ຮອງນາຍົກລັດຖະມົນຕີ ຟ້າມບິ່ງມິງ ຕ້ອນຮັບ ເອກອັກຄະລັດຖະທູດໂຮນລັງ
ທ່ານຮອງນາຍົກລັດຖະມົນຕີ ຟ້າມບິ່ງມິງ
ຕ້ອນຮັບເອກອັກຄະລັດຖະທູດໂຮນລັງ
(ພາບ: chinhphu.vn)
(vovworld) – ຕອນບ່າຍວັນທີ 05/03, ຢູ່ສຳນັກງານກະຊວງການຕ່າງປະເທດ, ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຟ້າມບິ່ງມິງ ໄດ້ໃຫ້ການຕ້ອນຮັບທ່ານນາງເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງລາຊະອານາຈັກໂຮນລັງ Catharina Trooster ເຂົ້າຢ້ຽມຂໍ່ານັບຕາມພິທີການທູດ ເນື່ອງໃນໂອກາດເລີ່ມປະຕິບັດໜ້າທີ່ການທູດຢູ່ຫວຽດນາມ. ທີ່ການຕ້ອນຮັບ, ທ່ານຮອງນາຍົກລັດຖະມົນຕີ ຟ້າມບິ່ງມິງ ໄດ້ຕີລາວ່າ, ການພົວພັນລະຫວ່າງຫວຽດນາມ - ໂຮນລັງ ພວມພັດທະນາຢ່າງຕັ້ງໜ້າໃນທຸກຂົງເຂດ, ໂດຍສະເພາະແມ່ນເລື່ອງ 2 ປະເທດສ້າງຕັ້ງການພົວພັນຄູ່ຮ່ວມມືຍຸດທະສາດ ກ່ຽວກັບການຮັບມືກັບການປ່ຽນແປງຂອງດິນຟ້າອາກາດ ແລະ ຄຸ້ມຄອງນ້ຳ (10/2010) ແລະ ຄູ່ຮ່ວມມືຍຸດທະສາດດ້ານກະສິກຳ ແລະ ຄວາມປອດໄພດ້ານທັນຍາຫານ (06/2014). 2 ປະເທດໄດ້ ແລະ ພວມມີການສົມທົບກັນຢ່າງແໜ້ນແຟ້ນບົນເວທີປາໄສຫຼາຍຝ່າຍ ແລະ ບັນດາອົງການຈັດຕັ້ງສາກົນ. ທ່ານຮອງນາຍົກລັດຖະມົນຕີ ຟ້າມບິ່ງມິງ ສະແດງຄວາມເຊື່ອໝັ້ນວ່າ, ໃນອາຍຸການນີ້, ທ່ານນາງເອກອັກຄະລັດຖະທູດ ຈະປະກອບສ່ວນຢ່າງຕັ້ງໜ້າ, ສົມທົບກັນຢ່າງແໜ້ນແຟ້ນກັບບັນດາກະຊວງ, ຂະແໜງການຂອງຫວຽດນາມ ເພື່ອຜັນຂະຫຍາຍການຮ່ວມມືລະຫວ່າງ 2 ປະເທດຢ່າງແຮງ, ກໍ່ຄືປະກອບສ່ວນຊຸກຍູ້ການພົວພັນລະຫວ່າງຫວຽດນາມ ແລະ ສະຫະພາບເອີລົບ (EU).
ສ່ວນທ່ານນາງເອກອັກຄະລັດຖະທູດ Catharina Trooster ຢືນຢັນວ່າ, ຈະມານະພະຍາຍາມຊຸກຍູ້ການຮ່ວມມືລະຫວ່າງ 2 ປະເທດໃຫ້ເລິກເຊິ່ງກວ່າ ແລະ ຈະເຮັດຈົນສຸດຄວາມສາມາດຂອງຕົນເພື່ອເພີ່ມທະວີການພົວພັນມິດຕະພາບລະຫວ່າງປະຊາຊົນ 2 ປະເທດ.