( vovworld ) – ໃນຂອບເຂດງານຕະຫຼາດນັດ - ວາງສະແດງ “ 10 ປີແຫ່ງວັນກໍ່ສ້າງ ແລະ ພັດທະນາເຂດທົ່ງພຽງແມ່ນນ້ຳຂອງທາງພາກໃຕ້ຫວຽດນາມ” ແລະ ເນື່ອງໃນໂອກາດ 37 ປີ ແຫ່ງວັນປົດປ່ອຍພາກໃຕ້ ໂຮມປະເທດຊາດເປັນເອກະພາບ. ວັນທີ 28/4, ກະຊວງການຕ່າງປະເທດ ໄດ້ສົມທົບກັບຄະນະຊີ້ນຳເຂດຕາເວັນຕົກພາກໃຕ້ ໄດ້ຈັດຕັ້ງລາຍການ “ ພົບປະທ້ອງຖິ່ນ - ຄະນະທູຕານຸທູດ ” ຢູ່ ນະຄອນ Can Tho. ກ່າວຄຳເຫັນໄຂກອງປະຊຸມ, ທ່ານຮອງລັດຖະມົນຕີການຕ່າງປະເທດ Bui Thanh Son ໄດ້ເນັ້ນໜັກວ່າ ເຂດທົ່ງພຽງແມ່ນນ້ຳຂອງ ທາງພາກໃຕ້ມີທີ່ຕັ້ງພິເສດ ແລະ ສຳຄັນຕໍ່ພາລະກິດພັດທະນາເສດຖະກິດ, ສັງຄົມ ແລະ ການເຊື່ອມໂຍງເຂົ້າກັບສາກົນຂອງຫວຽດນາມ ແລະ ນີ້ກໍແມ່ນເຂດມີທ່າແຮງ ແລະ ຄວາມສາມາດບົມຊ້ອນພັດທະນະຢ່າງຮອບດ້ານ. ແຕ່ເຂດດັ່ງກ່າວກໍພວມປະເຊີນໜ້າກັບສິ່ງທ້າທາຍຫຼາຍຢ່າງ. ທ່ານ Bui Thanh Son ເວົ້າວ່າ
“ ລາຍການພົບປະທ້ອງຖິ່ນ, ຄະນະທູຕານຸທູດແມ່ນໜື່ງໃນບັນດາຄວາມມານະພະຍາຍາມຂອງຂະແໜງການທູດຫວຽດນາມ ພ້ອມກັບທ້ອງຖິ່ນຕ່າງໆ ຍູ້ແຮງການຜັນຂະຫຍາຍແນວການຕ່າງປະເທດ, ເຊື່ອມໂຍງເຂົ້າກັບສາກົນຢ່າງຕັ້ງໜ້າ. ໃນນັ້ນມີການໂຄສະນາບັນດາຄວາມສາມາດບົ່ມຊ້ອນ, ຄວາມຮຽກຮ້ອງຕ້ອງການ ແລະ ໂອກາດພັດທະນາຂອງທ້ອງຖິ່ນ, ເພື່ອເພີ່ມທະວີການຮ່ວມມືກັບສາກົນ, ໂດຍສະເພາະແມ່ນຂົງເຂດເສດຖະກິດ ເພື່ອແນໃສ່ປະກອບສ່ວນນຳການພົວພັນຂອງຫວຽດນາມ ກັບບັນດາປະເທດຢ່າງເລິກເຊິ່ງກວ່າ. ເພີ່ມທະວີການພົວພັນແລກປ່ຽນລະຫວ່າງປະຊາຊົນຫວຽດນາມ ກັບເພື່ອນມິດສາກົນ. ຍູ້ແຮງການເຊື່ອມຕໍ່ປະຊາຄົມວິສາຫະກິດຂອງຫວຽດນາມກັບບັນດາຄູ່ຮ່ວມມືຕ່າງປະເທດ ”.