(vovworld) - ວັນທີ 03 ຕຸລາ, ທີ່ການປະຊຸມຂ່າວນັດສາມັນຂອງກະຊວງການຕ່າງປະເທດຫວຽດນາມ, ໂຄສົກກະຊວງການຕ່າງປະເທດຫວຽດນາມ ເລືອງແທງຫງິ້ ໃຫ້ຮູ້ວ່າ ໃນລະຫວ່າງວັນທີ 07 ແລະ 08 ຕຸລາ, ທ່ານປະທານປະເທດ ເຈືອງເຕີນຊາງ ຈະເຂົ້າຮ່ວມກອງປະຊຸມບັນດາການນຳເວທີປາໄສຮ່ວມມືເສດຖະກິດອາຊີ - ປາຊີຝີກ ຄັ້ງທີ 21 (APEC 21) ດ້ວຍຫົວຂໍ້ວ່າ “ອາຊີ - ປາຊີຝີກສ້າງຄວາມເຂັ້ມແຂງດ້ວຍຕົນເອງ: ກຳລັງໜູນຂອງການເຕີບໂຕທົ່ວໂລກ”, ເຊິ່ງຈະດຳເນີນຢູ່ບາລີ, ປະເທດອີນໂດເນເຊຍ. ແຕ່ວັນທີ 13 – 15 ຕຸລາ, ທ່ານນາຍົກລັດຖະມົນຕີ ສປ.ຈີນ ຫຼີເຄີຊຽງ ຈະມາຢ້ຽມຢາມຫວຽດນາມ ຢ່າງເປັນທາງການ ຕາມຄຳເຊີນຂອງທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ. ໂຄສົກກະຊວງການຕ່າງປະເທດເລືອງແທງຫງິ້ ເນັ້ນໜັກວ່າ.
“ນີ້ເປັນຄັ້ງທຳອິດທີ່ການນຳຂັ້ນສູງຈີນ ມາຢ້ຽມຢາມຫວຽດນາມ ຢ່າງເປັນທາງການ ນັບແຕ່ເມື່ອຈີນ ມີຄະນະການນຳໃໝ່, ການຢ້ຽມຢາມມີຄວາມໝາຍສຳຄັນພິເສດໃນການເພີ່ມທະວີ, ປັບປຸງຄວາມໄວ້ເນື້ອເຊື່ອໃຈດ້ານການເມືອງ, ຊຸກຍູ້ການພົວພັນຄູ່ຮ່ວມມື ຮ່ວມມືຍຸດທະສາດຮອບດ້ານລະຫວ່າງ 2 ປະເທດ. ນາຍົກລັດຖະມົນຕີ 2 ທ່ານຈະແລກປ່ຽນບັນດາທິດທາງ ແລະ ມາດຕະການເພື່ອຊຸກຍູ້ການພົວພັນຮ່ວມມືລະຫວ່າງ 2 ປະເທດໃນທຸກໆຂົງເຂດໃຫ້ເຂົ້າສູ່ລວງເລີກ ແລະ ແທດຈິງ ໂດຍສະເພາະແມ່ນເສດຖະກິດ, ການຄ້າ, ແລກປ່ຽນຄຳເຫັນກ່ຽວກັບສະພາບການສາກົນ ແລະ ພາກພື້ນ ທີ່ຕ່າງຝ່າຍຕ່າງມີຄວາມສົນໃຈ”.
ໃນຂອບເຂດການຢ້ຽມຢາມຄັ້ງນີ້, ທ່ານນາຍົກລັດຖະມົນຕີ ຫຼີເຄີຊຽງ ຈະມີການພົບປະເຈລະຈາກັບການນຳຂັ້ນສູງຂອງຫວຽດນາມ, ພົບປະກັບບັນດາວິສາຫະກິດ, ເຂົ້າຮ່ວມງານພົບປະແລກປ່ຽນຂອງຊາວໜຸ່ມ, ນັກສຶກສາ ຫວຽດນາມ - ຈີນ ແລະ ຢ້ຽມຢາມບາງຮາກຖານເສດຖະກິດ, ວັດທະນະທຳຢູ່ຮ່າໂນ້ຍ.
ກໍ່ທີ່ການປະຊຸມຂ່າວ, ໂຄສົກກະຊວງການຕ່າງປະເທດເລືອງແທງຫງິ້ໄດ້ຕອບສຳພາດຕໍ່ນັກຂ່າວກ່ຽວກັບທັດສະນະຂອງຫວຽດນາມ ທີ່ກ່ຽວຂ້ອງເຖິງເລື່ອງລັດຖະບານອາເມລິກາ ຢຸດຕິການເຄື່ອນໄຫວນັບແຕ່ວັນທີ 01 ຕຸລາ 2013. ທ່ານ ເລືອງແທງຫງິ້ ໃຫ້ຮູ້ວ່າ.
“ພາຍຫຼັງລັດຖະບານອາເມລິກາ ຢຸດຕິການເຄື່ອນໄຫວ, ບັນດາການເຄື່ອນໄຫວຮ່ວມມືລະຫວ່າງ 2 ປະເທທ ຍັງຄົງດຳເນີນເປັນປົກກະຕິຢູ່. ວັນທີ 01 ຕຸລາ, 2 ປະເທດໄດ້ດຳເນີນຮອບເຈລະຈາດ້ານການເມືອງ, ປ້ອງກັນຊາດ, ປ້ອງກັນຄວາມສະຫງົບ ປະຈຳປີຄັ້ງທີ 6 ແລະ ບັນດາອົງການຕາງໜ້າການທູດຂອງ 2 ປະເທດຍັງເຄື່ອນໄຫວເປັນປົກກະຕິ. ພວກຂ້າພະເຈົ້າຫວັງວ່າ ສະພາບການຄືປະຈຸບັນພຽງແຕ່ຊົ່ວຄາວ ແລະ ບໍ່ສົ່ງຜົນສະທ້ອນເຖິງການພົວພັນລະຫວ່າງ 2 ປະເທດ ແລະ ຫວັງວ່າ ລັດຖະບານອາເມລິກາ ຈະຟື້ນຟູ ແລະ ເຄື່ອນໄຫວເປັນປົກກະຕິໂດຍໄວ.”