ຮອງນາຍົກລັດຖະມົນຕີຫງວຽນຊວນຟຸກເຮັດວຽກກັບແຂວງລາວກາຍ
(ທ່ານຮອງນາຍົກລັດຖະມົນຕີຫງວຽນຊວນຟຸກ
ເຮັດວຽກກັບແຂວງລາວກາຍ)
(vovworld) – ຕອນເຊົ້າວັນທີ 13/09, ທ່ານຮອງນາຍົກລັດຖະມົນຕີ ຫງວຽນຊວນຟຸກ ໄດ້ມີການເຮັດວຽກກັບແຂວງລາວກາຍ. ທີ່ການເຮັດວຽກ, ການນຳແຂວງ ລາວກາຍ ສະເໜີຕໍ່ລັດຖະບານມີນະໂຍບາຍສົ່ງເສີມ, ໜູນຊ່ວຍເພື່ອຍູ້ແຮງການສົ່ງອອກບັນດາຜະລິດຕະພັນມີທ່າແຮງຂອງຫວຽດນາມ ຜ່ານດ່ານຊາຍແດນ ລາວກາຍ, ເພື່ອຊຸກຍູ້ການແລກປ່ຽນສິນຄ້າໃນແລວເສດຖະກິດກົນມິງ - ລາວກາຍ - ຮ່າໂນ້ຍ - ຫາຍຟ່ອງ - ກວາງນິງ. ແຂວງລາວກາຍ ກໍສະເໜີຕໍ່ລັດຖະບານໜູນຊ່ວຍທຶນເພື່ອລົງທຶນກໍ່ສ້າງພື້ນຖານໂຄງລ່າງເຂດເສດຖະກິດດ່ານຊາຍແດນເປີດກວ້າງຂອງແຂວງ ແລະ ຜັນຂະຫຍາຍເສັ້ນທາງເຊື່ອມຕໍ່ຈາກເສັ້ນທາງຄວາມໄວສູງໂນ້ຍບ່າຍ - ລາວກາຍ ເຖິງເທດສະບານເມືອງ ຊາປາ. ກ່າວຄຳເຫັນຊີ້ນຳການເຮັດວຽກ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ສະເໜີໃຫ້ແຂວງລາວກາຍ ສືບຕໍ່ປະຕິບັດບັນດາມາດຕະການພັດທະນາເສດຖະກິດ - ສັງຄົມຂອງແຂວງຢ່າງຄົບຊຸດ, ໃນນັ້ນຕ້ອງເອົາໃຈໃສ່ເປັນພິເສດເຖິງການກໍ່ສ້າງຊົນນະບົດໃໝ່ ຕິດພັນກັບຈຸດທີ່ເປັນເອກະລັກສະເພາະຂອງເຂດພູສູງ… ສຳລັບການເຄື່ອນໄຫວຂາອອກ, ຂາເຂົ້າ, ລາວກາຍ ຕ້ອງໃຫ້ບຸລິມະສິດການສົ່ງອອກບັນດາຜະລິດຕະພັນກະເສດ, ເສີມຂະຫຍາຍທ່າແຮງເຂດຊາຍແດນ. ນອກຈາກນັ້ນ, ລາວກາຍ ກໍຕ້ອງຮັດແໜ້ນການຄຸ້ມຄອງ, ສະກັດກັ້ນການຄ້າເຖື່ອນຜ່ານຊາຍແດນ.