ພາບປະກອບ:internet
|
(vovworld) - ສະມັດຊາໃຫຍ່ ສປຊ ຫາກໍຮັບຮອງເອົາມະຕິຮຽກຮ້ອງການລົບລ້າງອາວຸດນິວເຄຼຍທຸກປະເພດ. ມະຕິສະບັບດັ່ງກ່າວໄດ້ຮັບ ບັດສະຫນັບສະຫນູນ 174 ບັດ, ບັດຄ້ານ 1 ບັດ ແລະ ບັດຂາວ 13 ບັດ. ນີ້ແມ່ນປີທີ 19 ຢ່າງລຽນຕິດ ທີ່ສະມັດຊາໃຫຍ່ ສປຊ ຮັບຮອງເອົາມະຕິສະບັບດັ່ງກ່າວ. ເນື້ອໃນຂອງມະຕິໄດ້ສະແດງໃຫ້ເຫັນຄວາມວິຕົກກັງວົນຂອງປະຊາຄົມໂລກສຳລັບການພັດທະນາອາວຸດນິວເຄຼຍທຸກປະເພດ ພ້ອມທັງຮຽກຮ້ອງໃຫ້ບັນດາປະເທດກຳມະສິດອາວຸດນິວເຄຼຍ ດຳເນີນການທຳລາຍສາງອາວຸດນິວເຄຼຍຂອງເຂົາເຈົ້າ. ນອກນັ້ນ ເລື່ອງລົງນາມໃນມະຕິສະບັບດັ່ງກ່າວກໍຢືນຢັນຄືນເຖິງຄວາມສຳຄັນຂອງການເຄົາລົບສົນທິສັນຍາຫ້າມແຜ່ຂະຫຍາຍອາວຸດນິວເຄຼຍ, ຮຽກຮ້ອງບັນດາປະເທດເຂົ້າຮ່ວມສົນທິສັນຍາຫ້າມແຜ່ຂະຫຍາຍອາວຸດນິວເຄຼຍເພື່ອສ້າງໂລກປອດອາວຸດນິວເຄຼຍ. ໃນວັນດຽວກັນ ຢູ່ ນະຄອນຫລວງ ວໍຊິງຕັນ, ປະທານາທິບໍດີ ອາເມລິກາ Barack Obama ຢືນຢັນຈະຮັກສາຄວາມມານະພະຍາຍາມສະກັດກັ້ນບໍ່ໃຫ້ອາວຸດນິວເຄຼຍ ຕົກເຂົ້າໃນກຳມືຂອງກຳລັງກໍ່ການຮ້າຍ ແລະ ຖືວ່າ ນີ້ແມ່ນຫນຶ່ງໃນບັນດານະໂຍບາຍປ້ອງກັນຄວາມສະຫງົບທີ່ໄດ້ຮັບບຸລິມະສິດອັບດັບຫນຶ່ງໃນອາຍຸການທີສອງຂອງທ່ານ Obama. ນອກນັ້ນ ທ່ານປະທານາທິບໍດີ Obama ກໍຖືວ່າ: ລັດທິກໍ່ການຮ້າຍນິວເຄຼຍ ແມ່ນຫນຶ່ງໃນບັນດາການນາບຂູ່ທີ່ຮ້າຍແຮງຕໍ່ຄວາມໝັ້ນຄົງໃນທົ່ວໂລກ.