ທ່ານລັດຖະມົນຕີການຕ່າງປະເທດ ອາເມລິກາ Antony Blinken  ມາໄວ້ອາໄລທ່ານເລຂາທິການໃຫຍ່ ຫງວຽນຝູຈ້ອງ

ທ່ານລັດຖະມົນຕີການຕ່າງປະເທດ Antony Blinken ເນັ້ນໜັກວ່າ ບັນດາການນຳ, ເຈົ້າໜ້າທີ່ອຳນາດການປົກຄອງ ອາເມລິກາ ກໍຄືທ່ານປະທານາທິບໍດີ Joe Biden ໃນນາມສ່ວນຕົວ ຍາມໃດກໍຖືທ່ານເລຂາທິການໃຫຍ່ ຫງວຽນຝູຈ້ອງ ເປັນເພື່ອນ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ. ດ້ວຍວິໄສທັດ ແລະ ພາຍໃຕ້ການຊີ້ນຳນຳພາຂອງທ່ານເລຂາທິການໃຫຍ່ນັ້ນ, ໄມຕີຈິດມິດຕະພາບ ແລະ ການພົວພັນລະຫວ່າງສອງປະເທດໄດ້ຮັບການເພີ່ມພູນຄູນສ້າງ ແລະ ພັດທະນາຢ່າງກະໂດດຂັ້ນ, ບັນລຸລະດັບສູງສຸດ ນັ້ນແມ່ນການພົວພັນຄູ່ຮ່ວມມືຍຸດທະສາດຮອບດ້ານຄືໃນປັດຈຸບັນ. ທ່ານລັດຖະມົນຕີການຕ່າງປະເທດ Antony Blinken ຢັ້ງຢືນວ່າ ທ່ານປະທານາທິບໍດີ Joe Biden, ລັດຖະບານ ແລະ ປະຊາຊົນ ອາເມລິກາ ຍາມໃດກໍຈົດຈຳ ແລະ ເຊີດຊູມໍລະດົກຂອງທ່ານເລຂາທິການໃຫຍ່ ຫງວຽນຝູຈ້ອງ ດ້ວຍນ້ຳໃຈ ແລະ ອະນຸສອນອັນດີງາມກ່ຽວກັບການນຳຜູ້ໜຶ່ງທີ່ໄດ້ສ້າງຂີດໝາຍປະຫວັດສາດໃຫ້ແກ່ການພົວພັນຮ່ວມມືອັນດີງາມລະຫວ່າງສອງປະເທດ.

        ໂດຍຕາງໜ້າຄອບຄົວ, ພັນລະຍາຂອງເລຂາທິການໃຫຍ່, ທ່ານນາງ ໂງທິເມີ້ນ ເຊື່ອໝັ້ນວ່າ ສອງຝ່າຍຈະສືບຕໍ່ປະຕິບັດຖະແຫຼງການຮ່ວມ ຫວຽດນາມ - ອາເມລິກາ ລົງເດືອນກັນຍາ 2023 ຢ່າງມີປະສິດທິຜົນ ເພື່ອຊຸກຍູ້ ແລະ ນຳການພົວພັນຮ່ວມມືສອງຝ່າຍໃຫ້ນັບມື້ນັບພັດທະນາດີງາມກວ່າ, ແທດຈິງ ແລະ ເຂົ້າສູ່ລວງເລິກ ເພື່ອຜົນປະໂຫຍດຂອງປະຊາຊົນ 2 ປະເທດ. ທ່ານນາງ ໂງທິເມີ້ນ ກໍຝາກຄຳຂອບໃຈຢ່າງຈິງໃຈ ແລະ ຄຳອວຍພອນສຸຂະພາບມາຍັງທ່ານປະທານາທິບໍດີ Joe Biden ພ້ອມດ້ວຍພັນລະຍາ ແລະ ຄອບຄົວ.