(vovworld) - ປະຈຸບັນ, ແຂວງບິ່ງດິ້ງ ພວມຜັນຂະຫຍາຍໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ຢ່າງຕັ້ງໜ້າ. ຍ້ອນເຮັດວຽກງານໂຄສະນາໄດ້ດີ, ດັ່ງນັ້ນໂຄງການໄດ້ຮັບຄວາມເຫັນດີເຫັນພ້ອມ ແລະ ການສະໜັບສະໜູນຢ່າງຕັ້ງໜ້າຈາກປະຊາຊົນ.
ການກໍ່ສ້າງທາງລະຫວ່າງຕາແສງຢູ່ແຂວງບິ່ງດິ້ງ
(ພາບ: ອິນເຕີແນດ)
ແຂວງບິ່ງດິ້ງ ໄດ້ເລືອກເອົາ 4 ຕາແສງເພື່ອຜັນຂະຫຍາຍທົດລອງໂຄງການກໍ່ສ້າງຊົນນະບົດໃໝ່ຢູ່ທ້ອງຖີ່ນໃນໄລຍະ 2011 – 2020, ນັ້ນແມ່ນຕາແສງເຍິນໂລກ (ເທດສະບານອານເຍີນ), ບິ່ງງີ (ເມືອງໄຕເຊີນ), ຮ່ວາຍເຮືອງ (ເມືອງຮ່ວາຍເຍີນ), ເອິນແທກ (ເມືອງຮ່ວາຍເອິນ). ພ້ອມກັນນັ້ນ, ທາງແຂວງກໍ່ໄດ້ວາງຈຸດໝາຍຮອດປີ 2015, ທົ່ວແຂວງຈະມີ 26 ຕາແສງບັນລຸມາດຖານກ່ຽວກັບການກໍ່ສ້າງຊົນນະບົດໃໝ່ ແລະ ຮອດປີ 2020, ທົ່ວແຂວງຈະມີ 65 ຕາແສງບັນລຸມາດຖານຊົນນະບົດໃໝ່, ກວມ 50% ຈຳນວນຕາແສງໃນເຂດຊົນນະບົດ.
ໄປບິ່ງດິ້ງ ໃນຊຸມມື້ນີ້, ຈຶ່ງຮັບຮູ້ໄດ້ບັນຍາກາດກໍ່ສ້າງຊົນນະບົດໃໝ່ ເຊິ່ງພວມໄດ້ຮັບການຜັນຂະຫຍາຍຢູ່ຫຼາຍໝູ່ບ້ານ. ຢູ່ຕາແສງມິ້ໂລກ, ເມືອງຟູ່ມິ້, ປະຊາຊົນພວມຖອກເບຕົງກໍ່ສ້າງເສັ້ນທາງລະຫວ່າງບ້ານຕອນສຸດທ້າຍ. ນອກຈາກມາດຖານກ່ຽວກັບແຜນກຳນົດ, ຫຼຸດຜ່ອນຈຳນວນຄອບຄົວທີ່ທຸກຍາກແລ້ວ, ການນຳຕາແສງມິ້ໂລກ ພວມສຸມໃສ່ກໍ່ສ້າງບັນດາເສັ້ນທາງຄົມມະນາຄົມຊົນນະບົດທີ່ຍັງບໍ່ທັນກໍ່ສ້າງສຳເລັດ. ເສັ້ນທາງໄດ້ຮັບການເປີດກວ້າງເຖິງບ່ອນໃດ, ປະຊາຊົນກໍ່ກຽມພ້ອມສະຫງວນທີ່ດິນ, ຕົ້ນໄມ້, ພືດສຳຮອງເຖິງບ່ອນນັ້ນ ໂດຍບໍ່ຮັບເງິນຊົດເຊີຍ. ມາຮອດປະຈຸບັນ, ທາງຄົມມະນາຄົມຊົນນະບົດກວ່າ 5 ກມ ໄດ້ຮັບການກໍ່ສ້າງສຳເລັດ ຍ້ອນມີການສະຫງວນທີ່ດິນ, ຕົ້ນໄມ້ໃນສວນ ແລະ ພືດສຳຮອງຂອງປະຊາຊົນ. ທ່ານ ດັ້ງວັນກວາງ, ຜູ້ທີ່ໄດ້ສະຫງວນທີ່ດິນ ແລະ ຕົ້ນໄມ້ໃນສວນຂອງຕົນໃຫ້ແກ່ການກໍ່ສ້າງທາງ, ແບ່ງປັນວ່າ:
“ຂ້າພະເຈົ້າ ພ້ອມດ້ວຍຄອບຄົວ ໄດ້ເຫັນອົກເຫັນໃຈ ແລະ ລະດົມປະຊາຊົນສະຫງວນທີ່ດິນກໍ່ສ້າງເສັ້ນທາງໃຫ້ໃຫຍ່ໂຕ ແລະ ສະອາດ, ສວຍງາມ. ຖ້າຫາກຕ້ອງໃຊ້ຄ່າຊົດເຊີຍໃຫ້ແກ່ການບຸກເບີກໜ້າພຽງ, ທາງແຂວງຈະບໍ່ມີເງິນເພື່ອຈ່າຍ”.
ປະຊາຊົນນັບຮ້ອຍຄອບຄົວຢູ່ບັນດາຕາແສງມິ້ຮຽບ, ມິ້ເຈົາ, ເມືອງຟູ໋ມິ້ ໄດ້ສະຫງວນທີ່ດິນ, ພືດສຳຮອງ ແລະ ແຮງງານດ້ວຍຄວາມສະໝັກໃຈ ເພື່ອພ້ອມກັບທ້ອງຖີ່ນກໍ່ສ້າງສຳເລັດບັນດາກິດຈະກຳພື້ນຖານໂຄງລ່າງ. ທ່ານ ໂງດິ່ງບາ, ຮອງຫົວໜ້າຫ້ອງກະສີກຳ ແລະ ພັດທະນາຊົນນະບົດເມືອງຟູ່ມິ້, ແຂວງບິ່ງດິ້ງ ຖືວ່າ:
“ໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ມີຄວາມສະດວກຫຼາຍຢ່າງ, ນັ້ນແມ່ນໄດ້ຮັບຄວາມເຫັນດີເຫັນພ້ອມ ແລະ ການສະໜັບສະໜູນຈາກປະຊາຊົນ. ໃນໄລຍະຜ່ານມາມີປະຊາຊົນນັບຮ້ອຍຄອບຄົວໃນເຂດກໍ່ສ້າງຊົນນະບົດໃໝ່ ໄດ້ສະຫງວນທີ່ດິນ, ຕົ້ນໄມ້, ແຮງງານ ກໍ່ຄືບໍລິຈາກເງິນຮັບໃຊ້ບັນດາກິດຈະການກໍ່ສ້າງພື້ນຖານ”.
ບໍ່ພຽງແຕ່ຢູ່ເຂດທົ່ງພຽງເທົ່ານັ້ນ, ຫາກໂຄງການກໍ່ສ້າງຊົນນະບົດໃໝ່ຍັງສ້າງບາດກ້າວພັດທະນາຢ່າງແຮງຢູ່ເມືອງຕ່າງໆໃນເຂດພູດອຍແຂວງບິ່ງດິ້ງ. ປີ 2012, ອຳນາດການປົກຄອງ ແລະ ປະຊາຊົນເມືອງພູດອຍວິ້ງແທກ, ໄດ້ປະກອບເຫື່ອແຮງເພື່ອກໍ່ສ້າງທາງຄົມມະນາຄົມລະຫວ່າງເມືອງ, ລະຫວ່າງບ້ານດ້ວຍລວງຍາວເກືອບ 22 ກມ. ທ່ານ ເລວັນເດົາ, ປະທານຄະນະກຳມະການປະຊາຊົນເມືອງວິ້ງແທກ, ແຂວງບິ່ງດິງ ໃຫ້ຮູ້ວ່າ:
“ຄວາມຫຍຸ້ງຍາກທີ່ສຸດໃນການກໍ່ສ້າງທາງຄົມມະນາຄົມນັ້ນແມ່ນການບຸກເບີກໜ້າພຽງ, ແຕ່ສຳລັບເມືອງວິ້ງແທກແລ້ວ, ຍ້ອນເຮັດວຽກງານໂຄສະນາໄດ້ດີ, ວຽກງານບຸກເບີກໜ້າພຽງຈຶ່ງສະດວກສະບາຍ. ປະຊາຊົນພ້ອມແລ້ວທີ່ຈະສະຫງວນທີ່ດິນເພື່ອກໍ່ສ້າງທາງຄົມມະນາຄົມຊົນນະບົດ. ນອກຈາກຄວາມສະດວກແລ້ວ, ຍັງມີຄວາມຫຍຸ້ງຍາກຈຳນວນໜຶ່ງ, ໃນນັ້ນມີມາດຖານຫຼຸດຜ່ອນອັດຕາຄອບຄົວທຸກຍາກໃຫ້ລົງເຫຼືອພຽງ 5%”
ອາດເວົ້າໄດ້ວ່າ, ໂຄງການກໍ່ສ້າງຊົນນະບົດໃໝ່ຢູ່ບິ່ງດິ້ງ ໄດ້ເຮັດໃຫ້ພື້ນຖານໂຄງລ່າງໄດ້ຮັບການປັບປຸງເທື່ອລະກ້າວ, ລະບົບຄົມມະນາຄົມ, ຊົນລະປະທານ, ໂຮງຮຽນ, ສຸກສາລາ… ໄດ້ຮັບການລົງທຶນກໍ່ສ້າງ. ພິເສດແມ່ນຄວາມຄິດ, ວິທີເຮັດຂອງປະຊາຊົນໃນການຜະລິດກະສີກຳຄື ການປູກຝັງ, ລ້ຽງສັດໄດ້ຮັບການປ່ຽນແປງເທື່ອລະກ້າວ; ບັນດາຄວາມກ້າວໜ້າດ້ານວິທະຍາສາດ, ເຕັກນິກໃໝ່, ແນວພັນປູກ, ສັດລ້ຽງທີ່ມີສະມັດຕະພາບ, ຄຸນນະພາບສູງຖືກນຳເຂົ້າການຜະລິດນັບມື້ນັບຫຼາຍກວ່າ. ໃນໄລຍະຈະມາເຖິງ, ບິ່ງດິ້ງ ຈະສືບຕໍ່ຍູ້ແຮງການຜະລິດ, ຫັນປ່ຽນຜົນລະປູກ, ສັດລ້ຽງ, ຂະແໜງອາຊີບຢູ່ເຂດຊົນນະບົດ, ພັດທະນາກະສີກຳຕາມທິດຜະລິດເປັນສິນຄ້າ, ນຳໃຊ້ເຕັກໂນໂລຢີທີ່ກ້າວໜ້າ ເພື່ອເຮັດໃຫ້ແຜນນະໂຍບາຍກໍ່ສ້າງຊົນນະບົດໃໝ່ນັບມື້ນັບກ້າວເຂົ້າສູ່ຊີວິດຢ່າງແທ້ຈິງ.