ການເຈລະຈາຂັ້ນສູງຕາມຮູບການ “4 ຝ່າຍ Normandie”
(ພາບ: AFP/ TTXVN)
|
(vovworld) - ພາຍຫຼັງເຈລະຈາມາເປັນເວລາ 16 ຊົ່ວໂມງ, ວັນທີ 12/2, ການນຳ 4 ປະເທດ: ຢູແກຼນ, ລັດເຊຍ, ຝລັ່ງ ແລະ ເຢຍລະມັນ ບັນລຸໄດ້ຂໍ້ຕົກລົງຢຸດຍິງ
Minsk.
ຖະແຫຼງການຕໍ່ວົງການນັກຂ່າວກ່ຽວກັບໝາກຜົນການເຈລະຈາ, ປະທານາທິບໍດີລັດເຊຍ Vladimir Putin ໃຫ້ຮູ້ວ່າ, ບັນດາຝ່າຍໄດ້ລົງນາມໃນເອກະສານກ່ຽວກັບບັນດາມາດຕະການສັງລວມ ແນໃສ່ບັນລຸຂໍ້ຕົກລົງ Minsk. ເອກະສານຊີ້ແຈ້ງວ່າ, ກອງທັບຢູແກຼນ ຈະຖອນອາວຸດອອກຈາກເຂດຊາຍແດນໃນປະຈຸບັນ, ສ່ວນທະຫານລາດ Donbass ຈະຖອນອອກຈາກເຂດຊາຍແດນຕາມຂໍ້ຕົກລົງ ວັນທີ 19/9/2014 ຢູ່ Minsk.
ຢູ່ Minsk, ປະທານາທິບໍດີ 3 ປະເທດ: ລັດເຊຍ, ຢູແກຼນ, ຝລັ່ງ ແລະ ນາຍົກລັດຖະມົນຕີເຢຍລະມັນ ໄດ້ລົງນາມຖະແຫຼງການຮ່ວມກ່ຽວກັບມາດຕະການດ້ານການເມືອງໃຫ້ບັນຫາຢູແກຼນ. ຈຸດພົ້ນເດັ່ນໃນຖະແຫຼງການນີ້ແມ່ນການນຳບັນດາປະເທດຢືນຢັນເຄົາລົບອະທິປະໄຕ ແລະ ຜືນແຜ່ນດິນອັນຄົບຖ້ວນຂອງ ຢູແກຼນ. ມາດຕະການສັນຕິພາບ ແມ່ນມາດຕະການແກ້ໄຂໜຶ່ງດຽວ ໃຫ້ແກ່ການປະທະກັນໃນປະຈຸບັນຢູ່ປະເທດນີ້. ການນຳບັນດາປະເທດສະໜັບສະໜູນມາດຕະການສັງລວມເຊິ່ງກຸ່ມພົບປະໄດ້ລົງນາມໃນວັນດຽວກັນຢູ່ Minsk, ພ້ອມທັງຈະປະກອບສ່ວນ ກໍ່ຄືສົ່ງຜົນສະທ້ອນຂອງຕົນເຖິງຝ່າຍຕ່າງໆທີ່ກ່ຽວຂ້ອງ, ແນໃສ່ຮັບປະກັນປະຕິບັດບັນດາມາດຕະການນີ້.