(vovworld) - ວັນທີ 29/6, ສະພາທິດສະດີສູນກາງ ອາຍຸການ 2011 – 2015 ໄດ້ດຳເນີນກອງປະຊຸມຄັ້ງທີ 4, ໂດຍສຸມໃສ່ປຶກສາຫາລື, ໃຫ້ຄຳເຫັນກ່ຽວກັບບັນດາເນຶ້ອໃນຄື: ຮ່າງແຜນການສືບຕໍ່ປ່ຽນແປງໃໝ່, ຍົກສູງຄຸນນະພາບການເຄື່ອນໄຫວຂອງສະພາທິດສະດີສູນກາງ ແລະ ຮ່າງລະບຽບການເຮັດວຽກຂອງບັນດາອະນຸກຳມະການຂອງສະພາ, ຮ່າງ “ບົດລາຍງານປ່ຽນໃໝ່, ຍົກສູງປະສິດທິຜົນຂອງລັດວິສາຫະກິດ, ຮັບປະກັນບົດບາດເປັນແກ່ນສານ ຂອງເສດຖະກິດແຫ່ງລັດໃນພື້ນຖານເສດຖະກິດຕະຫຼາດກຳນົດທິດສັງຄົມນິຍົມ”. ກ່າວຄຳເຫັນຊີ້ນຳ, ທ່ານ Dinh The Huynh, ເລຂາສູນກາງພັກ, ຫົວໜ້າຄະນະໂຄສະນາສູນກາງ, ປະທານສະພາທິດສະດີສູນກາງ ຊີ້ແຈງວ່າ: ບັນຫາທີ່ວາງອອກນັ້ນແມ່ນ: ສະພາທິດສະດີສູນກາງຄວນສືບຕໍ່ປ່ຽນໃໝ່ຢ່າງຮອບດ້ານ, ເຂັ້ມແຂງ ທັງດ້ານເນື້ອໃນ ແລະ ຮູບການເຄື່ອນໄຫວຂອງສະພາ, ອົງການສະພາ ເພື່ອແນໃສ່ຍົກສູງຄຸນນະພາບ, ປະສິດທິຜົນການໃຫ້ຄຳປຶກສາບັນດາບັນຫາທິດສະດີການເມືອງຕາມບົດບາດໜ້າທີ່ ທີ່ກົມການເມືອງ ແລະ ຄະນະເລຂາໄດ້ມອບໝາຍໃຫ້. ໃນອາຍຸການນີ້, ກໍຄວນຍົກສູງຄຸນນະພາບການເຄື່ອນໄຫວຂອງບັນດາອະນຸກຳມະການ. ນີ້ກໍແມ່ນໜຶ່ງໃນບັນດາເນື້ອໃນປ່ຽນໃໝ່ຮູບການເຄື່ອນໄຫວຂອງສະພາ.
ກ່ຽວກັບຮ່າງບົດລາຍງານປ່ຽນໃໝ່, ຍົກສູງປະສິດທິຜົນລັດວິສາຫະກິດ, ທ່ານ Dinh The Huynh ສະເໜີໃຫ້ບັນດາຜູ້ແທນສຸມໃສ່ປຶກສາຫາລື ບັນດາບັນຫາເຮັດໃຫ້ຈະແຈ້ງບົດບາດ, ທີ່ຕັ້ງຕົ້ນຕໍ່ຂອງລັດວິສາຫະກິດ ເຊິ່ງແກ່ນສານແມ່ນລັດວິສາຫະກິດໃນພື້ນຖານເສດຖະກິດຕະຫຼາດ ກຳນົດທິດສັງຄົມນິຍົມ, ເຮັດແຈ້ງທັດສະນະກ່ຽວກັບການຕີລາຄາລັດວິສາຫະກິດກ່ຽວກັບດ້ານເສດຖະກິດ, ການເມືອງ, ສັງຄົມ, ປ້ອງກັນຊາດ, ປ້ອງກັນຄວາມສະຫງົບ, ພົວພັນຕ່າງປະເທດ. ຈາກນັ້ນ ປະກອບສ່ວນຕີລາຄາຢ່າງຖືກຕ້ອງ ແລະ ສ້າງຄວາມເຫັນດີເຫັນພ້ອມໃນສັງຄົມ ກ່ຽວກັບທີ່ຕັ້ງບົດບາດຂອງເສດຖະກິດແຫ່ງລັດ ເຊິ່ງແກ່ນສານແມ່ນລັດວິສາຫະກິດໃນພື້ນຖານເສດຖະກິດຂອງລັດ.