នៅក្នុងសេចក្តីថ្លែងការណ៍រួម ភាគីទាំងពីរបានសង្កត់ធ្ងន់លើផលប្រយោជន៍រួម ការគោរពគ្នាទៅវិញទៅមក និងការតភ្ជាប់ប្រវត្តិសាស្ត្រជាមូលដ្ឋានគ្រឹះនៃភាពជាដៃគូទ្វេភាគី។ ភាគីទាំងពីរបានបញ្ជាក់ជាថ្មី នូវការប្តេជ្ញាធ្វើឱ្យស៊ីជម្រៅថែមទៀតនូវកិច្ចសហប្រតិបត្តិការនៅក្នុងវិស័យជាច្រើន។ តាមនោះ ទាក់ទងនឹងទំនាក់ទំនងនយោបាយ ភាគីទាំងពីរបានឯកភាពគ្នាពង្រឹងកិច្ចសហប្រតិបត្តិការរវាងមូលដ្ឋាននានា និងជំរុញការផ្លាស់ប្តូររវាងប្រជាជននិងប្រជាជន ខណៈពេលដែលលើកទឹកចិត្តដល់ការបង្កើតក្របខ័ណ្ឌនៃកិច្ចសហប្រតិបត្តិការរវាងមូលដ្ឋាន ក្រសួង និងវិស័យនានានៃប្រទេសទាំងពីរ ស្របតាមច្បាប់ និងបទប្បញ្ញត្តិរបស់ប្រទេសនីមួយៗ។
ទាក់ទងនឹងកិច្ចសហប្រតិបត្តិការក្នុងតំបន់និងសកលលោក ភាគីទាំងពីរបានសង្កត់ធ្ងន់លើតួនាទីស្នូលរបស់អង្គការសហប្រជាជាតិ និងសារៈសំខាន់នៃការរក្សាសណ្តាប់ធ្នាប់អន្តរជាតិ ដោយផ្អែកលើធម្មនុញ្ញអង្គការសហប្រជាជាតិ និងច្បាប់អន្តរជាតិ; ឯកភាពគ្នាពង្រឹងកិច្ចសហប្រតិបត្តិការក្នុងក្របខ័ណ្ឌទំនាក់ទំនង EU -វៀតណាម ពង្រឹងកិច្ចសហប្រតិបត្តិការក្នុងក្របខ័ណ្ឌទំនាក់ទំនងប៉ូឡូញ-អាស៊ាន និងក្នុងក្របខ័ណ្ឌទំនាក់ទំនងអាស៊ាន-EU។ ភាគីទាំងពីរបានបញ្ជាក់ជាថ្មីនូវការគាំទ្រចំពោះអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ១៩៨២ (UNCLOS ១៩៨២) គាំទ្រគោលការណ៍នៃការដោះស្រាយជម្លោះដោយសន្តិវិធី និងប្រឆាំងជំទាស់យ៉ាងដាច់ខាតចំពោះការប្រើប្រាស់កម្លាំង ឬការគំរាមកំហែងប្រើប្រាស់កម្លាំងដែលផ្ទុយនឹងច្បាប់អន្តរជាតិ។ ភាគីទាំងពីរបានសម្តែងការគាំទ្រចំពោះកិច្ចខិតខំប្រឹងប្រែងក្នុងតំបន់ ដើម្បីបង្កើតក្រមប្រតិបត្តិនៅសមុទ្រខាងកើត (COC) ប្រកបដោយប្រសិទ្ធភាព ជាក់ស្តែង និងស្របតាមច្បាប់អន្តរជាតិ ជាពិសេស UNCLOS ១៩៨២៕
