ການຢ້ຽມຢາມແມ່ນໜຶ່ງໃນບັນດາຂີດໝາຍສຳຄັນໃນປະຫວັດສາດການພົວພັນສອງປະເທດ, ປະກອບສ່ວນຊຸກຍູ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ ໃຫ້ພັດທະນາຂຶ້ນສູ່ລະດັບສູງໃໝ່, ນັບມື້ນັບເຂົ້າສູ່ລວງເລິກ, ມີປະສິດທິຜົນ ແລະ ແທດຈິງ, ນຳມາເຊິ່ງຄວາມວັດທະນາຖາວອນໃຫ້ແກ່ປະຊາຊົນແຕ່ລະປະເທດ.

       ການພົວພັນສາມັກຄີແບບພິເສດໄດ້ຮັບການເພີ່ມພູນຄູນສ້າງຢ່າງບໍ່ຢຸດຢັ້ງ

        ການຢ້ຽມຢາມທາງລັດຖະກິດຢູ່ ຫວຽດນາມ ຂອງທ່ານເລຂາທິການໃຫຍ່, ປະທານປະເທດ ລາວ ທອງລຸນ ສີສຸລິດ ໄດ້ດຳເນີນໃນສະພາບການພົວພັນສອງປະເທດທີ່ພວມມີທ່າອ່ຽງພັດທະນາເປັນຢ່າງດີທີ່ສຸດ ແລະ ບັນລຸໄດ້ຜົນງານສຳຄັນຫຼາຍຢ່າງ. ການພົວພັນນັ້ນ ຍັງແມ່ນພື້ນຖານໃຫ້ແກ່ການເພີ່ມທະວີການຮ່ວມມືລະຫວ່າງສອງປະເທດໃນທຸກຂົງເຂດອີກດ້ວຍ.

        ການພົວພັນດ້ານການເມືອງ ສືບຕໍ່ໄດ້ຮັບການເພີ່ມທະວີ ແລະ ນັບມື້ນັບເຂົ້າສູ່ລວງເລິກ, ມີຄວາມຜູກພັນຮັກໄຄ່, ໄວ້ເນື້ອເຊື່ອໃຈ, ສວມບົດບາດເປັນແກ່ນສານ, ກຳນົດທິດສັງລວມໃນການພົວພັນສອງປະເທດ. ສອງຝ່າຍຍາມໃດກໍຢັ້ງຢືນການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ ແມ່ນຊັບສົມບັດລວມທີ່ລ້ຳຄ່າຂອງສອງພັກ, ສອງຊາດ, ແມ່ນແຫຼ່ງກຳລັງແຮງອັນໃຫຍ່ຫຼວງທີ່ສຸດຂອງສອງຊາດ, ຕ້ອງໄດ້ຮັບການຖະໜຸຖະໜອມ, ເສີມຂະຫຍາຍ ແລະ ສືບທອດໃຫ້ຄົນລຸ້ນຫຼັງ. ແຜນນະໂຍບາຍສະເໝີຕົ້ນສະເໝີປາຍຂອງ ຫວຽດນາມ ແມ່ນໃຫ້ບຸລິມະສິດແຖວໜ້າໃຫ້ແກ່ການພັດທະນາການພົວພັນຮ່ວມມືກັບ ລາວ ເຂົ້າສູ່ລວງເລິກ, ມີປະສິດທິຜົນ, ຍືນຍົງ, ຖືນີ້ແມ່ນໜ້າທີ່ຍຸດທະສາດ, ສາຍພົວພັນແຖວໜ້າໃນນະໂຍບາຍການຕ່າງປະເທດ. ທ່ານ ເລຮວ່າຍຈູງ ຫົວໜ້າຄະນະພົວພັນຕ່າງປະເທດສູນກາງພັກ ເນັ້ນໜັກວ່າ:

        “ນີ້ແມ່ນບັນດາການເຄື່ອນໄຫວພົວພັນຕ່າງປະເທດມີຄວາມສຳຄັນເປັນພິເສດສຳລັບພັກ, ລັດ, ໂດຍໄດ້ດຳເນີນໃນສະພາບການສອງພັກ, ສອງລັດ ລ້ວນແຕ່ຕັ້ງໜ້າປະຕິບັດມະຕິກອງປະຊຸມໃຫຍ່ຂອງສອງພັກ, ໝາຍເຖິງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກປະຊາຊົນປະຕິວັດລາວ  ແລະ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກຄອມມູນິດ ຫວຽດນາມ ແລະ ພວມກະກຽມມຸ່ງໄປເຖິງການກະກຽມຈັດກອງປະຊຸມໃຫຍ່ຂອງສອງປະເທດໃນຕົ້ນປີ 2026. ນີ້ແມ່ນການຢ້ຽມຢາມທີ່ດຳເນີນໄວທີ່ສຸດ ພາຍຫຼັງທີ່ທ່ານປະທານປະເທດ ໂຕເລິມ ໄດ້ຮັບການເລືອກຕັ້ງຈາກຄະນະບໍລິຫານງານສູນກາງພັກໃຫ້ດຳລົງຕຳແໜ່ງເປັນເລຂາທິການໃຫຍ່, ຄະນະບໍລິຫານງານສູນກາງພັກຄອມມູນິດ ຫວຽດນາມ. ນີ້ແມ່ນໂອກາດເພື່ອໃຫ້ສອງພັກຢັ້ງຢືນການຖືເປັນສຳຄັນແບບພິເສດກ່ຽວກັບການພົວພັນ ຫວຽດນາມ ແລະ ລາວ”.

        ຫວຽດນາມ ແລະ ລາວ ຍາມໃດກໍເສີມຂະຫຍາຍບັນດາກົນໄກຮ່ວມມືທີ່ມີຢູ່ແລ້ວ, ພ້ອມທັງສຳຫຼວດກວດກາ, ດັດປັບບັນດາກົນໄກຮ່ວມມື ແລະ ເສີມຂະຫຍາຍບັນດາກົນໄກຮ່ວມມືໃໝ່; ສຸມໃສ່ແລກປ່ຽນກ່ຽວກັບການຮ່ວມມືໃນບັນດາບັນຫາຍຸດທະສາດ, ແຜນນະໂຍບາຍ, ນະໂຍບາຍທີ່ກ່ຽວຂ້ອງເຖິງການປ້ອງກັນຄວາມສະຫງົບ, ການພັດທະນາຂອງແຕ່ລະປະເທດ. ສອງຝ່າຍໄດ້ລົງນາມໃນເອກະສານຮ່ວມມືຫຼາຍສະບັບໃນຫຼາຍຂົງເຂດສຳຄັນລະຫວ່າງສອງພັກ, ສອງລັດ, ປະກອບສ່ວນເຮັດໃຫ້ການພົວພັນຄູ່ຮ່ວມມືຮອບດ້ານລະຫວ່າງ ຫວຽດນາມ -  ລາວ ໃນໄລຍະໃໝ່ເລິກເຊິ່ງກວ່າເກົ່າ. ພິເສດ, ການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ແມ່ນຈຸດເດັ່ນຂອງການພົວພັນ ຫວຽດນາມ -ລາວ, ດ້ວຍວົງເງິນການຄ້າ ຫວຽດນາມ - ລາວ ປີ 2023 ບັນລຸ 1,6 ຕື້ USD. 08 ເດືອນຂອງປີນີ້, ວົງເງິນການຄ້າສອງປະເທດບັນລຸປະມານ 1,3 ຕື້ USD, ເພີ່ມຂຶ້ນກວ່າ 16% ເມື່ອທຽບໃສ່ໄລຍະດຽວກັນຂອງປີ 2023.

ພ້ອມກັນພັດທະນາຢ່າງມີສະຖຽນລະພາບ, ໝັ້ນແກ່ນກວ່າໃນໄລຍະຈະມາເຖິງ

        ໃນການຢ້ຽມຢາມ, ເຮັດວຽກຄັ້ງຕ່າງໆ, ການນຳສອງປະເທດ ຍາມໃດກໍມີການແລກປ່ຽນຢ່າງແທດຈິງ, ກົງໄກກົງມາ, ກຳນົດທິດການພົວພັນລະຫວ່າງສອງພັກ, ສອງລັດ ພັດທະນາຢ່າງມີສະຖຽນລະພາບ, ໝັ້ນແກ່ນ ແລະ ມີປະສິດທິຜົນກວ່າ. ໄປຄຽງຄູ່ກັນນັ້ນ, ການນຳສອງປະເທດຍາມໃດກໍສົມທົບ, ສະໜັບສະໜູນຫຼັກໝັ້ນຂອງກັນໃນບັນດາເວທີປາໄສຫຼາຍຝ່າຍ. ການຢ້ຽມຢາມທາງລັດຖະກິດຢູ່ ຫວຽດນາມ ຂອງທ່ານເລຂາທິການໃຫຍ່, ປະທານປະເທດ ລາວ ທອງລຸນ ສີສຸລິດ ຄັ້ງນີ້ ກໍເພື່ອແນໃສ່ເຮັດໃຫ້ການພົວພັນສອງປະເທດເລິກເຊິ່ງກວ່າ ໃນສະພາບການໂລກ ແລະ ພາກພື້ນມີການຜັນແປຫຼາຍຢ່າງ. ທ່ານເລຮວ່າຍຈູງ ໃຫ້ຮູ້ວ່າ:

        “ໃນໂອກາດນີ້, ການນຳສອງພັກ, ສອງລັດ ຈະແລກປ່ຽນຂໍ້ມູນຂ່າວສານໃຫ້ກັນຮັບຊາບສະພາບການຂອງແຕ່ລະພັກ, ແຕ່ລະປະເທດ, ແລກປ່ຽນກ່ຽວກັບສະພາບການສາກົນ, ຕີລາຄາກ່ຽວກັບບັນດາໝາກຜົນທີ່ບັນລຸໄດ້ໃນການຮ່ວມມືໃນໄລຍະຜ່ານມາ. ພິເສດ, ວາງອອກບັນດາທິດທາງເພື່ອຍົກສູງປະສິດທິຜົນ, ປະສິດທິພາບການຮ່ວມມືໃນໄລຍະຈະມາເຖິງ ເພື່ອຕອບສະໜອງຜົນປະໂຫຍດຂອງປະຊາຊົນສອງປະເທດ, ສອງພັກ, ເພື່ອສັນຕິພາບ, ສະຖຽນລະພາບ, ການຮ່ວມມືພັດທະນາໃນພາກພື້ນ ແລະ ໃນໂລກ.”

        ໃນໄລຍະໃໝ່, ສະພາບການໂລກ ແລະ ພາກພື້ນ ສືບຕໍ່ມີການຜັນແປຢ່າງວ່ອງໄວ ແລະ ສັບສົນ, ເພື່ອຮັບປະກັນການປະຕິບັດພາລະກິດແຫ່ງການປ່ຽນແປງໃໝ່ຢູ່ແຕ່ລະປະເທດ, ມະຕິກອງປະຊຸມໃຫຍ່ທົ່ວປະເທດຂອງແຕ່ລະພັກຢ່າງມີໄຊ, ສອງຝ່າຍຕ້ອງສືບຕໍ່ຢັ້ງຢືນຄວາມສຳຄັນ ແລະ ຄວາມໝາຍຍຸດທະສາດຂອງການພົວພັນສາມັກຄີແບບພິເສດໃນສະພາບການໃໝ່, ບົນພື້ນຖານປະຕິບັດບັນດາຫຼັກການເຊິ່ງສອງພັກໄດ້ຕົກລົງເປັນເອກະພາບຢ່າງສະເໝີຕົ້ນສະເໝີປາຍ, ສອງຝ່າຍຕົກລົງເຫັນດີຍູ້ແຮງການພົວພັນຮ່ວມມືຮອບດ້ານ ຫວຽດນາມ - ລາວ ຫຼາຍກວ່າອີກ ບົນພື້ນຖານເສີມຂະຫຍາຍນ້ຳໃຈເອກະລາດ, ເປັນເຈົ້າຕົນເອງ ແລະ ເຈດຈຳນົງເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ, ຮ່ວມມືຢ່າງຍຸຕິທຳຕ່າງຝ່າຍຝ່າຍມີຜົນປະໂຫຍດ, ສົມທົບລັກສະນະພິເສດຂອງການພົວພັນ ຫວຽດນາມ - ລາວ ກັບ ທຳນຽມສາກົນ ຢ່າງສົມເຫດສົມຜົນ.

        ພ້ອມກັບການພັດທະນາຂອງການພົວພັນ ຫວຽດນາມ - ລາວ, ການຢ້ຽມຢາມຄັ້ງຕ່າງໆຂອງການນຳສອງປະເທດເວົ້າລວມ, ການຢ້ຽມຢາມ ຫວຽດນາມ ຂອງທ່ານເລຂາທິການໃຫຍ່, ປະທານປະເທດ ທອງລຸນ ສີສຸລິດ ຄັ້ງນີ້ ເວົ້າສະເພາະ, ໄດ້ປະກອບສ່ວນຢັ້ງຢືນວ່າ ພັກ, ລັດ ແລະ ປະຊາຊົນສອງປະເທດ ຈະຕັດສິນໃຈພ້ອມກັນຖະໜຸຖະໜອມ, ເພີ່ມພູນຄູນສ້າງ ແລະ ພັດທະນາການພົວພັນມິດຕະພາບ ຫວຽດນາມ - ລາວ ບໍ່ວ່າໃນໄລຍະໃດຂອງປະຫວັດສາດ./.