(vovworld) – ຕອນບ່າຍວັນທີ 28/01, ຢູ່ຮ່າໂນ້ຍ, ຄະນະພົວພັນຕ່າງປະເທດສູນກາງ ໄດ້ຈັດການປະກາດໝາກຜົນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກກອມມູນິດຫວຽດນາມ ໃຫ້ຄະນະທຸຕານຸທູດແລະບັນດາອົງການຈັດຕັ້ງສາກົນປະຈຳຫວຽດນາມ. ຢູ່ທີ່ນີ້, ທ່ານ ຮ່ວາງບິ່ງກວນ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງ ໄດ້ແຈ້ງໃຫ້ຊາບວ່າ, ພາຍຫຼັງເຮັດວຽກຢ່າງຮີບດ່ວນ, ເຂັ້ມງວດ, ມີຄວາມຮັບຜິດຊອບ ມາເປັນເວລາ 9 ວັນ, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກກອມມູນິດຫວຽດນາມ ໄດ້ບັນລຸຜົນສຳເລັດຢ່າງຈົບງາມ, ສຳເລັດບັນດາຄາດໝາຍ ແລະ ລາຍການທີ່ໄດ້ວາງອອກ. ບັນດາຜູ້ແທນເຂົ້າຮ່ວມກອງປະຊຸມໃຫຍ່ໄດ້ປຶກສາຫາລືຢ່າງມີປະຊາທິປະໄຕ, ເເຫັນດີເປັນເອກະພາບຮັບຮອງເອົາບັນດາເອກະສານສຳຄັນ, ວາງອອກ 6 ໜ້າທີ່ຈຸດສຸມ ແລະ ກຳນົດບັນດາຕົວເລກຄາດໝາຍຕົ້ນຕໍ່ເພື່ອກຳນົດທິດໃຫ້ແກ່ການພັດທະນາປະເທດຊາດ ໃນໄລຍະຈະມາເຖິງ. ກ່ຽວກັບການພັດທະນາເສດຖະກິດສັງຄົມ. ກອງປະຊຸມໃຫຍ່ມີແຜນນະໂຍບາຍ ທັງບັນລຸລະດັບເຕີມໂຕໃຫ້ສູງກວ່າ, ທັງເອົາໃຈໃສ່ເຖິງຄຸນນະພາບການເຕີບໂຕ ຕິດພັນກັບຄາດໝາຍພັດທະນາແບບຍືນຍົງ, ຍົກສູງສະມັດຕະພາບແຮງງານ, ເສີມຂະຫຍາຍບົດບາດຂອງຕະຫຼາດ ແລະ ບັນດາພາກສ່ວນເສດຖະກິດ, ໃນນັ້ນມີເສດຖະກິດພາກເອກະຊົນ, ບົດບາດຂອງວິທະຍາສາດເຕັກໂນໂລຊີ ແລະ ປັດໃຈມະນຸດ, ພ້ອມທັງຍູ້ແຮງການເຊື່ອມຍົງເສດຖະກິດສາກົນ. ກ່ຽວກັບດ້ານການເມືອງ, ກອງປະຊຸມໃຫຍ່ໄດ້ເນັ້ນໜັກເຖິງໜ້າທີ່ກໍ່ສ້າງພັກໃຫ້ປອດໄສ, ໝັ້ນຄົງເຂັ້ມແຂງ, ຍູ້ແຮງວຽກງານປ້ອງກັນຕ້ານການສໍ້ລາດບັງຫຼວງ, ການຟູມເຟືອຍ, ສືບຕໍ່ເສີມຂະຫຍາຍປະຊາທິປະໄຕໃນສັງຄົມ ແລະ ຮັບປະກັນສິດຂອງມະນຸດ ຕິດພັນກັບການສ້າງລັດແຫ່ງອຳນາດນິຕິບັດຍັດສັງຄົມນິຍົມໃຫ້ສົມບູນແບບ, ຕາມຈິດໃຈລັດຖະທຳມະນູນປີ 2013. ກ່ຽວກັບຂົງເຂດພົວພັນຕ່າງປະເທດ, ກອງປະຊຸມໃຫຍ່ມີແຜນນະໂຍບາຍສືບຕໍ່ປະຕິບັດແນວທາງການຕ່າງປະເທດເອກະລາດ, ເປັນເຈົ້າຕົນເອງ, ສັນຕິພາບ, ຮ່ວມມື ແລະ ພັດທະນາຢ່າງສະເໝີຕົ້ນສະເໝີປາຍ; ຫັນເປັນຫຼາຍຮູບຫຼາຍແບບ ແລະ ຫຼາຍຝ່າຍ ໃນການພົວພັນທາງການທູດ; ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ; ເປັນເພື່ອນມິດ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ ແລະ ເປັນສະມາຊິກມີຄວາມຮັບຜິດຊອບຂອງປະຊາຄົມສາກົນ; ຍົກສູງປະສິດທິຜົນການເຄື່ອນໄຫວພົວພັນຕ່າງປະເທດ, ສືບຕໍ່ນຳບັນດາການພົວພັນຮ່ວມມືໃຫ້ກ້າວເຂົ້າສູ່ລວງເລິກ.
ຫົວໜ້າຄະນະພົວພັນຕ່າງປະເທດສູນກາງ ຮ່ວາງບິ່ງກວນ ໄດ້ແຈ້ງຜົນຂອງການເລືອກຕັ້ງບັນດາອົງການນຳພາຊຸດທີ 12 ຂອງພັກກອມມູນິດຫວຽດນາມ ແລະ ໃຫ້ຮູ້ວ່າ ວິວັດແຫ່ງການສະເໜີອອກຮັບເລືອກຕັ້ງ ແລະ ເລືອກຕັ້ງທີ່ກອງປະຊຸມໃຫຍ່ໄດ້ຮັບການດຳເນີນຢ່າງປະຊາທິປະໄຕ, ຄຳຕັດສິນທັງໝົດກ່ຽວກັບລາຍຊື່ຜູ້ໄດ້ຮັບສະເໜີອອກເລືອກຕັ້ງ, ຫຼືໃຫ້ຖອນອອກຈາກລາຍຊື່ຜູ້ໄດ້ຮັບສະເໜີອອກເລືອກຕັ້ງ ແລະ ການເລືອກຕັ້ງບັນດາອົງການນຳພາລ້ວນແຕ່ໄດ້ຮັບການດຳເນີນດ້ວຍຮູບການປ່ອນບັດຢ່າງປິດລັບ.
ຫົວໜ້າຄະນະພົວພັນຕ່າງປະເທດສູນກາງ ຮ່ວາງບິງກວນ ກໍ່ຂອບອົກຂອບໃຈຄວາມເອົາໃຈໃສ່, ການສະໜັບສະໜູນຂອງ ພັກ, ອົງການຈັດຕັ້ງ ແລະ ເພື່ອນມິດສາກົນທີ່ມີຕໍ່ກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ; ພ້ອມທັງຢືນຢັນວ່າ ຈົດໝາຍ ແລະ ສານອວຍພອນ 248 ສະບັບຈາກຕ່າງປະເທດນັ້ນ ແມ່ນແຫຼ່ງລະດົມກຳລັງໃຈອັນໃຫຍ່ຫຼວງແກ່ກອງປະຊຸມໃຫຍ່, ທັງແມ່ນປະກົດການທີ່ມີຊີວິດຊີວາຂອງສາຍພົວພັນທີ່ນັບມື້ນັບເລິກເຊິ່ງລະຫວ່າງພັກກອມມູນິດ ຫວຽດນາມ ກັບບັນດາພັກການເມືອງ, ອົງການຈັດຕັ້ງ ແລະ ເພື່ອນມິດສາກົນ.