(ທ່ານປະທານປະເທດ ຫວຽດນາມ ເຈືອງເຕີ໋ນຊາງ ແລະ
ຜູ້ແທນສະມາຄົມຊາວກະສີກອນ)
(vovworld) – ຕອນບ່າຍວັນທີ 01/12 ຢູ່ຮ່າໂນ້ຍ, ທ່ານປະທານປະເທດ ຫວຽດນາມ ເຈືອງເຕີ໋ນຊາງ ໄດ້ມາຢ້ຽມຢາມ ແລະ ເຮັດວຽກກັບສະມາຄົມຊາວກະສີກອນ ຫວຽດນາມ ກ່ຽວກັບການປະຕິບັດຂໍ້ສະຫລຸບ 61 ຂອງຄະນະເລຂາສູນກາງພັກກ່ຽວກັບການສະຫຼຸບ 5 ປີແຫ່ງການປະຕິບັດແຜນຮ່າງ “ຍົກສູງບົດບາດ, ຄວາມຮັບຜິດຊອບຂອງສະມາຄົມຊາວກະສີກອນ ຫວຽດນາມ ໃນການພັດທະນາກະສິກຳ, ກໍ່ສ້າງຊົນນະບົດໃໝ່ ແລະ ສ້າງຊົນຊັ້ນຊາວກະສີກອນ ຫວຽດນາມ ໄລຍະ 2010 - 2020”. ກ່າວຄຳເຫັນທີ່ການເຮັດວຽກ, ທ່ານປະທານປະເທດ ເຈືອງເຕີ໋ນຊາງ ຖືວ່າ: ສະມາຄົມຊາວກະສີກອນ ຕ້ອງເສີມຂະຫຍາຍບົດບາດຂອງຕົນໃນການສອນວິຊາຊີບ, ຖ່າຍທອດເຕັກໂນໂລຢີໃຫ້ໄດ້ ເພື່ອຍົກສູງສະມັດຕະພາບການອອກແຮງງານຂອງຊາວກະສີກອນເວົ້າສະເພາະ ແລະ ຜູ້ອອກແຮງງານ ຫວຽດນາມ ເວົ້າລວມ. ທ່ານປະທານປະເທດ ຊົມເຊີຍສະມາຄົມຊາວກະສີກອນຕັ້ງໜ້າຂົນຂວາຍ ແລະ ຜັນຂະຫຍາຍກອງທຶນສະມາຄົມຊາວກະສີກອນຢ່າງມີປະສິດທິຜົນ ເພື່ອຊ່ວຍຊາວກະສີກອນມີເງື່ອນໄຂພັດທະນາການຜະລິດ, ພ້ອມກັນນັ້ນ ແມ່ນການກໍ່ສ້າງຊົນນະບົດໃໝ່ກໍ່ໄດ້ຮັບຄວາມເອົາໃຈໃສ່ເປັນພິເສດຈາກສະມາຄົມຊາວກະສີກອນ, ໃນນັ້ນ ການສ້າງແຜນຮ່າງກຳນົດຊາວກະສີກອນເປັນເຈົ້າຂອງການພັດທະນາ ແມ່ນວຽກງານທີ່ມີຄວາມໝາຍ ແລະ ເໝາະສົມກັບແຜນນະໂຍບາຍຂອງພັກ ແລະ ລັດ.