ຫວ່າງແລ້ວນີ້, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ສິ້ນສຸດການຢ້ຽມຢາມ ແລະ ເຂົ້າຮ່ວມກອງປະຊຸມສຸດຍອດ G7 ເປີດກ້ວາງ ແລະ ຢ້ຽມຢາມຍີປຸ່ນແຕ່ວັນທີ 26-28/5 ຕາມຄຳເຊີນຂອງທ່ານນາຍົກລັດຖະມົນຕີຍີປຸ່ນ Shinzo Abe . ບັນດາໝາກຜົນທີ່ພົ້ນເດັ່ນຂອງການຢ້ຽມຢາມຍີປຸ່ນ ແລະເຂົ້າຮ່ວມ ກອງປະຊຸມສຸດຍອດ G7 ສືບຕໍ່ຢັ້ງຢືນນະໂຍບາຍສະເໝີຕົ້ນສະເໝີປາຍຂອງຫວຽດນາມ ແມ່ນຍາມໃດກໍມານະພະຍາຍາມປັບປຸງ, ພັດທະນາການພົວພັນກັບທຸກໆປະເທດໃນໂລກ, ແມ່ນຄູ່ຮ່ວມມືທີ່ໄວ້ເນື້ອເຊື່ອໃຈ ແລະ ເປັນສະມາຊິກທີ່ມີຄວາມຮັບຜິດຊອບໃນປະຊາຄົມໂລກ. ຕໍ່ໄປນີ້, ນັກຂ່າວແອງຮວ່ຽນມີບົດທີ່ພາດຫົວຂໍ້ວ່າ : “ຫວຽດນາມເພີ່ມທະວີທີ່ຕັ້ງບົດບາດ, ມານະພະຍາຍາມປະກອບສ່ວນເຂົ້າໃນບັນດາບັນຫາລວມຂອງທົ່ວໂລກ” ເຊີນທ່ານຕິດຕາມຮັບຟັງ.
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ແລະ ທ່ານນາຍົກລັດຖະມົນຕີຍີປຸ່ນ Shinzo Abe |
ນີ້ເປັນຄັ້ງທຳອິດໃນຖານະຕຳແໜ່ງໃໝ່, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກໄດ້ນຳໜ້າຄະນະຜູ້ແທນຂັ້ນສູງຫວຽດນາມເຂົ້າຮ່ວມ ກອງປະຊຸມສຸດຍອດ G7 ເປີດກ້ວາງ ແລະ ຢ້ຽມຢາມຍີປຸ່ນຢ່າງເປັນທາງການ. ນີ້ກໍເປັນຄັ້ງທຳອິດພາຍຫຼັງ 42 ປີ, ຫວຽດນາມໄດ້ຮັບການເຊື້ອເຊີນເຂົ້າຮ່ວມ ກອງປະຊຸມສຸດຍອດ G7ເປີດກ້ວາງ. ສິ່ງນີ້ໄດ້ສະແດງໃຫ້ເຫັນການຖືເປັນສຳຄັນຂອງບັນດາສະມາຊິກກຸ່ມ G7, ພິເສດແມ່ນຍີປຸ່ນສຳລັບຫວຽດນາມ ແລະ ມີຄວາມຫວັງໃຫ້ຫວຽດນາມສະແດງບົດບາດທີ່ສູງກວ່າເກົ່າໃນບັນດາບັນຫາພາກພື້ນ ແລະ ສາກົນ.
ຢັ້ງຢືນຫຼັກໝັ້ນກ່ຽວກັບສັນຕິພາບ, ສະຖຽນລະພາບ ແລະ ການພັດທະນາແບບຍືນຍົງ
ໂດຍໄດ້ສະແດງໃຫ້ເຫັນຄວາມຮັບຜິດຊອບຂອງຫວຽດນາມທີ່ມີຕໍ່ບັນດາບັນຫາທີ່ວາງອອກຂອງພາກພື້ນ ແລະ ສາກົນ, ໃນບົດກ່າວປາໄສທີ່ບັນດາວາລະປະຊຸມຂອງກອງປະຊຸມສຸດຍອດ G7 ເປີດກ້ວາງ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ຢັ້ງຢືນຫຼັກໝັ້ນກ່ຽວກັບສັນຕິພາບ, ສະຖຽນລະພາບ ແລະ ການພັດທະນາແບບຍືນຍົງຂອງພາກພື້ນອາຊີ-ປາຊີຟິກເວົ້າສະເພາະ ແລະ ທົ່ວໂລກເວົ້າລວມ. ທ່ານນາຍົກລັດຖະມົນຕີໄດ້ຊີ້ແຈ້ງວ່າ ບັນດາສິ່ງທ້າທາຍນັບມື້ນັບໃຫຍ່ຫຼວງຕໍ່ສັນຕິພາບ, ຄວາມໝັ້ນຄົງຂອງພາກພື້ນ, ກ່ອນອື່ນໝົດແມ່ນຄວາມໝັ້ນຄົງ, ປອດໄພ ແລະ ເສລີພາບໃນການເດີນທະເລ, ການບິນຢູ່ທະເລຕາເວັນອອກ. ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ຖືວ່າ ບັນດາປະເທດທີ່ກ່ຽວຂ້ອງຄວນລະງັບໃຈ, ແກ້ໄຂການຂັດແຍ້ງດ້ວຍມາດຕະການໂດຍສັນຕິວິທີ, ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982, ປະຕິບັດຕາມຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ ທະເລຕາເວັນອອກ (DOC), ເພີ່ມທະວີບັນດາມາດຕະການສ້າງຄວາມເຊື່ອໝັ້ນຕໍ່ກັນ ແລະ ການທູດເພື່ອສະກັດກັ້ນ, ກ້າວໄປສູ່ການສ້າງປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ ທະເລຕາເວັນອອກ (COC) ໂດຍໄວ. ທັດສະນະນີ້ຂອງຫວຽດນາມໄດ້ຮັບການສະໜັບສະໜູນຈາກຫຼາຍປະເທດໃນໂລກ ແລະ ບັນດາອົງການຈັດຕັ້ງສາກົນ. ທີ່ກອງປະຊຸມສຸດຍອດ G7, ບັນດາປະເທດໄດ້ອອກຖະແຫຼງການຮ່ວມ, ໃນນັ້ນ ຢືນຢັນວ່າ ບັນດາການເຄື່ອນໄຫວພຽງລຳພັງຝ່າຍດຽວ, ບູລະນະ, ຖົມດິນເປັນເກາະຢູ່ທະເລຕາເວັນອອກໄດ້ກໍ່ໃຫ້ເກີດສະພາບຂາດສະຖຽນລະພາບ ແລະ ຄວາມເຄັ່ງຕຶງ, ນາບຂູ່ຕໍ່ສັນຕິພາບ. ບັນດາປະເທດຍັງຮຽກຮ້ອງໃຫ້ບັນດາຝ່າຍຈົ່ງລະງັບໃຈ, ນຳໃຊ້ບັນດາມາດຕະການໂດຍສັນຕິວິທີ, ແກ້ໄຂການຂັດແຍ້ງໂດຍອີງໃສ່ກົດໝາຍສາກົນ.
ພ້ອມກັນນັ້ນ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກຍັງຮຽກຮ້ອງໃຫ້ບັນດາປະເທດ G7 ຈົ່ງຫນູນຊ່ວຍບັນດາປະເທດພວມພັດທະນາ ກໍ່ສ້າງພື້ນຖານໂຄງລ່າງຄຸນນະພາບສູງ, ເພີ່ມທະວີການເຊື່ອມຕໍ່ກັນເພື່ອຮັບມືກັບສະພາບປ່ຽນແປງຂອງດິນຟ້າອາກາດ. ກ່ຽວກັບສິ່ງນີ້, ທ່ານຮອງລັດຖະມົນຕີກະຊວງການຕ່າງປະເທດຫວຽດນາມ ບຸຍແທງເຊີນ ຕີລາຄາວ່າ :
“ ທີ່ກອງປະຊຸມ, ຫວຽດນາມໄດ້ແບ່ງປັນບົດຮຽນ ແລະ ຫວັງໃຫ້ປະຊາຄົມໂລກ ຈົ່ງຫນູນຊ່ວຍຫວຽດນາມພັດທະນາພື້ນຖານໂຄງລ່າງຄຸນນະພາບສູງ ແລະ ຍືນຍົງ. ທີ 2, ຫວຽດນາມແມ່ນປະເທດຮັບຜົນກະທົບຢ່າງແຂງແຮງຈາກການ ປ່ຽນແປງຂອງດິນຟ້າອາກາດຊຶ່ງພົ້ນເດັ່ນຂຶ້ນແມ່ນໄພແຫ້ງແລ້ງ ແລະ ທ້ຳທະເລຊຶມ, ໄດ້ຮັບຄວາມສົນໃຈທີ່ສຸດຈາກປະຊາຄົມໂລກ. ບັນດາປະເທດຄື ປະເທດເຈົ້າພາບຍີປຸ່ນຫຼືບັນດາປະເທດ G7 ແລະ ບັນດາອົງການຈັດຕັ້ງສາກົນກໍລ້ວນແຕ່ເອົາໃຈໃສ່ຫນູນຊ່ວຍບັນດາປະເທດພວມພັດທະນາ, ໃນນັ້ນມີຫວຽດນາມ, ຊ່ວຍຫວຽດນາມຜັນຂະຫຍາຍການຮັບມືກັບໄພແຫ້ງແລ້ງ ແລະ ທ້ຳທະເລຊຶມໃນໄລຍະປານກາງ ແລະ ໄລຍະຍາວ ”
ຮັດແໜ້ນບັນດາການພົວພັນ 2 ຝ່າຍ
ໃນ 3 ວັນທີ່ເຂົ້າຮ່ວມກອງປະຊຸມສຸດຍອດ G7 ເປີດກ້ວາງ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກໄດ້ພົບປະກັບບັນດາປະມຸກລັດຂອງປະເທດແຖວໜ້າໃນໂລກ, ທ່ານເລຂາທິການໃຫຍ່ ສ.ປ.ຊ, ຜູ້ນຳບັນດາອົງການຈັດຕັ້ງສາກົນໃຫຍ່. ທີ່ການພົບປະເຫຼົ່ານັ້ນ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກໄດ້ຢືນຢັນວ່າ : ລັດຖະບານຫວຽດນາມຕັດສິນໃຈນຳການຮ່ວມມືລະຫວ່າງຫວຽດນາມກັບບັນດາປະເທດ ແລະ ບັນດາອົງການຈັດຕັ້ງສາກົນເຂົ້າສູ່ລວງເລິກ, ແທດຈິງ, ພິເສດແມ່ນການຮ່ວມມືດ້ານເສດຖະກິດ ແລະ ຫວັງວ່າ ບັນດາປະເທດ ແລະ ຄູ່ຮ່ວມມືຈົ່ງສະໜັບສະໜູນຫວຽດນາມເພີ່ມທະວີບົດບາດ ແລະ ຄວາມຮັບຜິດຊອບໃນບັນດາອົງການຈັດຕັ້ງສາກົນ, ສືບຕໍ່ສົມທົບຢ່າງແໜ໊ນແຟ້ນຢູ່ບັນດາເວທີປາໄສຫຼາຍຝ່າຍທີ່ສຳຄັນໃນພາກພື້ນ ແລະ ໃນໂລກ. ໃນນັ້ນມີການສະໜັບສະໜູນຫວຽດນາມອອກສະໝັກເລືອກຕັ້ງເປັນກຳມະການບໍ່ປະຈຳສະພາຄວາມໝັ້ນຄົງ ສ.ປ.ຊ ອາຍຸ 2020-2021 ແລະ ອອກສະໝັກເລືອກຕັ້ງເຂົ້າດຳລົງຕຳແໜ່ງຜູ້ນຳນວຍການໃຫຍ່ UNESCO ອາຍຸການ 2017-2021. ໃນການຢ້ຽມຢາມຍີປຸ່ນຄັ້ງນີ້, ທ່ານນາຍົກລັດຖະມົນຕີຍີປຸ່ນ Shinzo Abe ໄດ້ຕົກລົງຮ່ວມມື ແລະ ໃຫ້ການຊ່ວຍເຫຼືອລ້າເປັນຈຳນວນເງິນ 2,5 ລ້ານ USD ເພື່ອຊ່ວຍຫວຽດນາມແກ້ໄຂຄວາມເສຍຫາຍຈາກສະພາບແຫ້ງແລ້ງ ແລະ ນ້ຳທະເລຊຶມ. ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໃຫ້ຂໍ້ສັງເກດວ່າ :
“ ຂ້າພະເຈົ້າຕີລາຄາສູງເລື່ອງທ່ານນາຍົກລັດຖະມົນຕີຍີປຸ່ນ Shinzo Abe ສືບຕໍ່ສະໜອງແຫຼ່ງທຶນຊ່ວຍເຫຼືອ ODA ເພື່ອໃຫ້ຫວຽດນາມພັດທະນາເສດຖະກິດ-ສັງຄົມ, ພ້ອມທັງໃຫ້ການຮ່ວມມືຢ່າງແໜ້ນແຟ້ນກັບຫວຽດນາມໃນການຜັນຂະຫຍາຍແຜນການສິນເຊື່ອ 110 ຕື້ USD ແນໃສ່ພັດທະນາພື້ນຖານໂຄງລ່າງຄຸນນະພາບສູງຢູ່ອາຊີຕາມຈິດໃຈກອງປະຊຸມສຸດຍອດ G7 , ຜັນຂະຫຍາຍຂໍ້ລິເລີ່ມເຊື່ອມຈອດ ແມ່ຂອງ-ຍີປຸ່ນ. ພວກຂ້າພະເຈົ້າຍັງຢັ້ງຢືນຄວາມຕັດສິນໃຈຜັນຂະຫຍາຍບັນດາໂຄງການລົງທຶນທີ່ມີຂອບຂະໜາດໃຫຍ່, ຍຸດທະສາດຫັນເປັນອຸດສາຫະກຳຂອງຫວຽດນາມ, ເຫັນດີເພີ່ມທະວີການຮ່ວມມືດ້ານການລົງທຶນ, ການຄ້າ… ”
ໃນການຢ້ຽມຢາມຍີປຸ່ນ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກໄດ້ສົ່ງສານທີ່ແຂງແຮງຂອງຫວຽດນາມໄປຍັງບັນດາວິສາຫະກິດຍີປຸ່ນ. ນັ້ນແມ່ນຫວຽດນາມສືບຕໍ່ສ້າງສະພາບແວດລ້ອມແຫ່ງການລົງທຶນ, ດຳເນີນທຸລະກິດທີ່ດີ, ອຳນວຍຄວສາມສະດວກ ແລະ ສະເໝີພາບໃຫ້ແກ່ບັນດານັກລົງທຶນຕ່າງປະເທດດ້ວຍຈິດໃຈຕ່າງຝ່າຍຕ່າງກໍຮັບຜົນປະໂຫຍດ
ການຢ້ຽມຢາມຍີປຸ່ນ ແລະ ເຂົ້າຮ່ວມກອງປະຊຸມສຸດຍອດ G7 ເປີດກ້ວາງຂອງ ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ປະກອບສ່ວນສຳຄັນເຂົ້າໃນເພີ່ມທະວີການພົວພັນຄູ່ຮ່ວມມືຍຸດທະສາດກ້ວາງເລິກຫວຽດນາມ-ຍີປຸ່ນ, ປະກອບສ່ວນຢ່າງຕັ້ງໜ້າ, ເປັນເຈົ້າການ ແລະ ມີຄວາມຮັບຜິດຊອບເຂົ້າໃນການແກ້ໄຂບັນດາບັນຫາລວມຂອງທົ່ວໂລກ.