(vovworld) - ສັນຍາ ປາຣີ ກ່ຽວກັບການຢຸດຕິສົງຄາມ, ສ້າງສັນຕິພາບຄືນໃໝ່ ຢູ່ຫວຽດນາມ ທີ່ໄດ້ເຊັນກັນກ່ອນນີ້ 40 ປີແມ່ນການເຈລະຈາຍາວນານ, ຫຍຸ້ງຍາກ, ສັບສົນທີ່ສຸດ ແລະ ແມ່ນ ໄຊຊະນະສະຫງ່າລາສີທີ່ສຸດໃນປະຫວັດການທູດຫວຽດນາມ. ນີ້ ແມ່ນຄຳຢັ້ງຢືນຂອງທ່ານລັດຖະມົນຕີການຕ່າງປະເທດ ຫວຽດນາມ ຟ້າມບິນມິນ ໃນການຕອບສຳພາດຕໍ່ນັກຂ່າວວິທະຍຸກະຈາຍສຽງ ຫວຽດນາມ. ຕາມທ່ານລັດຖະມົນຕີການຕ່າງປະເທດ ຫວຽດນາມ ແລ້ວ, ກອງປະຊຸມ ປາຣີ ແມ່ນການຕໍ່ສູ້ຢ່າງອົງອາດກ້າແກ່ນ ເພື່ອບັນດາສິດພື້ນຖານຂອງຊາດ ຫວຽດນາມ. ແລະ ສັນຍາ ປາຣີ ແມ່ນ ເອກະສານດ້ານນິຕິກຳຮອບດ້ານ, ຄົບຖ້ວນທີ່ສຸດທີ່ຮັບຮູ້ສິດເຫຼົ່ານັ້ນ, ນັ້ນແມ່ນ “ເອກະລາດ, ສັນຕິພາບ, ຜືນແຜ່ນດິນ ອັນຄົບຖ້ວນຂອງ ຫວຽດນາມ”. ທ່ານລັດຖະມົນຕີການຕ່າງປະເທດ ຟ້າມບິນມິນ ກ່າວວ່າ:
“ໄຊຊະນະຂອງກອງປະຊຸມ ປາຣີ ເວົ້າສະເພາະ ແລະ ຂອງບັ້ນຮົບຂອງປະຊາຊົນ ຫວຽດນາມ ເວົ້າລວມ ໄດ້ຢັ້ງຢືນສັດຈະທຳທີ່ວ່າ: ຊາດ 1 ເຖິງວ່າ ຈະອ່ອນນ້ອຍກໍ່ຕາມ ແຕ່ຫາກດ້ວຍຄວາມເປັນທຳ ແລະ ຄວາມຕັດສິນໃຈຕໍ່ສູ້ເພື່ອເອກະລາດ ອິດສະຫຼະພາບຂອງຊາດຕົນ, ປະເທດນັ້ນຈະເອົາໄຊຊະນະຕໍ່ທຸກໆກຳລັງຮຸກຮານໃດໆ. ຍ້ອນເຫດນີ້ເອງ, ກອງປະຊຸມ ປາຣີ ແລະ ສັນຍາ ປາຣີ ແມ່ນແຫຼ່ງລະດົມກຳລັງໃຈ ອັນໃຫຍ່ຫຼວງ, ປະກອບສວນສຳຄັນເຂົ້າໃນການຕໍ່ສູ້ລວມຂອງປະຊາຊົນ ໂລກ ເພື່ອເອກະລາດ, ເສລີພາບ, ສັນຕິພາບ ແລະ ຄວາມຍຸຕິທຳ”
ທ່ານລັດຖະມົນຕີການຕ່າງປະເທດ ຟ້າມບິນມິນ ຍັງຖືວ່າ: ມີຫຼາຍບົດຮຽນທີ່ຖອດຖອນມາໄດ້ຈາກກອງປະຊຸມ ປາຣີ ໃຫ້ແກ່ການທູດ ຫວຽດນາມ. ທ່ານກ່າວຕໍໄປວ່າ:
“ບົດຮຽນທີ່ສຳຄັນທີ່ສຸດ ນັ້ນແມ່ນ ຄວາມເຊື່ອໝັ້ນຕໍ່ການນຳພາທີ່ສະຫຼາດສ່ອງໃສຂອງພັກ. ນີ້ແມ່ນປັດໄຈຕັດສິນທຸກໆໄຊຊະນະ. ທີ 2 ແມ່ນ, ພວກເຮົາຮັກສາສັນຕິພາບ, ອະທິປະໄຕ ແມ່ນຫຼັກການສຳຄັນທີ່ສຸດໃນການແກ້ໄຂບັນດາບັນຫາພົວພັນຕ່າງປະເທດ. ທີ 3, ການສົມທົບກັນຢ່າງແໜ້ນແຟ້ນຂອງຂະແໜງການ, ຂັ້ນ, ຂົງເຂດຕ່າງໆ ແມ່ນປັດໄຈສຳຄັນຮັບປະກັນໄຊຊະນະຂອງການທູດ. ທີ 4, ເປັນເຈົ້າຕົນເອງ, ມີຫົວຄິດປະດິດສ້າງໃນການຕໍ່ສູ້ທາງການທູດ. ທີ 5, ສົມທົບກຳລັງແຮງຂອງຊາດ ກັບ ກຳລັງແຮງຂອງຍຸກສະໄໝແມ່ນປັດໄຈສຳຄັນເພື່ອຮັບປະກັນໄຊຊະນະ.”
ຕາມທ່ານລັດຖະມົນຕີການຕ່າງປະເທດ ຟ້າມບິນມິນ ແລ້ວ, ສຳລັບພື້ນຖານການທູດ ຫວຽດນາມ, ກອງປະຊຸມ ປາຣີ ແລະ ສັນຍາ ປາຣີ ແມ່ນປະຫວັດສາດທີ່ສະຫງ່າອົງອາດຕະຫຼອດໄປ, ສະແດງໃຫ້ເຫັນຍຸດທະວິທີທາງການທູດຂອງ ຫວຽດນາມ, ແມ່ນ ໄຊຊະນະຂອງພື້ນຖານການທູດຂອງລັດປະຕິວັດຍັງໜຸ່ມແໜ້ນ ທີ່ມີຕໍ່ພື້ນຖານການທູດ ອາຊີບ ຂອງປະເທດມະຫາອຳນາດ.