ທ່ານນາຍົກລັດຖະມົນຕີ ຢູແກຼນ Arsenny Yaseniuk
(ພາບ: dantri.com.vn)
(vovworld) – ຢູແກຼນ ຮຽກຮ້ອງໃຫ້ ລັດເຊຍ ເຈລະຈາ ຢູ່ “ເຂດດິນແດນເປັນກາງ” ດ້ວຍການເປັນຄົນກາງໄກ່ເກ່ຍຂອງ ອາເມລິກາ ແລະ ສະຫະພາບ ເອີລົບ (ອີຢູ). ນັ້ນແມ່ນຄຳຖະແຫຼງຂອງທ່ານນາຍົກລັດຖະມົນຕີ ຢູແກຼນ Arsenny Yaseniuk ຢູ່ການປະຊຸມຂ່າວພາຍຫຼັງການເຈລະຈາ ກັບຄູ່ຕຳແໜ່ງ ນອກແວ Erna Solberg ໃນວັນທີ 18/11 ຢູ່ ກີແອບ. ທ່ານນາຍົກລັດຖະມົນຕີ Yaseniuk ເນັ້ນໜັກວ່າ: ເງື່ອນໄຂເພື່ອເຮັດໃຫ້ສະພາບການຢູ່ Donbass, ພາກຕາເວັນອອກ ຢູແກຼນ ມີສະຖຽນລະພາບ, ແລະ ເຈລະຈາກັບ ລັດເຊຍ ແມ່ນ ມົດສກູ ຕ້ອງປະຕິບັດບັນດາພັນທະຂອງຕົນຕາມຂໍ້ຕົກລົງ Minsk (ເບລາຣຸດ). ໂຕ້ຕອບຄຳຮຽກຮ້ອງດັ່ງກ່າວ, ທ່ານລັດຖະມົນຕີຊ່ວຍວ່າການກະຊວງການຕ່າງປະເທດ ລັດເຊຍ Grygori Karasin ຖະແຫຼງວ່າ: ລັດເຊຍ ກຽມພ້ອມເຂົ້າຮ່ວມທຸກໆການເຈລະຈາກັບ ຢູແກຼນ. ຕາມທ່ານ Karasin, ຢູ່ພາກຕາເວັນອອກ ສ່ຽງໃຕ້ ຢູແກຼນ ມີບັນດາຜູ້ຕາງໜ້າໄດ້ຮັບການ “ສະໜັບສະໜູນ ແລະ ເຊື່ອໝັ້ນ” ຈາກ ປະຊາຊົນ ແລະ ກີແອບຕ້ອງເຈລະຈາກັບບັນດາຜູ້ຕາງໜ້ານີ້ແທນທີໄດ້ຍົກອອກບັນດາຂໍ້ລິເລີ່ມ “ທີ່ຂາດປະສິດທິຜົນ”.