ທ່ານເລຂາທິການໃຫຍ່ ຫງວຽນຟູ່ຈ້ອງຕ້ອນຮັບບັນດາເອກອັກຄະລັດຖະທູດ, ຫົວໜ້າສຳນັກງານຕາງໜ້າ ຫວຽດນາມ ຢູ່ຕ່າງປະເທດ
|
(vovworld) – ຕອນບ່າຍວັນທີ 28/7, ຢູ່ຮ່າໂນ້ຍ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ່ຈ້ອງ ໄດ້ໃຫ້ການຕ້ອນຮັບບັນດາເອກອັກຄະລັດຖະທູດ, ຫົວໜ້າສຳນັກງານຕາງໜ້າ ຫວຽດນາມ ຢູ່ຕ່າງປະເທດຊຶ່ງພວມກະກຽມເດີນທາງໄປປະຕິບັດໜ້າທີ່ຢູ່ຕ່າງປະເທດ.
ທ່ານເລຂາທິການໃຫຍ່ໄດ້ຕັກເຕືອນບັນດາເອກອັກຄະລັດຖະທູດ, ຫົວໜ້າສຳນັກງານຕາງໜ້າ ຫວຽດນາມ ຢູ່ຕ່າງປະເທດຕ້ອງເອົາໃຈໃສ່ວຽກງານພົວພັນວຽກງານພັກ, ລັດ, ແລະ ພົວພັນປະຊາຊົນກັບຕ່າງປະເທດໃນທຸກຂົງເຂດຄື: ການເມືອງ, ເສດຖະກິດ, ວັດທະນະທຳ..., ທັງໃນດ້ານ 2 ຝ່າຍ ແລະ ຫຼາຍຝ່າຍ. ຢາກເຮັດໄດ້ຄືແນວນັ້ນ, ບັນດາເອກອັກຄະລັດຖະທູດ, ຫົວໜ້າສຳນັກງານຕາງໜ້າຕ້ອງຊາບຊຶມຢ່າງຄົບຖ້ວນ, ເລິກເຊິ່ງທັດສະນະ, ແຜນນະໂຍບາຍ, ແນວທາງການພັດທະນາປະເທດເຊິ່ງພັກ, ລັດໄດ້ວາງອອກ, ພິເສດແມ່ນແນວທາງການຕ່າງປະເທດເອກະລາດ, ເປັນເຈົ້າຕົນເອງ, ຫັນເປັນຫຼາຍຮູບຫຼາຍແບບ, ຫຼາຍຝ່າຍ, ພ້ອມແລ້ວເປັນເພື່ອນມິດ, ເປັນຄູ່ຮ່ວມມືທີ່ໜ້າໄວ້ເນື້ອເຊື່ອໃຈ, ແມ່ນສະມາຊິກມີຄວາມຮັບຜິດຊອບໃນປະຊາຄົມໂລກ. ທ່ານເລຂາທິການໃຫຍ່ ຫງວຽນຟູ໋ຈ້ອງ, ຊີ້ແຈ້ງວ່າ:
“ ຕ້ອງເຮັດແນວໃດ ເພື່ອສົ່ງຂໍ້ມູນຂ່າວສານຈາກຕ່າງປະເທດມາໃຫ້ການນຳຫວຽດນາມ. ຕ້ອງເປັນເສນາທິການ, ນຳສະເໜີ, ສະໜອງ ຂໍ້ມູນຂ່າວສານ, ຄາດຄະເນສະພາບການ, ທິດພັດທະນາ, ນຳສະເໜີເພື່ອແກ້ໄຂ. ອີກໜ້າທີ່ໜຶ່ງແມ່ນສົ່ງຂໍ້ມູນຂ່າວສານຢູ່ພາຍໃນປະເທດອອກສູ່ຕ່າງປະເທດ, ໂຄສະນາພາບພົດປະເທດຊາດ ແລະ ຊາວຫວຽດນາມ, ວັດທະນະທຳຫວຽດນາມ, ແຜນນະໂຍບາຍຂອງພັກ ແລະ ລັດອອກສູ່ຕ່າງປະເທດ ຕໍ່ໜ້າບັນດາການຜັນແປຢ່າງສັບສົນຢູ່ທະເລຕາເວັນອອກ, ສະເໜີຕ່າງປະເທດຊ່ວຍເຫຼືອຫວຽດນາມ. ອີກສິ່ງໜຶ່ງ ແມ່ນເອົາໃຈໃສ່ເປັນພິເສດເຖິງປະຊາຄົມຊາວຫວຽດນາມຢູ່ຕ່າງປະເທດ, ຊຶ່ງແມ່ນພາກສ່ວນໜຶ່ງຂອງຊາດຫວຽດນາມ ”