(vovworld) - ໂດຍປະຕິບັດຂໍ້ຕົກລົງຂອງການນຳຂັ້ນສູງ 2 ພັກ, 2 ລັດ ຫວຽດນາມ - ຈີນ, ຄະນະຜູ້ແທນພັກກອມມູນິດຫວຽດນາມ ໂດຍທ່ານ ຟ້າມມິງຈິ໋ງ, ກຳມະການກົມການເມືອງ, ເລຂາສູງກາງພັກ, ຫົວໜ້າຄະນະຈັດຕັ້ງສູນກາງ ນຳໜ້າໄດ້ໄປຢ້ຽມຢາມ ແລະ ເຮັດວຽກຢູ່ປະເທດຈີນ ໃນລະຫວ່າງວັນທີ 11 – 15/12. ຕອນບ່າຍວັນທີ 11/12, ຢູ່ປັກກິງ, ທ່ານ ຈາວເລືອຈີ້, ກຳມະການກົມການເມືອງ, ເລຂາຄະນະເລຂາ, ຫົວໜ້າຄະນະຈັດຕັ້ງສູນກາງພັກກອມມູນິດຈີນ, ໄດ້ມີການເຈລະຈາກັບທ່ານ ຟ້າມມິງຈິ໋ງ. ທ່ານ ຈາວເລືອຈີ້ ຢືນຢັນວ່າ, ພັກ, ລັດ ແລະ ປະຊາຊົນຈີນ ຖືເປັນສຳຄັນການພົວພັນກັບຫວຽດນາມ, ພ້ອມແລ້ວທີ່ຈະເຮັດຈົນສຸດຄວາມສາມາດຂອງຕົນເພື່ອພ້ອມກັບພັກ, ລັດ ແລະ ປະຊາຊົນຫວຽດນາມ ນຳການພົວພັນລະຫວ່າງ 2 ພັກ, 2 ລັດ ໃຫ້ພັດທະນາຢ່າງບໍ່ຢຸດຢັ້ງ, ກ້າວເຂົ້າສູ່ລວງເລິກ, ມີປະສິດທິຜົນ, ແທດຈິງ; ປາດຖະໜາວ່າ, 2 ຝ່າຍສືບຕໍ່ເພີ່ມທະວີການແລກປ່ຽນຄະນະຜູ້ແທນຂັ້ນສູງ, ປັບປຸງຄວາມໄວ້ເນື້ອເຊື່ອໃຈດ້ານການເມືອງ, ຊຸກຍູ້ການເຊື່ອມຕໍ່ຍຸດທະສາດ, ຄວບຄຸມຄວາມບໍ່ລົງລອຍກັນ, ຊຸກຍູ້ການພົວພັນລະຫວ່າງ 2 ພັກ, 2 ລັດ ໃຫ້ພັດທະນາສະຖຽນລະພາບ ແລະ ປອດໄສໃນໄລຍະຈະມາເຖິງ.
ທ່ານຟ້າມມິງຈິ໋ງ ສະເໜີວ່າ, ໃນໄລຍະຈະມາເຖິງ, 2 ພັກ, 2 ລັດ ສຸມໃສ່ເຂົ້າໃນການເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ ຜ່ານການແລກປ່ຽນຄະນະຜູ້ແທນຂັ້ນສູງ ແລະ ທຸກຂັ້ນ; ເພີ່ມທະວີ ແລະ ຍົກສູງປະສິດທິຜົນບັນດາກົນໄກຮ່ວມມືຢ່າງມີປະສິດທິຜົນ, ໂດຍສະເພາະແມ່ນກົນໄກພົບປະຜູ້ຕາງໜ້າ 2 ກົມການເມືອງ; ສົມທົບກັນປະຕິບັດວຽກງານໂຄສະນາ, ສຶກສາປະຊາຊົນ, ໂດຍສະເພາະແມ່ນໄວໜຸ່ມ 2 ປະເທດ ກ່ຽວກັບມູນເຊື້ອການພົວພັນມິດຕະພາບອັນດີງາມລະຫວ່າງ 2 ພັກ, 2 ລັດ.