ທ່ານ ສື່ຈີນພິງ ໄດ້ຮັບການເລືອກຕັ້ງເປັນປະທານປະເທດ
(ພາບ: TTXVN)
(vovworld) - ຕອນເຊົ້າວັນທີ 14/03, ທ່ານເລຂາທິການໃຫຍ່ພັກກອມມູນິດຈີນ ສື່ຈີນພິງ ໄດ້ຮັບການເລືອກຕັ້ງເປັນປະທານປະເທດຈີນ, ທີ່ກອງປະຊຸມສະໄໝສາມັນເທື່ອທີ 1 ສະພາຜູ້ແທນປະຊາຊົນແຫ່ງຊາດຈີນ ຊຸດທີ 12 ເຊິ່ງພວມດຳເນີນໄປຢູ່ ປັກກິງ. ທ່ານ ສື່ຈີນພິງກໍໄດ້ຮັບການເລືອກຕັ້ງເປັນປະທານຄະນະກຳມະການ ການທະຫານສູນກາງຂອງປະເທດ ສາທາລະນະລັດປະຊາຊົນຈີນ (PRC).
ແລະກໍໃນວັນດຽວກັນ, ທີ່ກອງປະຊຸມຄົບຄະນະສະພາຜູ້ແທນປະຊາຊົນແຫ່ງຊາດຈີນຊຸດທີ 12 ກໍຮັບຮອງເອົາແຜນການປະຕິຮູບໂຄງປະກອບລັດຖະບານ ເພື່ອແນໃສ່ສະກັດກັ້ນສະພາບການອາດຍາສິດ ແລະ ຍົກສູງປະສິດທິຜົນການເຄື່ອນໄຫວຂອງລັດຖະບານ. ຕາມແຜນການແລ້ວ, ຈຳນວນກະຊວງໃນລັດຖະບານຈະຖືກຫຼຸດແຕ່ 27 ກະຊວງລົງເຫຼືອພຽງ 25 ກະຊວງ. ການສ້າງໂຄງປະກອບລັດຖະບານຄືນໃໝ່, ເປັນສ່ວນໜຶ່ງທີ່ສຳຄັນໃນແຜນການຂອງຈີນ ເພື່ອແນໃສ່ປະຕິຮູບລະບົບການບໍລິຫານຢ່າງເລີກເຊິ່ງ, ແມ່ນທິດກ້າວເດີນຕໍ່ໄປຂອງການປະຕິຮູບໂຄງປະກອບລັດຖະບານ 6 ຄັ້ງ ໃນຮອບ 3 ທົດສະວັດຜ່ານມາ, ເພື່ອແນໃສ່ສ້າງຄະນະລັດຖະບານເຄື່ອນໄຫວຢ່າງມີປະສິດທິຜົນບົນພື້ນຖານກົດໝາຍດ້ວຍການຈັດແບ່ງສິດອຳນາດຢ່າງຈະແຈ້ງ, ຈັດແບ່ງແຫຼ່ງກຳລັງຢ່າງເໝາະສົມ ແລະ ກຳນົດໜ້າທີ່ຮັບຜິດຊອບຢ່າງຈະແຈ້ງ.