(vovworld) - ການຢ້ຽມຢາມຍີ່ປຸ່ນໃນລະຫວ່າງວັນທີ 15-18/9 ຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ, ຕາມຄຳເຊີນຂອງທ່ານນາຍົກລັດຖະມົນຕີຍີ່ປຸ່ນ Shinzo Abe ໄດ້ເປີດວິໄສທັດໃໝ່ໃຫ້ແກ່ການພັດທະນາການພົວພັນຄູ່ຮ່ວມມືຍຸດທະສາດເລິກເຊິ່ງ, ກວ້າງຂວາງ ເພື່ອສັນຕິພາບ ແລະ ຄວາມວັດຖະນາຖາວອນຢູ່ອາຊີລະຫວ່າງຫວຽດນາມ - ຍີ່ປຸ່ນ. ນີ້ແມ່ນຄຳຢືນຢັນຂອງທ່ານຫົວໜ້າຄະນະພົວພັນ ຕ່າງປະເທດສູນກາງພັກກອມມູນິດຫວຽດນາມ ຮ່ວາງບິ່ງກວນ ເມື່ອຕອບສຳພາກຕໍ່ສື່ມວນຊົນ. ຕີລາຄາກ່ຽວກັບຄວາມໝາຍ ແລະ ຜົນແຫ່ງການຢ້ຽມຢາມ. ທ່ານ ຮ່ວາງບິ່ງກວນ ເນັ້ນໜັກວ່າ, ການຢ້ຽມຢາມໄດ້ປະກອບສ່ວນສຳຄັນເຮັດໃຫ້ຄວາມໄວ້ເນື້ອເຊື່ອໃຈດ້ານການເມືອງລະຫວ່າງສອງປະເທດເລິກເຊິ່ງກວ່າອີກ. ໃນການຢ້ຽມຢາມ, ສອງຝ່າຍໄດ້ແລກປ່ຽນຢ່າງເລິກເຊິ່ງ, ກວ້າງຂວາງ ແລະ ເຫັນດີເພີ່ມທະວີການຮ່ວມມື ແລະ ຊຸກຍູ້ການເຊື່ອມຕໍ່ສອງພື້ນຖານເສດຖະກິດ. ສອງປະເທດກໍ່ເຫັນດີເປີດກວ້າງການຮ່ວມມືໃນທຸກຂົງເຂດ; ເພີ່ມທະວີການຮ່ວມມື, ຍູ້ແຮງການພົວພັນແລກປ່ຽນດ້ານປ້ອງກັນຊາດ, ໜູນຊ່ວຍຫວຽດນາມ ເຂົ້າຮ່ວມການເຄື່ອນໄຫວຮັກສາສັນຕິພາບຂອງ ສປຊ. ທ່ານນາຍົກລັດຖະມົນຕີຍີ່ປຸ່ນ Shinzo Abe ຢືນຢັນພ້ອມແລ້ວທີ່ຈະຮ່ວມມືກັບຫວຽດນາມ ເພື່ອຍົກສູງຄວາມສາມາດປະຕິບັດກົດໝາຍບົນທະເລ. ສອງຝ່າຍຢືນຢັນສືບຕໍ່ສົມທົບກັນຢ່າງແໜ້ນແຟ້ນໃນເວທີປາໄສສາກົນ ແລະ ພາກພື້ນກ່ຽວກັບບັນດາບັນຫາທີ່ຕ່າງຝ່າຍຕ່າງມີຄວາມສົນໃຈ.
ວິໄສທັດ ແລະ ບັນດາທິດທາງໃຫຍ່, ບັນດາເນື້ອໃນຮ່ວມມືລະອຽດທີ່ບັນລຸໄດ້ໃນການຢ້ຽມຢາມ ຖືກສະແດງອອກໃນຖະແຫຼງການຮ່ວມ ແລະ ດ້ວຍ 10 ເອກະສານທີ່ໄດ້ຮັບການລົງນາມນັ້ນ, ຈະສ້າງກຳລັງໜູນເພື່ອພັດທະນາຢ່າງຮອບດ້ານ ແລະ ຍູ້ແຮງການພົວພັນຄູ່ຮ່ວມມືຍຸດທະສາດເລິກເຊິ່ງ, ກວ້າງຂວາງ ຫວຽດນາມ - ຍີ່ປຸ່ນ ຕາມທິດນັບມື້ນັບແທດຈິງ, ມີປະສິດທິຜົນ ແລະ ເລິກເຊິ່ງກວ່າ.