ປີ 2014, ຫວຽດນາມ ສືບຕໍ່ຜັນຂະຫຍາຍແນວທາງການຕ່າງປະເທດຂອງກອງປະຊຸມໃຫຍ່ຄັ້ງທີ 11 ຂອງພັກກອມມູນິດ ຫວຽດນາມ, ສືບຕໍ່ເຊື່ອມໂຍງເຂົ້າກັບສາກົນຢ່າງຮອບດ້ານ. ບໍ່ພຽງແຕ່ປະກອບສ່ວນໂຄສະນາເຜີຍແຜ່ພາບພົດປະເທດຊາດ, ຊາວ ຫວຽດນາມ, ມູນເຊື້ອປະຫວັດສາດ ແລະ ວັດທະນະທຳ ຫວຽດນາມຢ່າງຕັ້ງໜ້າ, ເຮັດໃຫ້ເພື່ອນມິດສາກົນເຂົ້າໃຈຢ່າງຖືກຕ້ອງແນວທາງ, ແຜນນະໂຍບາຍ, ນະໂຍບາຍຂອງຫວຽດນາມ, ຍາດແຍ່ງຄວາມເຫັນດີເຫັນພ້ອມ, ການສະໜັບສະໜູນ ແລະ ການຊ່ວຍເຫຼືອຕໍ່ພາລະກິດປ່ຽນໃໝ່ຂອງຫວຽດນາມ, ສ້າງສະພາບແວດລ້ອມແຫ່ງສັນຕິພາບ, ສະຖຽນລະພາບເພື່ອກໍ່ສ້າງ ແລະ ພັດທະນາປະເທດຊາດ, ວຽກງານການຕ່າງປະເທດປີ 2014 ຍັງສະແດງພາບພົດ ປະເທດ ຫວຽດນາມ ສວມບົດບາດສຳຄັນກ່ວາໃນບັນດາບັນຫາທົ່ວໂລກ.
ນຳບັນດາຂອບເຂດການພົວພັນກ້າວເຂົ້າສູ່ປະສິດທິຜົນ
ດ້ວຍການພົວພັນຄູ່ຮ່ວມມືຍຸດທະສາດກັບ 13 ປະເທດ ແລະ ການພົວພັນຄູ່ຮ່ວມມືຮອບດ້ານກັບ 11 ປະເທດເຊິ່ງ ຫວຽດນາມ ໄດ້ສ້າງຂອບເຂດການພົວພັນໃນປີ 2013, ບຸລິມະສິດຕົ້ນຕໍ່ຂອງການເຄື່ອນໄຫວການຕ່າງປະເທດປີ 2014 ແມ່ນສືບຕໍ່ເຮັດໃຫ້ບັນດາການພົວພັນຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານ ເຫຼົ່ານັ້ນນຳມາເຊິ່ງປະສິດທິຜົນ, ຜົນປະໂຫຍດຢ່າງແທດຈິງ. ພ້ອມກັນນັ້ນແມ່ນເພີ່ມທະວີຊຸກຍູ້ການພົວພັນກັບບັນດາປະເທດເພື່ອນມິດທີ່ເປັນມູນເຊື້ອ, ບັນດາປະເທດຢູ່ພາກພື້ນຕ່າງທໃນໂລກ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ຟ້າມບິ່ງມິງ ຖືວ່າ:
“ປີ 2013, ພວກເຮົາສຸມໃສ່ເຂົ້າໃນການພົວພັນກັບບັນດາປະເທດໃຫຍ່, ປະເທດທີ່ເປັນເປົ້າໝາຍສຳຄັນ, ປີ 2014, ດ້ານໜຶ່ງພວກເຮົາສືບຕໍ່ຊຸກຍູ້ການພົວພັນກ້າວເຂົ້າສູ່ແທດຈິງ, ມີປະສິດທິຜົນຢ່າງລະອຽດ, ພ້ອມທັງພວກເຮົາຍັງຄົງສືບຕໍ່ເປີດກ້ວາງບັນດາການພົວພັນກັບປະເທດຕ່າງໆ. ນອກຈາກນັ້ນ, ການເຄື່ອນໄຫວການທູດເສດຖະກິດ, ການທູດວັດທະນະທຳ ແລະ ວຽກງານປ້ອງກັນພົນລະເມືອງກໍ່ແມ່ນໜ້າທີ່ເຊິ່ງການເຄື່ອນໄຫວການຕ່າງປະເທດສຸມໃສ່”
ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ຟ້າມບິ່ງມິງ (ກາງ) ເຂົ້າຮ່ວມກອງປະຊຸມລັດຖະມົນຕີການຕ່າງປະເທດອາຊຽນ ຄັ້ງທີ 46
ດຶງດູດແຫຼ່ງທຶນ,ຊຸກຍູ້ການເຈລະຈາບັນດາສັນຍາການຄ້າເສລີ
ໄປຄຽງຄູ່ກັບການສ້າງລະບອບບັນຍັດ, ພະລັງງານ ແລະ ພື້ນຖານໂຄງລ່າງ, ບັນດາການເຄື່ອນໄຫວການທູດເສດຖະກິດປີ 2014 ສຸມໃສ່ດຶງດູດແຫຼ່ງເງິນລົງທຶນ, ຕອບສະໜອງຄຳຮຽກຮ້ອງຕ້ອງການພັດທະນາເສດຖະກິດ - ສັງຄົມຂອງປະເທດຊາດ ດ້ວຍຈຸດໝາຍເຕີບໂຕໂດຍອີງໃສ່ການພັດທະນາແບບຍືນຍົງ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ຟ້າມບິ່ງມິງ ໃຫ້ຮູ້ອີກວ່າ:
“ເວລາຜ່ານມາ, ກອງປະຊຸມການທູດຄັ້ງທີ 28 ຫາກໍ່ໄດ້ຮັບການຈັດຕັ້ງຂຶ້ນ, ໜຶ່ງໃນບັນດາເນື້ອໃນຈຸດສຸມເຊິ່ງກອງປະຊຸມໄດ້ວາງອອກໃຫ້ບັນດາເອກອັກຄະລັດຖະທູດ, ຫົວໜ້າສຳນັກງານອົງການຕາງໜ້າຢູ່ຕ່າງປະເທດນັ້ນແມ່ນ ເຮັດແນວໃດເພື່ອສຸມໃສ່ເຂົ້າໃນບັນດາປະເທດ, ບັນດາຄູ່ຮ່ວມມືສຳຄັນເພື່ອດຶງດູດເງິນລົງທຶນ, ດຶງດູດແຫຼ່ງທຶນໜູນຊ່ວຍພັດທະນາ ODA ເຂົ້າໃນບັນດາຂົງເຂດເຊິ່ງ ຫວຽດນາມ ມີຄວາມຕ້ອງການ”
ປະຈຸບັນ, ຫວຽດນາມ ພວມເຂົ້າຮ່ວມການເຈລະຈາສັນຍາການຄ້າເສລີ (FTA) 6 ສະບັບ. ສະເພາະໃນປີ 2014, ຕ້ອງປະຕິບັດສຳເລັດການເຈລະຈາສັນຍາຮ່ວມມືເສດຖະກິດຂ້າມປາຊີຟິກ (TPP) ແລະ ສັນຍາການຄ້າເສລີກັບສະຫະພາບ ເອີລົບ (EU). ນີ້ແມ່ນກາລະໂອກາດ ພ້ອມທັງກໍ່ແມ່ນສິ່ງທ້າທາຍສຳລັບບັນດາວິສາຫະກິດ ຫວຽດນາມ. ພິເສດໃນສະພາບການທີ່ຍັງເຫຼືອມີພຽງບໍ່ຮອດ 2 ປີອີກ, ອາຊຽນ ຈະກາຍເປັນປະຊາຄົມລວມ ເຊິ່ງບັນຫາວາງອອກແມ່ນຕ້ອງເພີ່ມທະວີຂໍ້ມູນຂ່າວສານ, ເພີ່ມທະວີການໂຄສະນາກ່ຽວກັບປະຊາຄົມ ອາຊຽນ, ບັນດາຜົນປະໂຫຍດເມື່ອປະຊາຊົນ, ວິສາຫະກິດບັນລຸມາເມື່ອໄດ້ເຂົ້າຮ່ວມການເຄື່ອນໄຫວໃນປະຊາຄົມອາຊຽນ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ຟ້າມບິ່ງມິງ ໃຫ້ຮູ້ຕື່ມອີກວ່າ:
“ປີ 2014 ແລະ ປີ 2015 ແມ່ນປີບານພັບໃນເລື່ອງພວກເຮົາຕ້ອງປະຕິບັດທຸກໆຄຳໝັ້ນສັນຍາເພື່ອໃຫ້ ອາຊຽນ ກາຍເປັນປະຊາຄົມໃນປີ 2015. ມາຮອດປະຈຸບັນ, ຫວຽດນາມ ໄດ້ປະຕິບັດສຳເລັດປະມານ 84% ແຕ່ບັນຫາພື້ນຖານແມ່ນ: ບັນດາຄຳໝັ້ນສັນຍານັ້ນແມ່ນຫຍັງ? ປະຊາຊົນ ແລະ ວິສາຫະກິດບໍ່ທັນຮູ້ຈັກເທື່ອ. ວິສາຫະກິດບໍ່ທັນເຫັນໄດ້ຜົນປະໂຫຍດຂອງຕະຫຼາດທີ່ມີປະຊາກອນ 500 ລ້ານຄົນ ດ້ວຍສະພາບແວດລ້ອມການຜະລິດລວມນັ້ນແມ່ນບັນດາປັດໄຈເຊິ່ງລັດຖະບານຫຼື ບັນດາກະຊວງ, ຂະແໜງການການຕ່າງປະເທດມີຄວາມຮັບຜິດຊອບຖະແຫຼງຂ່າວ, ໂຄສະນາໃຫ້ປະຊາຊົນ ແລະ ວິສາຫະກິດ”
ປົກປັກຮັກສາອະທິປະໄຕຜືນແຜ່ນດິນ,ຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບເພື່ອພັດທະນາ
ໂດຍເສີມຂະຫຍາຍຜົນງານການຕ່າງປະເທດປີ 2013, ການທູດ ຫວຽດນາມ ສືບຕໍ່ແກ້ໄຂບັນດາບັນຫາກ່ຽວຂ້ອງເຖິງອະທິປະໄຕທະເລ, ໝູ່ເກາະຢ່າງມີໄຫວພິບ, ທັງຕໍ່ສູ້ປົກປັກຮັກສາອະທິປະໄຕຜືນແຜ່ນດິນ, ທັງຮັກສາສະພາບແວດລ້ອມສັນຕິພາບ, ສະຖຽນລະພາບໃຫ້ແກ່ພາລະກິດພັດທະນາປະເທດຊາດ. ປີ 2014, ຄວາມປາດຖະໜາຂອງບັນດາປະເທດ ອາຊຽນ ແລະ ກໍ່ແມ່ນຄວາມປາດຖະໜາຂອງ ຫວຽດນາມ ແມ່ນລົງນາມໃນປະມວນກົດລະບຽບຂອງຝ່າຍຕ່າງໆຢູ່ທະເລຕາເວັນອອກ (COC) ກັບ ຈີນ ໂດຍໄວ. ປີ 2014 ກໍ່ແມ່ນປີທຳອິດ ຫວຽດນາມ ຮັບຜິດຊອບບັນດາຕຳແໜ່ງສຳຄັນໃນກົນໄກຮ່ວມມືຫຼາຍຝ່າຍຄືກາຍເປັນສະມາຊິກສະພາສິດທິມະນຸດ ສປຊ, ສະພາຜູ້ວ່າການອົງການພະລັງງານປະລະມານູສາກົນ (IAEA), ສະມາຊິກຄະນະກຳມະການມໍລະດົກໂລກຂອງ UNESCO ແລະ ກະກຽມໃຫ້ເຫດການເປັນເຈົ້າພາບຈັດຕັ້ງຂອງປະຊຸມສະມັດຊາໃຫຍ່ລັດຖະສະພາໂລກ IPU ຄັ້ງທີ 132 ໃນປີ 2015.
ບົດພື້ນຖານຂອງບັນດາຜົນງານດ້ານການຕ່າງປະເທດ, ປີ 2014, ຫວຽດນາມ ສືບຕໍ່ປະຕິບັດແຜນນະໂຍບາຍເຊື່ອມໂຍງຮອບດ້ານ. ບໍ່ພຽງແຕ່ເປີດກ້ວາງການພົວພັນກັບທຸກໆປະເທດເທົ່ານັ້ນ ຫວຽດນາມ ຍັງແມ່ນສະມາຊິກມີຄວາມຮັບຜິດຊອບຂອງປະຊາຄົມໂລກ ອີກດ້ວຍ, ບໍ່ພຽງແຕ່ເຂົ້າຮ່ວມວຽກງານກ່ຽວຂ້ອງເຖິງຜົນປະໂຫຍດສະເພາະຂອງຕົນເທົ່ານັ້ນ ຫາກຍັງເຂົ້າຮ່ວມບັນດາບັນຫາອື່ນໆຂອງໂລກອີກດ້ວຍ. ປີ 2014, ແມ່ນປີບານພັບສຳຄັນທີ່ສຸດ, ເຊິ່ງໝາຍໝັ້ນຈະສ້າງບາດລ້ຽວເພື່ອໃຫ້ ຫວຽດນາມ ຫັນໄປສູ່ໄລຍະພັດທະນາໃໝ່.