(ພາບ: Phạm Văn Thảo/Vietnam+)
|
(vovworld) – ສະຖາບັນການເມືອງແຫ່ງຊາດ ໂຮ່ຈີມິນ ຫາກໍຈັດຕັ້ງພິທີມອບຫຼຽນກາລະນຶກ “ເພື່ອພາລະກິດສ້າງສາ ແລະ ພັດທະນາສະຖາບັນການເມືອງແຫ່ງຊາດ ໂຮ່ຈີມິນ” ໃຫ້ທ່ານນາງ Preeti Saran, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສ. ອິນເດຍ ປະຈຳ ຫວຽດນາມ. ອວຍພອນໃຫ້ທ່ານນາງ Preeti Saran ທີ່ໄດ້ຮັບຂອງຂວັນອັນສູງສົ່ງທີ່ສຸດຈາກສະຖາບັນ, ສາດສະດາຈານ, ດຣ ຕະງອກເຕີ້ນ ໄດ້ຊີ້ແຈ້ງບັນດາການປະກອບສ່ວນອັນລຳ້ຄ່າຂອງເອກອັກຄະລັດຖະທູດ ອິນເດຍ ປະຈຳ ຫວຽດນາມ ສຳລັບການພັດທະນາການພົວພັນຮ່ວມມືລະຫວ່າງ 2 ປະເທດ ຫວຽດນາມ - ອິນເດຍ, ພິເສດແມ່ນບັນດາການປະກອບສ່ວນໃນການສ້າງສາ, ພັດທະນາສູນຄົ້ນຄ້ວາ ອິນເດຍ ຢູ່ ສະຖາບັນ ແລະ ກໍ່ສ້າງສາຍພົວພັນຮ່ວມມືແບບຍືນຍົງ ລະຫວ່າງສະຖາບັນການເມືອງແຫ່ງຊາດ ໂຮ່ຈີມິນ ກັບ ສ. ອິນເດຍ. ທ່ານນາງເອກອັກຄະລັດຖະທູດ Preeti Saran, ຢືນຢັນວ່າ ພາຍຫຼັງສິ້ນສຸດໜ້າທີ່ການທູດຢູ່ ຫວຽດນາມ, ໃນຖານະຕຳແໜ່ງເປັນລັດຖະມົນຕີຊ່ວຍວ່າການກະຊວງການຕ່າງປະເທດ ອິນເດຍ, ຮັບຜິດຊອບທາງທິດຕາເວັນອອກ, ທ່ານນາງຈະສືບຕໍ່ປະກອບສ່ວນໃຫ້ແກ່ການພັດທະນາການພົວພັນອັນດີງາມລະຫວ່າງ 2 ປະເທດກໍຄືລະຫວ່າງສະຖາບັນການເມືອງແຫ່ງຊາດ ໂຮ່ຈີມິນ ກັບບັນດາຫົວໜ່ວຍຄົ້ນຄ້ວາແຖວໜ້າຢູ່ ອິນເດຍ. ໂດຍຕາງໜ້າໃຫ້ລັດຖະບານ ອິນເດຍ, ທ່ານນາງ ເອກອັກຄະລັດຖະທູດ Preeti Saran ໄດ້ມອບເງິນຊ່ວຍເຫຼືອໃຫ້ແກ່ສູນຄົ້ນຄ້ວາ ອິນເດຍ ຈຳນວນ 100.000 USD.