ໂດຍຕາມປະເພນີແລ້ວ, ໃນຈຸດເວລາສົ່ງທ້າຍປີເກົ່າ ຕ້ອນຮັບປີໃໝ່, ປະທານປະເທດຫວຽດນາມໄດ້ຝາກຄຳອວຍພອນໄຊອັນປະເສີດ ເຖິງພໍ່ແມ່ປະຊາຊົນ, ທະຫານ ຕຳຫຼວດໃນທົ່ວປະເທດ ແລະຊາວຫວຽດນາມອາໄສຢູ່ຕ່າງປະເທດ. ພວກເຣົາຂໍຖືເປັນກຽດສົ່ງຄຳອວຍພອນປີໃໝ່ ປີ ມະໂຣງ 2012 ຂອງປະທານປະເທດເຈືອງເຕີນຊາງ ເຖິງທ່ານຜູ້ຟັງຜູ້ອ່ານທັງຫຼາຍ
ພໍ່ແມ່ປະຊາຊົນ, ບັນດາທະຫານ ຕຳຫຼວດທົ່ວປະເທດ ແລະພໍ່ແມ່ປະຊາຊົນຊາວຫວຽດນາມອາໄສຢູ່ຕ່າງປະເທດທີ່ຮັກແພງ!
ໃນຈຸດເວລາສົ່ງທ້າຍປີເກົ່າ ຕ້ອນຮັບປີໃໝ່ ປີມະໂຣງ 2012, ຂ້າພະເຈົ້າຂໍຝາກຄຳອວຍພອນໄຊອັນປະເສີດທີ່ສຸດ ເຖິງພໍ່ແມ່ປະຊາຊົນ, ທະຫານຕຳຫຼວດໃນທຸກແຖບຖິ່ນຂອງທົ່ວປະເທດ ແລະພໍ່ແມ່ປະຊາຊົນຊາວຫວຽດນາມອາໄສຢູ່ຕ່າງປະເທດ. ພິເສດ ຂ້າພະເຈົ້າຂໍສະແດງອາລົມຈິດ ອັນສະໜິດສະໜົມທີ່ສຸດມາຍັງບັນດາພະນັກງານ, ນັກຮົບພວມປະຕິບັດໜ້າທີ່ຢູ່ບັນດາເຂດຊາຍແດນ ເຂດໝູ່ເກາະທີ່ຫ່າງໄກສອກຫລິກ; ພະນັກງານ ລັດຖະກອນ, ພາລະກອນ ຍ້ອນຄວາມຮຽກຮ້ອງຕ້ອງການຂອງພາລະໜ້າທີ່ ຕ້ອງຕ້ອນຮັບບຸນເຕັດໄກຈາກຄອບຄົວ. ຂໍອວຍພອນໃຫ້ປະເທດຫວຽດນາມຈົ່ງມີຄວາມສະຫງົບສຸກ, ວັດທະນະຖາວອນ, ອວຍພອນໃຫ້ທຸກໆຄົນ ທຸກໆຄອບຄົວ ຈົ່ງມີຄວາມອີ່ມໜຳສຳລານ ແລະມີຄວາມຜາສຸກ. ຂ້າພະເຈົ້າກໍຝາກນ້ຳໃຈມິດຕະພາບຂອງປະຊາຊົນຫວຽດນາມ ພ້ອມດ້ວຍຄຳອວຍພອນສັນຕິພາບ, ສະຖຽນລະພາບ, ການຮ່ວມມື ແລະພັດທະນາ ເຖິງບັນດາເພື່ອນມິດຕ່າງປະເທດທີ່ພວມດຳລົງຊີວິດ ແລະເຮັດວຽກຢູ່ຫວຽດນາມ ແລະປະຊາຊົນ ປະຊາຊາດຢູ່ໃນໂລກ.
ປີ 2011 ທີ່ຜ່ານມາ, ເຖິງວ່າໄດ້ປະສົບກັບຄວາມຫຍຸ້ງຍາກ, ການທ້າທາຍຫຼາຍປະການກໍຕາມ ແຕ່ດ້ວຍການຮ່ວມແຮງຮ່ວມໃຈ, ຄວາມ ມານະພະຍາຍາມສູ້ຊົນສູງຂອງ ພໍ່ແມ່ປະຊາຊົນ, ສະຫາຍ, ນັກຮົບທົ່ວປະເທດ, ປະເທດຫວຽດນາມບັນລຸໄດ້ບັນດາຜົນງານສຳຄັນ ກ່ຽວກັບການຈະເລີນເຕີບໂຕດ້ານເສດຖະກິດ, ພະຍາຍາມຮັບປະກັນຊີວິດການເປັນຢູ່ຂອງປະຊາຊົນໃຫ້ເປັນປົກກະຕິ; ຮັກສາສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ, ປັບປຸງການປ້ອງກັນຊາດ ປ້ອງກັນຄວາມສະຫງົບ, ຮັກສາເອກະລາດ, ອະທິປະໄຕ ຄວາມເປັນເອກະພາບ ແລະຜືນແຜ່ນດິນອັນຄົບຖ້ວນໄດ້ຢ່າງໝັ້ນຄົງ; ເພີ່ມທະວີການເຄື່ອນໄຫວການຕ່າງປະເທດ, ເຊື່ອມໂຍງເຂົ້າກັບໂລກ, ຍົກສູງອິດທິພົນຊື່ສຽງຂອງຫວຽດນາມໃນເວທີສາກົນ.
ກ້າວເຂົ້າສູ່ປີໃໝ່ ປີມະໂຣງ 2012, ເຖິງວ່າຍັງມີຄວາມຫຍຸ້ງຍາກຫຼາຍຢ່າງກໍຕາມ ແຕ່ດ້ວຍຄວາມເຊື່ອໝັ້ນອັນແນ່ວແນ່ຕໍ່ພາລະກິດປ່ຽນແປງໃໝ່ ແລະອະນາຄົດອັນສົດໃສຂອງປະເທດຊາດ, ທົ່ວພັກ, ທົ່ວກອງທັບ ແລະທົ່ວປວງຊົນ, ຊາວຫວຽດນາມທຸກຄົນ ຈົ່ງສາມັກຄີກັນເປັນຈິດໜື່ງໃຈດຽວ, ເສີມຂະຫຍາຍຄຸນນະທາດ, ພູມປັນຍາ ແລະມູນເຊື້ອອະລິຍາທຳຫວຽດນາມ, ກຳແໜ້ນກາລະໂອກາດ, ຜ່ານຜ່າຄວາມຫຍຸ້ງຍາກ, ການທ້າຍທາຍ, ຍູ້ແຮງການແຂ່ງຂັນຮັກຊາດ, ປະຕິບັດບັນດາຈຸດໝາຍ, ໜ້າທີ່ໃນທຸກຂົງເຂດຢ່າງມີໄຊ, ສືບຕໍ່ຍາດໄດ້ບັນດາຜົນງານອັນໃຫ່ຍຫຼວງກ່ວາເກົ່າ ໃນພາລະກິດຫັນເປັນອຸດສາຫະກຳ ແລະທັນສະໄໝ, ສ້າງສາ ແລະປົກປັກຮັກສາປະເທດສັງຄົມນິຍົມຫວຽດນາມ, ສ້າງສາປະເທດຊາດໃຫ້ນັບມື້ນັບຮັ່ງມີ ສວຍງາມ, ສີວິໄລ, ປະຊາຊົນມີຊີວິດທີ່ນັບມື້ນັບອີ່ມໜຳສຳລານ ແລະມີຄວາມຜາສຸກ.
ຊົມເຊີຍລະດູບານໃໝ່, ພະລັງຊີວິດໃໝ່, ໄຊຊະນະໃໝ່!”