(vovworld) ນາຍົກລັດຖະມົນຕີ ຫງວຽນຊວນຟຸກ ຫາກໍມີການໂອ້ລົມສົນທະນາໂດຍກົງທາງເຄືອຂ່າຍອິນເຕີແນດກັບບັນດານັກທຸລະກິດຂຶ້ນກັບບັນດາພາກສ່ວນເສດຖະກິດ ແລະ ພົບປະໂດຍກົງກັບກຳມະກອນ 8 ແຂວງ, ນະຄອນ ເຂດເສດຖະກິດຈຸດສຸມທາງພາກໃຕ້. ສານຂອງນາຍົກລັດຖະມົນຕີ ທີ່ບັນດາການພົບປະນີ້ແມ່ນຖືວິສາຫະກິດເປັນສຳຄັນ, ເຄົາລົບກຳມະກອນ, ສ້າງເງື່ອນໄຂສະດວກທີ່ສຸດເພື່ອໃຫ້ວິສາຫະກິດພັດທະນາ, ປັບປຸງ ແລະ ຍົກສູງຊີວິດການເປັນຢູ່ໃຫ້ຄົນງານເພື່ອເຊື່ອມໂຍງເຂົ້າກັບສາກົນຢ່າງໝັ້ນຄົງກວ່າ.
ທ່ານນາຍົກລັດຖະມົນຕີຫງວຽນຊວນຟຸກໂອ້ລົມກັບກຳມະກອນ
ພາບ:TTXVN
|
ທ່ານນາຍົກລັດຖະມົນຕີຫງວຽນຊວນຟຸກ ໄດ້ມີການເຄື່ອນໄຫວເລີ່ມຕົ້ນທີ່ສຳຄັນເມື່ອເລີ່ມຮັບດຳລົງຕຳແຫນ່ງເປັນນາຍົກລັດຖະມົນຕີ, ນັ້ນແມ່ນ ຈັດຕັ້ງການພົບປະກັບ ນັກທຸລະກິດພາຍໃນ ແລະ ຕ່າງປະເທດ 1000 ຄົນ ຢູ່ ນະຄອນໂຮ່ຈິມີນ ໃນວັນທີ 29/4 ເພື່ອຮັບຟັງບັນດາຄຳສະເຫນີແນະຂອງເຂົາເຈົ້າ ດ້ວຍຈິດໃຈກົງໄປກົງມາ, ເປີດອົກເປີດໃຈ ແລະ ຕັ້ງໃຈຮັບເອົາຄຳເຫັນປະກອບ. ພ້ອມກັນນັ້ນ, ທ່ານນາຍົກລັດຖະມົນຕີຫງວຽນຊວນຟຸກ ກໍໄດ້ພົບປະກັບຄົນງາມ 3000 ຄົນ ຢູ່ ແຂວງ ດົງນາຍ ໃນວັນທີ 30/4 ເພື່ອຊອກຮູ້ຄວາມມຸ້ງມາດປາດຖະຫນາອັນຊອບທຳຂອງຊົນຊັ້ນກຳມະກອນ.
ການຊີ້ນຳຢ່າງຂ້ຽວຂາດ
ທ່ານນາຍົກລັດຖະມົນຕີຫງວຽນຊວນຟຸກ ສະແດງໃຫ້ເຫັນຄວາມຂ້ຽວຂາດໃນການກະທຳເພື່ອສ້າງເງື່ອນໄຂສະດວກທີ່ສຸດໃຫ້ແກ່ບັນດາວິສາຫະກິດເຄື່ອນໄຫວດຳເນີນທຸລະກິດໃນສະພາບປະຈຸບັນ. ທ່ານນາຍົກລັດຖະມົນຕີຫງວຽນຊວນຟຸກ ຊີ້ແຈ້ງວ່າ:
“ໝາກຜົນຂອງກອງປະຊຸມຕ້ອງສ້າງຄວາມໄວ້ເນື້ອເຊື່ອໃຈໃຫ້ແກ່ວິສາຫະກິດເຂົ້າໃນລະບົບອົງການແຫ່ງລັດ, ສ້າງຄວາມໄວ້ເນື້ອເຊື່ອໃຈໃນສັງຄົມ, ຄວາມໄວ້ເນື້ອເຊື່ອໃຈຕໍ່ຕະຫລາດໃຫມ່, ຄວາມໄວ້ເນື້ອເຊື່ອໃຈຕໍ່ລະບອບອັນດີງາມເພື່ອໃຫ້ທຸກຄົນຫ້າວຫັນເຂົ້າຮ່ວມການຜະລິດດຳເນີນທຸລະກິດເປັນຢ່າງດີກວ່າ, ວ່ອງໄວກວ່າ, ຫລາຍກວ່າ, ເຊື່ອມໂຍງເຂົ້າກັບສາກົນຢ່າງໝັ້ນຄົງກວ່າ.”
ມີຫລາຍບັນຫາລະອຽດຊື່ງວິສາຫະກິດສະເຫນີແນະທີ່ກ່ຽວຂ້ອງເຖິງການປັບປຸງນະໂຍບາຍ, ກົດໝາຍຄື: ຍຸດທະສາດແຫ່ງຊາດກ່ຽວກັບຂະແຫນງຂາຍຍ່ອຍຫວຽດນາມ; ຄວາມສະເຫມີພາບລະຫວ່າງບັນດາວິສຫາກິດ, ຍູ້ແຮງການປະຕິຮູບລະບຽບການບໍລິຫານ, ບຳລຸງສ້າງແຫລ່ງຊັບພະຍາກອນມະນຸດ, ບັນດາບັນຫາຫຍຸ້ງຍາກຂອງຕະຫລາດອະສັງຫາລິມະຊັບ.. ໂດຍ ທ່ານນາຍົກລັດຖະມົນຕີຫງວຽນຊວນຟຸກ ໄດ້ສະເຫນີບັນດາກະຊວງ, ຂະແຫນງການຊອກທິດທາງແກ້ໄຂ. ຕາມ ທ່ານນາຍົກລັດຖະມົນຕີຫງວຽນຊວນຟຸກແລ້ວ, ຮົ້ວກີດຂວາງ, ລະບຽບການທີ່ບໍ່ຈຳເປັນ, ບັນດາເອກະສານຝືນກັບກົດໝາຍທັງໝົດ ທີ່ສົ່ງຜົນສະທ້ອນເຖິງການພັດທະນາຂອງວິສາຫະກິດ ແລະ ຂອງພື້ນຖານເສດຖະກິດ ຕ້ອງຍົກເລີກ. ຜູ້ຊ່ຽວຊານເສດຖະກິດ ຮີ່ງເທຢູ ສັງເກດວ່າ:
“ພື້ນຖານເສດຖະກິດຄືແນວໃດ, ການເຄື່ອນໄຫວແນວໃດແລະປະສົບກັບສິ່ງກີດຂວາງຢູ່ບ່ອນໃດ ພຽງແຕ່ບັນດາວິສາຫະກິດ, ພາກສ່ວນດຳເນີນທຸລະກິດຈຶ່ງຮູ້ສິ່ງດັ່ງກ່າວໄດ້. ແລະ ລັດຖະບານແມ່ນຜູ້ຫນູນຊ່ວຍໃຫ້ແກ່ການເຄື່ອນໄຫວດຳເນີນທຸລະກິດຂອງບັນດາວິສາຫະກິດ. ສະນັ້ນ ບໍ່ພຽງແຕ່ຮັບຟັງຄວາມເຫັນເທົ່ານັ້ນ ຕ້ອງເຂົ້າໃຈບັນດາຄວາມຫຍຸ້ງຍາກຂອງວິສາຫະກິດຈຶ່ງປັບປຸງສະພາບດຳເນີນທຸລະກິດເປັນຢ່າງດີໄດ້.”
ຖືວິສາຫະກິດ,ຄົນງານເປັນສຳຄັນ
ທ່ານນາຍົກລັດຖະມົນຕີຫງວຽນຊວນຟຸກ ຖືການເຊີດຊູວິສາຫະກິດ, ນັກທຸລະກິດເປັນສຳຄັນ. ທ່ານນາຍົກລັດຖະມົນຕີຫງວຽນຊວນຟຸກ ຢືນຢັນວ່າ: ວິສາຫະກິດພາກເອກະຊົນ ຕ້ອງແມ່ນກຳລັງຫນູນເພື່ອພັດທະນາເສດຖະກິດ. ສິ່ງດັ່ງກ່າວໄດ້ຮັບຄວາມເຫັນດີເຫັນພ້ອມຈາກບັນດານັກທຸລະກິດ. ທ່ານນາງ ດ່າວທິກຽມ, ຮອງຜູ້ອຳນວຍການໃຫຍ່ ບໍລິສັດເຫລັກກ້າ ຕວານທັງ, ຜູ້ເຂົ້າຮ່ວມການພົບປະກັບ ທ່ານນາຍົກລັດຖະມົນຕີຫງວຽນຊວນຟຸກ ຢູ່ ຫໍປະຊຸມທີງເຍີດ, ນະຄອນ ໂຮ່ຈິມີນໄດ້ເວົ້າວ່າ:
“ລັດຖະບານໄດ້ຍົກອອກຫລາຍມາດຕະການ, ທິດທາງຕ່າງໆ ແລະ ວິທີການປ່ຽນແປງຫລາຍຢ່າງເພື່ອຊ່ວຍບັນດາວິສາຫະກິດ. ຂ້າພະເຈົ້າດີໃຈຫລາຍ ແລະ ຫວັງວ່າ ມີບັນດານະໂຍບາຍໃຫມ່ເພື່ອຊ່ວຍບັນດາວິສາຫະກິດເຊື່ອມໂຍງເຂົ້າກັບປະຊາຄົມເສດຖະກິດໂລກໂດຍໄວ.”
ທີ່ການພົບປະກັບຄົນງານ, ທ່ານນາຍົກລັດຖະມົນຕີຫງວຽນຊວນຟຸກ ໄດ້ໂອ້ລົມໂດຍກົງ ແລະ ຕອບບັນດາຄຳຖາມຊື່ງຜູ້ຕາງຫນ້າກຳມະກອນບັນດາແຂວງ, ນະຄອນ ທາງພາກໃຕ້ວາງອອກກ່ຽວກັບບັນດາມາດຕະການເພີ່ມເງິນເດືອນ, ນະໂຍບາຍຫນູນຊ່ວຍເຮືອນຢູ່, ປະກັນໄພ, ຄວາມປອດໄພໃນການອອກແຮງງານ, ນະໂຍບາຍບຸລິມະສິດສອນວິຊາຊີບໃຫ້ແກ່ຄົນງານ. ທ່ານນາຍົກລັດຖະມົນຕີຫງວຽນຊວນຟຸກ ໃຫ້ຮູ້ວ່າ: ພັກ ແລະ ລັດ ເອົາໃຈໃສ່ເຖິງກຳມະກອນຊາວຜູ້ອອກແຮງງານ ແລະ ຈະສືບຕໍ່ປະຕິບັດບັນດານະໂຍບາຍເພື່ອຊົນຊັ້ນກຳມະກອນມີຊີວິດທາງດ້ານວັດຖຸ ແລະ ຈິດໃຈດີກວ່າອີກ. ທ່ານນາຍົກລັດຖະມົນຕີຫງວຽນຊວນຟຸກ ເອົາໃຈໃສ່ເປັນພິເສດເຖິງການຮ່ຳຮຽນ, ຝືກຝົນຫລໍ່ຫລອມ, ຍົກສູງລະດັບສີມືຂອງກຳມະກອນແຕ່ລະຄົນໃນກິດຈະການເຊື່ອມໂຍງປະຈຸບັນ. ອ້າຍ ຫງວຽນດືກຊວນມີງເຍີດ, ພາລະກອນ ບໍລິສັດຜະລິດການຄ້າ ຊາງຫວຽດ ຈຳກັດຢູ່ ລອງອານ ມີຄວາມເພິ່ງພໍໃຈຕໍ່ສານຂອງນາຍົກລັດຖະມົນຕີ.
“ຄວາມເຫັນຂອງທ່ານນາຍົກລັດຖະມົນຕີແມ່ນຖືກຕ້ອງທີ່ສຸດ, ນັ້ນແມ່ນ ຕົນເອງຕ້ອງມານະພະຍາຍາມ. ກ່ອນທີ່ສະເຫນີລັດຊ່ວຍເຫລືອ ຕົນເອງຕ້ອງຝຶກຝົນຫລໍ່ຫລອມເພື່ອພັດທະນາຕົວເອງ. ເພາະວ່າ ສະມັດຕະພາບແຮງງານສູງນັ້ນ ບໍລິສັດຈຶ່ງພັດທະນາ, ລະດັບເງິນເດືອນຈຶ່ງສູງ.”
ຜ່ານການພົບປະກັບວິສາຫະກິດ ແລະ ຄົນງານເປັນສອງຄັ້ງ, ທ່ານນາຍົກລັດຖະມົນຕີຫງວຽນຊວນຟຸກ ໄດ້ສະແດງໃຫ້ເຫັນຈິດໃຈ ແລະ ເດັດດ່ຽວໃນການກະທຳຂອງລັດຖະບານ ເພື່ອສ້າງສະພາບແວດລ້ອມດຳເນີນທຸລະກິດສະດວກໃຫ້ວິສາຫະກິດ. ພ້ອມກັນນັ້ນທ່ານນາຍົກລັດຖະມົນຕີ ຢືນຢັນ ພ້ອມກັບການພັດທະນາຂອງວິສາຫະກິດ, ທຸກຂັ້ນ, ທຸກຂະແຫນງການ ຄວນເພີ່ມທະວີການກໍ່ສ້າງ, ພັດທະນາຖັນແຖວກຳມະກອນ ຊາວຜູ້ອອກແຮງງານ ເພື່ອໃຫ້ເຂົາເຈົ້າເປັນເຈົ້າການຢູ່ບ້ານເກີດເມືອງນອນ, ປະເທດຊາດຕົນຫລາຍກວ່າອີກ.