ທ່ານບານກີມູນ ກ່າວເຕືອນຜົນຮ້າຍ ຈາກສະພາບເຄັ່ງຕຶງໃນເຂດຊາຍແດນຊີຣີ-ຕວກກີ
ທ່ານບານກີມູນ ກ່າວຄຳເຫັນໄຂເວທີປາໄສປະຊາທິປະໄຕໂລກ
(ພາບ:dantri.com.vn)
(TTX)- ວັນທີ 8/10, ທ່ານເລຂາທິການໃຫ່ຍ ສປຊ ບານກີມູນ ໄດ້ກ່າວເຕືອນກ່ຽວກັບຜົນຮ້າຍຢ້ອນຫຼັງທີ່ອັນຕະລາຍອາດຈະເກີດຂຶ້ນທີ່ກ່ຽວຂ້ອງເຖິງສະພາບຄວາມເຄັ່ງຕຶງພວມປີນຂັ້ນໄດຢູ່ລຽບຕາມເຂດຊາຍແດນລະຫວ່າງຊີຣີ-ຕວກກີ ໃນປະຈຸບັນ, ພ້ອມທັງຖືວ່າ: ລີບັງ ພວມຖືກຮັບຜົນສະທ້ອນບໍ່ໜ້ອຍຈາກການປະທະກັນທີ່ແກ່ຍາວໃນເວລາ 19 ເດືອນຜ່ານມາຢູ່ຊີຣີ. ກ່າວຄຳເຫັນໄຂເວທີປາໄສປະຊາທິປະໄຕໂລກເຊິ່ງຈັດຂຶ້ນຢູ່ນະຄອນ Strasbourg ປະເທດຝະລັ່ງ, ທ່ານເລຂາທິການໃຫ່ຍ ສປຊ ບານກີມູນ ໄດ້ສະແດງໃຫ້ເຫັນ “ຄວາມວິຕົກກັງວົນອັນເລິກເຊີ່ງ“ ຕໍ່ເລື່ອງບັນດາອິດທິກຳລັງພາຍນອກສືບຕໍ່ສະໜອງອາວຸດໃຫ້ທັງກຳລັງລັດຖະບານ ແລະ ຝ່າຍຄ້ານຢູ່ຊີຣີ ພ້ອມທັງຖືວ່າ: ວິກິດການຢູ່ປະເທດຕາເວັນອອກກາງນີ້ພວມນາບຂູ່ຄວາມມີສະຖຽນລະພາບໃນພາກພື້ນ. ຕາມທ່ານແລ້ວ, “ມາດຕະການດ້ານການເມືອງແມ່ນຊ່ອງທາງໜຶ່ງດຽວເພື່ອແກ້ໄຂສະພາບວິກິດການໃນປະຈຸບັນ“. ໃນຂະນະນັ້ນ, ສະພາບການຢູ່ເຂດຊາຍແດນລະຫວ່າງຊີຣີ-ລີບັງ ກໍ່ມີຄວາມເຄັ່ງຕຶງເຊັ່ນກັນດ້ວຍການຍິງທຳລາຍຢ່າງລຽນຕິດຈາກຝ່າຍຊີຣີ, ສ່ວນໃນທົ່ວເຂດດິນແດນຊີຣີ, ການປະທະກັນຍັງສືບຕໍ່ເກີດຂຶ້ນເມື່ອວັນທີ 8/10 ອັນໄດ້ເຮັດໃຫ້ມີຜູ້ເສຍຊີວິດຢ່າງໜ້ອຍສຸດ 61 ຄົນ.