(vovworld) - ວັນທີ 27/3, ຈີນໄດ້ຮຽກຮ້ອງໃຫ້ບັນດາປະເທດລະມັດລະວັງພາຍຫຼັງ ອາເມລິກາ ເປີດເຜິຍແຜນການສ້າງຕັ້ງລະບົບປ້ອງກັນລູກສອນໄຟນຳວິຖີ ຢູ່ອາຊີ ແລະ ຕາເວັນອອກກາງ. ກ່າວຄຳເຫັນທີ່ການປະຊຸມຂ່າວນັດສາມັນ, ໂຄສົກກະຊວງການຕ່າງປະເທດຈີນ ຫູ່ງໄຫຼ ຊີ້ແຈງວ່າ: ຈີນໄດ້ເອົາໃຈໃສ່ເຖິງແຫຼ່ງຂ່າວນີ້, ພ້ອມທັງຖືວ່າ: ທຸກໆປະເທດຄວນຮັບມືກັບບັນດາບັນຫາປ້ອງກັນລູກສອນໄຟ ”ຢ່າງລະມັດລະວັງ“ ພາຍໃຕ້ທັດສະນະຮັກສາສະຖຽນລະພາບຍຸດທະສາດໃນທົ່ວໂລກ ແລະ ເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ກໍຄືບັນລຸຄວາມສະຖຽນລະພາບ ແລະ ຄວາມສະຫງົບສາກົນຜ່ານມາດຕະການທາງການທູດ ແລະ ການເມືອງຕ່າງໆ.
ກ່ອນໜ້ານັ້ນ, ສື່ມວນຊົນຂອງຈີນໄດ້ຄັດສະເໜີຄຳເວົ້າຂອງເຈົ້າໜ້າທີ່ທຳນຽບ 5 ແຈຜູ້ໜຶ່ງທີ່ວ່າ: ອາເມລິກາພວມພິຈາລະນາກໍ່ສ້າງລະບົບປ້ອງກັນລູກສອນໄຟນຳວິຖີຢູ່ອາຊີ ແລະ ຕາເວັນອອກກາງ, ທີ່ຄ້າຍຄືກັບລະບົບປ້ອງກັນລູກສອນໄຟຢູ່ເອີລົບ. ຮູບແບບໃໝ່ນີ້ ເພື່ອແນໃສ່ເພີ່ມທະວີຄວາມສາມາດຮັບມືກັບໄພຖືກບຸກໂຈມຕີຈາກບັນດາປະເທດຄືອີຣານ ແລະ ສປປ ເກົາຫຼີ ຢ່າງມີປະສິດທິຜົນ, ພ້ອມທັງຊ່ວຍປົກປັກຮັກສາອາເມລິກາ ຕໍບັນດາການບຸກໂຈມຕີດ້ວຍລູກສອນໄຟໄລຍະໄກທີ່ອາດຈະເກີດຂຶ້ນໃນອະນາຄົດ.