ພາຍຫຼັງເຮັດວຽກມາເປັນກວ່າ 1 ອາທິດ, ຕອນບ່າຍວັນທີ 29/7, ກອງປະຊຸມສະໄໝສາມັນຄັ້ງປະຖົມມະເລີກ ສະພາແຫ່ງຊາດຫວຽດນາມຊຸດທີ 14 ໄດ້ອັດລົງຢູ່ຮ່າໂນ້ຍ. ໂດຍແມ່ນກອງປະຊຸມຄັ້ງທຳອິດຂອງສະພາແຫ່ງຊາດອາຍຸການ 5 ປີ 2016-2021, ກອງປະຊຸມສະໄໝສາມັນຄັ້ງປະຖົມມະເລີກໄດ້ເຮັດສຳເລັດຫຼາຍໜ້າທີ່ສຳຄັນພິເສດ, ບໍ່ພຽງແຕ່ສ້າງປະຖົມປັດໄຈໃຫ້ແກ່ການເຄື່ອນໄຫວຂອງສະພາແຫ່ງຊາດໃນທັງອາຍຸການເທົ່ານັ້ນ, ຫາກຍັງປະກອບສ່ວນບູລະນະກົງຈັກແຫ່ງລັດດ້ວຍບັນດາຕຳແໜ່ງໄດ້ຮັບການເລືອກຕັ້ງໃຫ້ສັດຕະຍາບັນ, ໃນນັ້ນ, ມີປະທານສະພາແຫ່ງຊາດ, ປະທານປະເທດ, ນາຍົກລັດຖະມົນຕີ.
ສະພາແຫ່ງຊາດໄດ້ເລືອກຕັ້ງ, ໃຫ້ສັດຕະຍາບັນຕຳແໜ່ງສຳຄັນຂອງປະເທດຊາດ |
ກອງປະຊຸມສະໄໝສາມັນຄັ້ງປະຖົມມະເລີກ ສະພາແຫ່ງຊາດຫວຽດນາມຊຸດທີ 14 ຖືກດຳເນີນເປັນເວລາ 9 ວັນ, ດ້ວຍຈຸດສຸມແມ່ນພິຈາລະນາ, ຕັດສິນຕໍ່ການຈັດຕັ້ງ, ບຸກຄະລາກອນຂັ້ນສູງຂອງລັດ ໃຫ້ຖືກຕາມທຳນຽມບັນດາກອງປະຊຸມຄັ້ງທຳອິດຂອງອາຍຸການສະພາແຫ່ງຊາດ. ແຕ່ໃນກອງປະຊຸມຄັ້ງນີ້, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ກໍສະເໜີວ່າ ບໍ່ຍ້ອນ
ວຽກງານບຸກຄະລາກອນຈຶ່ງແກ້ໄຂບັນດາບັນຫາໃນການດຳລົງຊີວິດຢ່າງຊັກຊ້າ, ດັ່ງນັ້ນ, ສະພາແຫ່ງຊາດກໍໄດ້ດຳເນີນວຽກງານນິຕິບັນຍັດ, ປຶກສາຫາລືບົດລາຍງານຂອງລັດຖະບານກ່ຽວກັບສະພາບການປະຕິບັດແຜນພັດທະນາເສດຖະກິດ-ສັງຄົມ ແລະ ງົບປະມານແຫ່ງລັດ ໂດຍຜ່ານການຕິດຕາມກວດກາຕາມຫົວເລື່ອງ.
ບູລະນະບຸກຄະລາກອນ ສ້າງກຳລັງແຮງສັງລວມໃຫ້ທັງລະບົບການເມືອງ
ບູລະນະບຸກຄະລາກອນແມ່ນໜ້າທີ່ຈຸດສຸມທີ່ ກອງປະຊຸມສະໄໝສາມັນຄັ້ງນີ້ ຂະນະທີ່ໄດ້ກວມເຖິງ 2/3 ເວລາດຳເນີນກອງປະຊຸມ. ບົນພື້ນຖານຊາບຊຶມ ແລະ ປະຕິບັດທິດທາງວຽກງານພະນັກງານໂດຍກອງປະຊຸມໃຫຍ່ທົ່ວປະເທດຄັ້ງທີ 12 ຂອງພັກໄດ້ວາງອອກ, ໂດຍອີງໃສ່ສະພາບຕົວຈິງຂອງຖັນແຖວພະນັກງານທີ່ພວມມີຢູ່ແລ້ວ ແລະ ຄວາມຮຽກຮ້ອງທາງດ້ານໂຄງປະກອບການຈັດຕັ້ງ, ບຸກຄະລາກອນຂອງ ສະພາແຫ່ງຊາດ, ປະທານປະເທດ, ລັດຖະບານ, ບັນດາສະມາຊິກລັດຖະບານ, ບັນດາອົງການຕຸລາການ, ອົງການກວດສອບແຫ່ງລັດອາຍຸການທີ 14, ບັນດາສະມາຊິກສະພາແຫ່ງຊາດໄດ້ປຶກສາຫາລືຢ່າງມີປະຊາທິປະໄຕ, ເລືອກເຟັ້ນ ແລະ ເລືອກຕັ້ງ, ໃຫ້ສັດຕະຍາບັນບັນດາຜູ້ທີ່ສົມກັບບັນດາຕຳແໜ່ງນຳພາທີ່ຫຼັກແຫຼ່ງຂອງບັນດາອົງການນິຕິບັນຍັດ, ບໍລິຫານ, ຕຸລາການ, ຮັບປະກັນການນຳພາຢ່າງຮອບດ້ານຂອງພັກ, ການຄຸ້ມຄອງຢ່າງມີປະສິດທິພາບ, ປະສິດທິຜົນຂອງລັດ, ສ້າງກຳລັງແຮງສັງລວມຂອງທັງລະບົບການເມືອງ.
ສະພາແຫ່ງຊາດໄດ້ເລືອກຕັ້ງ, ໃຫ້ສັດຕະຍາບັນຕຳແໜ່ງປະທານ ສະພາແຫ່ງຊາດ, ຮອງປະທານ ສະພາແຫ່ງຊາດ ແລະ ບັນດາກຳມະການຄະນະປະຈຳ ສະພາແຫ່ງຊາດ, ປະທານສະພາຊົນເຜົ່າ, ປະທານບັນດາກຳມາທິການຂອງ ສະພາແຫ່ງຊາດ. ສະພາແຫ່ງຊາດເລືອກຕັ້ງ ປະທານປະເທດ, ຮອງປະທານປະເທດ, ນາຍົກລັດຖະມົນຕີ , ປະທານສານປະຊາຊົນສູງສຸດ, ຫົວໜ້າອົງການໄອຍະການປະຊາຊົນສູງສຸດ, ຫົວໜ້າອົງການກວດສອບແຫ່ງລັດ. ພາຍຫຼັງທີ່ໄດ້ຕົກລົງໂຄງປະກອບການຈັດຕັ້ງ, ຈຳນວນສະມາຊິກລັດຖະບານ, ສະພາແຫ່ງຊາດໄດ້ໃຫ້ສັດຕະຍາບັນການແຕ່ງຕັ້ງ 26 ສະມາຊິກລັດຖະບານຊຶ່ງລວມມີ ບັນດາຮອງນາຍົກລັດຖະມົນຕີ, ລັດຖະມົນຕີ ແລະ ບັນດາສະມາຊິກອື່ນໆຂອງລັດຖະບານ, ໃຫ້ສັດຕະຍາບັນບັນຊີລາຍຊື່ບັນດາສະມາຊິກສະພາປ້ອງກັນຊາດ ປ້ອງກັນຄວາມສະຫງົບ.
ອັດຕາສ່ວນບັດເຫັນດີຂອງ ສະພາແຫ່ງຊາດສຳລັບບັນດາຕຳແໜ່ງການນຳ ລ້ວນແຕ່ຢູ່ໃນລະດັບສູງ. ສິ່ງນີ້ ທັງແມ່ນຄວາມເຊື່ອໝັ້ນ, ທັງແມ່ນຄວາມໄວ້ວາງໃຈຂອງຜູ້ມີສິດເລືອກຕັ້ງສຳລັບບັນດາຜູ້ໄດ້ຮັບການເລືອກເຟັ້ນໃຫ້ແບກຫາບໜ້າທີ່ນຳພາປະເທດຊາດ. ທ່ານ ເຈີນວັນຣ້ອນ ສະມາຊິກສະພາແຫ່ງຊາດ ແຂວງ ວິ້ງລອງ ຖືວ່າ :
“ ພວກຂ້າພະເຈົ້າມີຄວາມໝັ້ນໃຈກ່ຽວກັບວຽກງານບຸກຄະລາກອນ ເພາະໄດ້ຮັບການເລືອກຕັ້ງດ້ວຍອັດຕາສ່ວນບັດເຫັນດີຢ່າງສູງ. ສິ່ງນີ້ໄດ້ພິສູດໃຫ້ເຫັນຄວາມໄວ້ເນື້ອເຊື່ອໃຈນັບທັງໃນວິວັດການຕົວຈິງນັບແຕ່ສິ້ນສຸດ ສະພາແຫ່ງຊາດຊຸດທີ 13 ຈົນເຖິງຈຸດເວລາເລີ່ມຕົ້ນອາຍຸການຂອງ ສະພາແຫ່ງຊາດຊຸດທີ 14. ບັນດາຜູ້ໄດ້ຮັບການເລືອກຕັ້ງ, ໄດ້ນຳພາຢ່າງຂະຫຍັນຂັ່ນເຄື່ອນ, ມີຫົວຄິດປະດິດສ້າງ, ເລັ່ງໃສ່ແກ້ໄຂບັນດາບັນຫາຢ່າງຂ້ຽວຂາດ ແລະ ດ້ວຍຄວາມຕັດສິນໃຈຢ່າງສູງ. ສິ່ງດັ່ງກ່າວໄດ້ພາໃຫ້ເທດຊາດພັດທະນາດີກ່ວາ ”
ສ່ວນທ່ານ ຫງວຽນກວາງຕ້ວນ ສະມາຊິກສະພາແຫ່ງຊາດ ນະຄອນຮ່າໂນ້ຍ ໃຫ້ຮູ່ວ່າ :
“ ບຸກຄະລາກອນຂອງຍຸກໃໝ່ ແມ່ນຮຽກຮ້ອງໃຫ້ມີລະດັບສູງກວ່າຫຼາຍເມື່ອທຽບໃສ່ກ່ອນນີ້. ນັ້ນແມ່ນບັນດາຜູ້ທີ່ມີລະດົບຕົວຈິງ, ກ້າຄິດກ້າເຮັດ ແລະ ມີຄວາມເຂົ້າໃຈກ້ວາງຂວາງ ບໍ່ພຽງແຕ່ໃນທຸກຂົງເຂດຂອງປະເທດຊາດເທົ່ານັ້ນ, ຫາກຍັງເຂົ້າໃຈບັນຫາສາກົນອີກດ້ວຍ, ເພື່ອເຮັດແນວໃດໃຫ້ພວກເຮົາເຊື່ອມໂຍງໄດ້ເປັນຢ່າງດີ. ນັ້ນແມ່ນຄວາມຄອງຄອຍ, ຄວາມຕ້ອງການຂອງປະຊາຊົນ ”
ຮັບຮອງເອົາໂຄງການສ້າງກົດໝາຍ, ເພີ່ມທະວີການຕິດຕາມກວດກາຕາມຫົວເລື່ອງ
ທີ່ກອງປະຊຸມສະໄໝສາມັນຄັ້ງປະຖົມມະເລີກ ສະພາແຫ່ງຊາດຫວຽດນາມຊຸດທີ 14, ບັນດາ ສະມາຊິກສະພາແຫ່ງຊາດຍັງພິຈາລະນາ, ຮັບຮອງເອົາບັນດາມະຕິຂອງ ສະພາແຫ່ງຊາດກ່ຽວກັບໂຄງການສ້າງກົດໝາຍ, ລັດຖະບັນຍັດປີ 2017 ແລະ ປັບປຸງ ໂຄງການສ້າງກົດໝາຍ, ລັດຖະບັນຍັດປີ 2016, ໂຄງການເຄື່ອນໄຫວຕິດຕາມກວດກາຂອງສະພາແຫ່ງຊາດປີ 2017 ແລະ ການສ້າງຕັ້ງຄະນະຕິດຕາມກວດກາຕາມຫົວເລື່ອງ.
ກອງປະຊຸມສະໄໝສາມັນຄັ້ງປະຖົມມະເລີກ ສະພາແຫ່ງຊາດຫວຽດນາມຊຸດທີ 14ໄດ້ອັດລົງແລ້ວ. ບັນດາເນື້ອໃນທີ່ສຳຄັນຊຶ່ງໄດ້ຮັບການຮັບຮອງເອົາທີ່ກອງປະຊຸມຄັ້ງນີ້ ໄດ້ປະກອບສ່ວນສຳຄັນເຂົ້າໃນການບູລະນະກົງຈັກແຫ່ງລັດ ກໍຄືປະກອບສ່ວນບໍ່ໜ້ອຍໃຫ້ແກ່ການພັດທະນາຂອງປະເທດຊາດໃນໄລຍະທີ່ຈະມາເຖິງ.