ຄະນະຊີ້ນຳວຽກງານສື່ຂ່າວກັບຕ່າງປະເທດພົບປະກັບຫົວໜ້າອົງການຕ່າງໜ້າຫວຽດນາມຢູ່ຕ່າງປະເທດ
( ທ່ານ Dinh The Huynh, ຫົວໜ້າຄະນະໂຄສະນາສຶກສາສູນກາງ )
( vovworld ) – ຕອນບ່າຍວັນທີ 11/5, ຢູ່ຮ່າໂນ້ຍ, ຄະນະຊີ້ນຳວຽກງານສື່ຂ່າວກັບຕ່າງປະເທດ, ຄະນະໂຄສະນາສຶກສາສູນກາງ ພົບປະກັບບັນດາສະຫາຍຫົວໜ້າອົງການຕ່າງໜ້າຫວຽດນາມ ຢູ່ຕ່າງປະເທດອາຍຸການ 2012 – 2015 ເພີ່ອແນໃສ່ຊາບຊືມເນື້ອໃນສະຫຼຸບຂອງກົມການເມືອງກ່ຽວກັບ “ ຍຸດທະສາດພັດທະນາ ” ສື່ຂ່າວກັບຕ່າງປະເທດໄລຍະ 2011 – 2020. ກ່າວຄຳເຫັນທີການພົບປະ, ທ່ານ Dinh The Huynh, ຫົວໜ້າຄະນະໂຄສະນາສຶກສາສູນກາງເນັ້ນໜັກວ່າ: ໃນບັນດາຜົນງານຂອງກິດຈະການປ່ຽນໃໝ່ປະເທດຊາດມີການປະກອບສ່ວນສຳຄັນຂອງຂະແໜງການຕ່າງປະເທດ ແລະ ການເຄື່ອນໄຫວຢ່າງຕັ້ງໜ້າຂອງບັນດາອົງການຕ່າງໜ້າຫວຽດນາມ ຢູ່ຕ່າງປະເທດ.
“ ພວກຂ້າພະເຈົ້າຫວັງວ່າ ບັນດາສະຫາຍປະຕິບັດໜ້າທີສື່ຂ່າວກັບຕ່າງປະເທດ ຕິດພັນກັບໜ້າທີ່ການຕ່າງປະເທດຂອງຕົນ. ບັນດາອົງການຕ່າງໜ້າຫວຽດນາມ ຢູ່ຕ່າງປະເທດແມ່ນຂົວເຊື່ອມຕໍ່ທີ່ສຳຄັນນຳຂໍ້ມູນຂ່າວສາກົນມາຫວຽດນາມ ທັງແມ່ນຊ່ອງສື່ຂ່າວໂດຍກົງ, ມີປະສິດທິຜົນທີ່ສຸດເພື່ອນຳຂໍ້ມູນຂ່າວຈາກຫວຽດນາມ ອອກຕ່າງປະເທດ, ເພື່ອໃຫ້ປະຊາຊົນມີຄວາມເຂົ້າໃຈຢ່າງຖຶກຕ້ອງກ່ຽວກັບປະເທດຊາດ ແລະ ຊາວຫວຽດນາມ ແລະ ເຮັດໃຫ້ເພື່ອນມິດສາກົນມີຄວາມເຂົ້າໃຈກວ່າກ່ຽວກັບຫວຽດນາມ ເຊິ່ງແມ່ນປະເທດທີ່ຂະຫຍັນຂັນເຂື່ອນ, ພວມມີການປ່ຽນໃໝ່, ແມ່ນປະເທດຮັກຫອມສັນຕິພາບ, ພ້ອມແລ້ວທີ່ຈະເພີ່ມພູນຄູນສ້າງສາຍພົວພັນອັນສະໜິດແໜ້ນກັບປະຊາຊາດຢູ່ໃນໂລກ ”.
ຄະນະຊີ້ນຳວຽກງານສື່ຂ່າວກັບຕ່າງປະເທດກໍ່ແຈ້ງໃຫ້ຊາບກ່ຽວກັບບັນດາເອກະສານສຳຄັນຂອງກະຊວງການຕ່າງປະເທດທີ່ກ່ຽວຂ້ອງເຖິງການພົວພັນລະຫວ່າງຫວຽດນາມ ກັບປະເທດຈຳນວນໜື່ງ, ຕໍ່ສູ້ຕ້ານຖ້ອຍທຳນອງທີ່ຜິດພາດຂອງບັນດາອິດທິກຳລັງທີ່ເປັນປໍລະປັກ ແລະ ຄວາມຮັບຜິດຊອບຂອງບັນດາອົງການຕ່າງໜ້າຫວຽດນາມ ຢູ່ຕ່າງປະເທດທີ່ມີຕໍ່ການເຄື່ອນໄຫວສື່ຂ່າວກັບຕ່າງປະເທດ.