(vovworld) - ອາທິດຜ່ານມາ, ພາກພາສາລາວ, ວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີແມວ, ໂທລະສັບຫຼາຍສະບັບຈາກທ່ານຜູ້ຟັງລາວ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ ແລະ ຕອບບາງຄຳຖາມທີ່ທ່ານຜູ້ຟັງຝາກມາລາຍການ.
ໃນອາທິດ, ເພື່ອນ ວິຊາຕີ ພົມປານຢາ, ແຂວງ ວຽງຈັນ; ທ່ານ ເພັດສະຫວັນ, ແຂວງ ອັດຕະປື; ເພື່ອນ ທອນສະໄໝ, ແຂວງ ຄຳມ່ວນ; ເພື່ອນ ນູນ ອິນຄາວິໄລ, ຢູ່ ຮ່າໂນ້ຍ ໄດ້ສົ່ງຂໍ້ຄວາມ, ອີແມວ ອວຍພອນເນື່ອງໃນໂອກາດວັນແມ່ຍິງສາກົນ ເຖິງບັນນາທິການຍິງ ພາກພາສາລາວ ເວົ້າສະເພາະ ແລະ ບັນດາແມ່ຍິງທີ່ເຮັດວຽກຢູ່ວິທະຍຸກະຈາຍສຽງ ຫວຽດນາມ ເວົ້າລວມ, ເນື່ອງໃນໂອກາດວັນແມ່ຍິງສາກົນ (8/3), ອວຍພອນໃຫ້ແມ່ຍິງທຸກຄົນຈົ່ງມີສຸຂະພາບເຂັມແຂງ, ມີຄວາມຜາສຸກ, ບັນລຸຜົນສຳເລັດໃນໜ້າທີ່ການງານຂອງຕົນ.
ທ່ານ ຫງວຽນເທ໋ກີ້
|
ໃນອາທິດ, ເພື່ອນ ພຽນ ພົມມະສອນ, ແຂວງ ຫົວພັນ, ເຊິ່ງແມ່ນຜູ້ຟັງເປັນປະຈຳຂອງພາກພາສາລາວ ໄດ້ຝາກ ອີແມວ ມາຍັງລາຍການດ້ວຍເນື້ອໃນວ່າ: “ຂ້າພະເຈົ້າໄດ້ຟັງຂ່າວກ່ຽວກັບ ເລື່ອງ ວິທະຍຸກະຈາຍສຽງ ຫວຽດນາມ ມີຜູ້ອຳນວຍການໃຫຍ່ຄົນໃໝ່. ຂ້າພະເຈົ້າຢາກຮູ້ຂໍ້ມູນຂ່າວຕື່ມອີກກ່ຽວກັບຜູ້ອຳນວຍການໃຫຍ່ຜູ້ນີ້ແດ່?”
ຂໍຂອບໃຈເພື່ອນ ພຽນ ພົມມະສອນ ທີ່ໄດ້ເອົາໃຈໃສ່ເຖິງວິທະຍຸກະຈາຍສຽງ ຫວຽດນາມ (VOV) ເວົ້າລວມ ແລະ ພາກພາສາລາວ ເວົ້າສະເພາະ. ໃນອາທິດ, ທ່ານນາຍົກລັດຖະມົນຕີ ໄດ້ແຕ່ງຕັ້ງທ່ານ ຫງວຽນເທ໋ກີ້, ກຳມະການສູນກາງພັກ, ຮອງຫົວໜ້າຄະນະໂຄສະນາສຶກສາສູນກາງ ດຳລົງຕຳແໜ່ງ ເປັນຜູ້ອຳນວຍການໃຫຍ່ VOV (ແທນໃຫ້ທ່ານ ຫງວຽນດັງຕ໋ຽນ). ທ່ານຮອງສາດສະດາຈານ - ດຣ ຫງວຽນເທ໋ກີ້, ເກີດປີ 1960, ຢູ່ແຂວງ ເງະອານ. ທ່ານ ຫງວຽນເທ໋ກີ້ ເຄີຍດຳລົງຕຳແໜ່ງຕ່າງໆຄື: ຜູ້ອຳນວຍການສະຖານີວິທະຍຸກະຈາຍສຽງ - ໂທລະພາບແຂວງ ເງະອານ, ບັນນາທິການໃຫຍ່ໜັງສືພິມ ເງະອານ, ຮອງຫົວໜ້າຄະນະໂຄສະນາສຶກສາຄະນະພັກແຂວງ ເງະອານ, ເລຂາຄະນະພັກເມືອງ ນາມດ່ານ, ແຂວງ ເງະອານ, ຫົວໜ້າກົມສື່ມວນຊົນພິມຈຳໜ່າຍ ຂຶ້ນກັບຄະນະໂຄສະນາສຶກສາສູນກາງ, ຮອງຫົວໜ້າຄະນະໂຄສະນາສຶກສາສູນກາງ. ທີ່ກອງປະຊຸມໃຫຍ່ຄັ້ງທີ 12 ຂອງພັກຜ່ານມາ, ທ່ານ ຫງວຽນເທ໋ກີ້ ໄດ້ຮັບເລືອກຕັ້ງເປັນກຳມະການຄະນະບໍລິຫານງານສູນກາງພັກຊຸດທີ 12.
|
ເພື່ອນ ຈັນທະນາຊີ, ນະຄອນຫຼວງ ວຽງຈັນ, ໄດ້ຝາກ ອີແມວມາຍັງລາຍການ, ໂດຍຖາມວ່າ: “ເມື່ອຟັງຂ່າວບົດທາງວິທະຍຸ, ຂ້າພະເຈົ້າໄດ້ຮູ້ກ່ຽວກັບສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ ຫວຽດນາມ. ແຕ່ຂ້າພະເຈົ້າຢາກຮູ້ແຈ້ງກ່ວາກ່ຽວກັບສະມາຄົມນີ້, ຫວັງວ່າລາຍການຈະສະໜອງຂໍ້ມູນຂ່າວໃຫ້ຂ້າພະເຈົ້າແດ່ເດີ. ຂໍຂອບໃຈ”
ເພື່ອນ ຈັນທະນາຊີ ທີ່ຮັກແພງ, ວັນທີ 10/01/2004, ສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ ຫວຽດນາມ (Vietnam Association for Victims of Agent Orange/dioxin – VAVA) ໄດ້ຮັບການສ້າງຕັ້ງ ເພື່ອແນໃສ່ຊ່ວຍເຫຼືອ, ປົກປ້ອງສິດຜົນປະໂຫຍດໃຫ້ແກ່ບັນດາຜູ້ປະສົບເຄາະຮ້າຍຈາກທາດພິດສີສົ້ມ, ປະກອບສ່ວນແກ້ໄຂຜົນຮ້າຍຢ້ອນຫຼັງຈາກທາດພິດເຄມີໂດຍ ອາເມລິກາ ນຳໃຊ້ໃນສົງຄາມຢູ່ ຫວຽດນາມ ແລະ ຕາງໜ້າໃຫ້ບັນດາຜູ້ປະສົບເຄາະຮ້າຍຈາກທາດພິດສີສົ້ມຢູ່ ຫວຽດນາມ ໃນການພົວພັນກັບບັນດາອົງການ, ຫົວໜ່ວຍທັງພາຍໃນ ແລະ ຕ່າງປະເທດ. ໜຶ່ງໃນບັນດາວຽກງານທຳອິດຂອງສະມາຄົມນັ້ນແມ່ນ ສ້າງໂຄງການ “ຊ່ວຍເຫຼືອບັນດາຜູ້ປະສົບເຄາະຮ້າຍຈາກທາດພິດສີສົ້ມໃນຊີວິດການເປັນຢູ່”, ພ້ອມທັງ “ຈັດຕັ້ງການເກັບກຳສຳເນົາເອກະສານ, ຫຼັກຖານເພື່ອດຳເນີນການຮ້ອງຟ້ອງພົນລະເຮືອນ ບັນດາບໍລິສັດຂອງ ອາເມລິກາ ທີ່ໄດ້ຜະລິດທາດພິດສີສົ້ມ ເພື່ອກອງທັບ ອາເມລິກາ ນຳໃຊ້ໃນສົງຄາມຢູ່ ຫວຽດນາມ”. ສູນກາງສະມາຄົມກໍມີການກຳນົດທິດພັດທະນາເປີດກ້ວາງ, ສ້າງຕັ້ງສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ ດີໂອຊີນ ທ້ອງຖິ່ນ ເຖິງ 63 ແຂວງ, ນະຄອນໃນທົ່ວປະເທດ. ຮອດຈຸດເວລານີ້, ມີ 58 ແຂວງ, ນະຄອນໃນທົ່ວປະເທດໄດ້ສ້າງຕັ້ງສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊີນ. ວັນທີ 10/8 ປະຈຳປີໄດ້ເລືອກເຟັ້ນເປັນ “ວັນເພື່ອຜູ້ປະສົບເຄາະຮ້າຍຈາກທາດພິດສີສົ້ມ”.
ທ່ານຜູ້ຟັງທີ່ເຄົາລົບ, ດັ່ງທີ່ກ່າວມາຂ້າງເຖິງແມ່ນເນື້ອໃນຄຳເຫັນຂອງທ່ານຜູ້ຟັງບາງທ່ານ ທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຝັງຈະສືບຕໍ່ຝາກຈົດໝາຍ, ອີແມວ ຫຼື ໂທລະສັບມາຫາລາຍການເພື່ອປະກອບຄຳເຫັນຊ່ວຍລາຍການຂອງພວກເຮົາໃຫ້ນັບ ມືມັບດີກວ່າເກົ່າ. ພວກເພື່ອນສາມາດຝາກຈົດໝາຍມາຍັງລາຍການໂດຍຈ່າລະຊ່ອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ laovov5@gmail.com.