບັນດານັກຊ່ຽວຊານສາກົນທີ່ເວທີປາໄສ ແມ່ນບົດຮຽນອັນລໍ້າຄ່າ ເພື່ອໃຫ້ຫວຽດນາມຮໍ່າຮຽນຕາມ ແລະ ໝູນໃຊ້ເຂົ້າໃນວິວັດແຫ່ງການຮັບມືກັບ ສິ່ງທ້າທາຍຂອງການປ່ຽນແປງຂອງດິນຟ້າອາກາດ. ເຖິງຢ່າງໃດກໍຕາມ, ສິ່ງສໍາຄັນກວ່າໝູ່ ແມ່ນຫວຽດນາມຕ້ອງໝູນໃຊ້ບັນດາບົດຮຽນເຫຼົ່ານັ້ນຢ່າງມີໄຫວພິບ ແລະ ແທດຈິງ; ນໍາໃຊ້ຫຼັກມູນທົ່ວໂລກ ແຕ່ຕ້ອງແທດເໝາະກັບເງື່ອນໄຂຂອງຫວຽດນາມ ແລະ ແທດເໝາະກັບແຕ່ລະເຂດພາກ.

        ບັນດາບົດລາຍງານໄດ້ນໍາສະເໜີທີ່ເວທີປາໄສນັ້ນ ໄດ້ສະໜອງບັນດາພື້ນຖານໃຫ້ແກ່ບົດລາຍງານຂອງຫວຽດນາມ ທີ່ກອງປະຊຸມ ສະຫະປະຊາຊາດ ກ່ຽວກັບການປ່ຽນແປງຂອງດິນຟ້າອາກາດ ປີ 2018 (COP24) ເຊິ່ງຈະດໍາເນີນຢູ່ ໂປໂລຍ ໃນຕົ້ນເດືອນ 12 ຈະມາເຖິງ. ພ້ອມກັນນັ້ນ, ບັນດາຂໍ້ສະເໜີນະໂຍບາຍ ກ່ຽວກັບການປ່ຽນແປງຂອງດິນຟ້າອາກາດ ເພື່ອມຸ່ງໄປເຖິງການພັດທະນາແບບຍືນຍົງບັນດາເຂດຕົວເມືອງທີ່ຕ້ອງຮັບມືກັບການປ່ຽນແປງຂອງດິນຟ້າອາກາດ, ໄພພິບັດທໍາມະຊາດ ຢູ່ເຂດທົ່ງພຽງແມ່ນໍ້າແດງທາງພາກເໜືອ ແລະ ທົ່ງພຽງແມ່ນໍ້າຂອງທາງພາກໃຕ້ຫວຽດນາມ ຈະປະກອບສ່ວນເຂົ້າໃນການປະຕິບັດມະຕິສູນກາງພັກ ກ່ຽວກັບການຄຸ້ມຄອງຊັບພະຍາກອນ ແລະ ສິ່ງແວດລ້ອມ, ການຮັບມືກັບການປ່ຽນແປງຂອງດິນຟ້າອາກາດ, ຫຼຸດຜ່ອນການເກີດໄພພິບັດທໍາມະຊາດ ແລະ ການພັດທະນາແບບຍືນຍົງ.