ຕອນເຊົ້າວັນທີ 27/11, ຢູ່ ແຂວງ ຮືງອຽນ ໄດ້ຈັດຕັ້ງພິທີ ສະເຫຼີມສະຫຼອງ 180 ປີ ແຫ່ງວັນສ້າງຕັ້ງແຂວງ (1831 – 2011) ຢ່າງສົມກຽດ.
ກ່າວປາໄສທີ່ພິທີດັ່ງກ່າວ, ທ່ານ ຫງວຽນວັນເກື່ອງ, ເລຂາຄະນະພັກແຂວງ, ປະທານສະພາ ປຊຊ ແຂວງ ໃຫ້ຮູ້ວ່າ: ຮືງອຽນຍາມໃດກໍ່ມີບັນດາບາດກ້າວບຸກທະລຸໃນຍຸດທະສາດພັດທະນາເສດຖະກິດ - ສັງຄົມ. ເສດຖະກິດຂອງແຂວງເຕີບໂຕໄວ, ຮອບດ້ານ ແລະ ໝັ້ນຄົງ, ສະເລ່ຍ ບັນລຸ 12% ຕໍ່ປີ.
ກ່າວຄຳເຫັນທີ່ພິທີສະເຫຼີມສະຫຼອງ, ທ່ານປະທານປະເທດຫວຽດນາມ ເຈືອງເຕີນຊາງ ເນັ້ນໜັກເຖິງມູນເຊື້ອປະຫວັດສາດ ດ້ວຍ ພື້ນຖານວັດທະນະທຳ, ມັກການຮ່ຳຮຽນ ແລະ ນ້ຳໃຈຮັກຊາດຂອງ ປຊຊ ແຂວງຮືງອຽນ. ທ່ານປະທານປະເທດ ເຈືອງເຕີນຊາງ ສະເໜີ ແຂວງ ຮືງອຽນຄວນສຸມໃສ່ແກ້ໄຂບັນຫາຈຳນວນໜຶ່ງຄື:
“ເສີມຂະຫຍາຍບັນດາຜົນງານທີ່ບັນລຸໄດ້ໃນຊຸມປີຜ່ານມາ, ອົງຄະນະພັກ ແລະ ປຊຊ ຮືງອຽນຄວນ ສາມັກຄີ, ສູ້ຊົນນຳໜ້າໃນການຫັນເປັນອຸດສາຫະກຳ ແລະ ທັນສະໄໝ, ເຊື່ອມໂຍງເຂົ້າກັບສາກົນ, ປະຕິບັດບັນດາບາດກ້າວບຸກທະລຸຍຸດທະສາດ ກ່ຽວກັບການສ້າງກົນໄກຕະຫຼາດໃຫ້ສົມບຸນແບບຕາມ ກຳນົດທິດສັງຄົມນິຍົມ, ພັດທະນາແຫຼ່ງຊັບພະຍາກອນມະນຸດໄວ, ພ້ອມກັນນັ້ນ ກໍ່ເອົາໃຈໃສ່ພັດທະນາວັດທະນະທຳ ສັງຄົມ, ຄວາມສະຫງົບທາງດ້ານການເມືອງ. ຮືງອຽນຕ້ອງປະຕິບັດຈຸດໝາຍໜ້າທີ່ເຊິ່ງ ກອງປະຊຸມໃຫຍ່ຄັ້ງທີ 11 ຂອງພັກກອມມູນິດຫວຽດນາມ ແລະ ກອງປະຊຸມໃຫຍ່ອົງຄະນະພັກແຂວງໄດ້ວາງອອກສຳເລັດກ່ອນກຳນົດເວລາ, ປະກອບສ່ວນປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກຢ່າງມີໄຊ”
ໂດຍຕາງໜ້າການນຳພັກ ແລະ ລັດ, ທ່ານປະທານປະເທດ ເຈືອງເຕີນຊາງ ໄດ້ມອບຫຼຽນໄຊ ໂຮ່ຈີມິນໃຫ້ແກ່ແຂວງ ຮືງອຽນ.