ທົ່ວສັງຄົມເອົາໃຈໃສ່ເບິ່ງແຍງດູແລ,ເສີມຂະຫຍາຍບົດບາດຂອງຜູ້ອາຍຸສູງ
(ພາບປະກອບ:ອິນເຕີແນັດ)
(vovworld) – ຕອນເຊົ້າວັນທີ 16/6, ຢູ່ ຮ່າໂນ້ຍ, ສູນກາງສະມາຄົມຜູ້ມີອາຍຸສູງ ຫວຽດນາມ ປະກາດຂໍ້ຕົກລົງຂອງທ່ານນາຍົກລັດຖະມົນຕີ ແລະ ຜັນຂະຫຍາຍເດືອນກະທຳ ເພື່ອຜູ້ມີອາຍຸສູງ ຫວຽດນາມ ປີ 2015 ດ້ວຍຫົວຂໍ້ວ່າ: “ເດືອນກະທຳ ເພື່ອຜູ້ມີອາຍຸສູງທີ່ປະສົບກັບຄວາມຫຍຸ້ງຍາກ”. ເດືອນກະທຳເພື່ອຜູ້ມີອາຍຸສູງ ຫວຽດນາມ ເພື່ອແນໃສ່ປະຕິບັດວຽກງານໂຄສະນາເຜີຍແຜ່ເປັນຢ່າງດີ, ຍົກສູງຄວາມຮັບຮູ້ ແລະ ຄວາມຮັບຜິດຊອບຂອງບັນດາອົງການ, ສ່ວນບຸກຄົນ, ປະຊາຄົມ ແລະ ທົ່ວສັງຄົມເອົາໃຈໃສ່ ເບິ່ງແຍງດູແລ, ເສີມຂະຫຍາຍບົດບາດຂອງຜູ້ມີອາຍຸສູງ. ທ່ານນາງ ກູທິເຮົ້າ, ປະທານສູນກາງສະມາຄົມຜູ້ມີອາຍຸສູງ ຫວຽດນາມ ໃຫ້ຮູ້ວ່າ:
ເດືອນກະທຳ ເພື່ອຜູ້ມີອາຍຸສູງ ປີ 2015, ພວກຂ້າພະເຈົ້າເລືອກເຟັ້ນຫົວຂໍ້ແມ່ນເບິ່ງແຍງດູແລຜູ້ມີອາຍຸສູງທີ່ປະສົບກັບຄວາມຫຍຸ້ງຍາກເປັນພິເສດ, ສະນັ້ນ, ພວກຂ້າພະເຈົ້າໄດ້ສ້າງບັນດາຄາດໝາຍ, ບົນພື້ນຖານນັ້ນປຸກລະດົມບັນດາຂັ້ນ, ຂະແໜງຕ່າງໆຜັນຂະຫຍາຍປະຕິບັດ. ເພື່ອປະຕິບັດວຽກງານດັ່ງກ່າວເປັນຢ່າງດີ, ຂ້າພະເຈົ້າຄິດວ່າ: ບັນດາອົງການສູນກາງຄວນສົມທົບກັນ, ຊີ້ນຳນຳພາບັນດາຫົວໜ່ວຍຂອງຕົນປະຕິບັດໂຄງການນີ້. ພ້ອມກັນນັ້ນ, ພວກຂ້າພະເຈົ້າກໍຍູ້ແຮງວຽກງານໂຄສະນາເຜີຍແຜ່ ເພື່ອທະວີຄູນບັນດາສ່ວນບຸກຄົນທີ່ດີເດັ່ນມີຜົນງານໃນການເບິ່ງແຍງດູແລຜູ້ມີອາຍຸສູງ ແລະ ປະກອບສ່ວນໃຫ້ແກ່ໂຄງການນີ້.