ເວທີປາໄສວິສາຫະກິດ ຫວຽດນາມ - ຟີລີບປີນ
ພາບ:congthuong
|
(vovworld)- ວັນທີ 11/1, ຢູ່ ນະຄອນ ໂຮ່ຈິມີນ ໄດ້ດຳເນີນເວທີປາໄສການດຳເນີນທຸລະກິດ ຫວຽດນາມ - ຟີລີບປີນ ແລະ ກອງປະຊຸມສຳມະນາການພົວພັນແລກປ່ຽນການຄ້າວິສາຫະກິດຫວຽດນາມ - ຟີລີບປີນ ໂດຍມີການເຂົ້າຮ່ວມຂອງວິສາຫະກິດກວ່າ 120 ແຫ່ງຂອງສອງປະເທດ. ທ່ານນາງ ບູ່ຍທິແທງອານ, ຮອງຫົວຫນ້າກົມສົ່ງເສີມການຄ້າ, ສັງກັດກະຊວງອຸດສາຫະກຳ ການຄ້າໃຫ້ຮູ້ວ່າ: ໃນໄລຍະຜ່ານມາ ການຮ່ວມມືສອງຝ່າຍລະຫວ່າງຫວຽດນາມ ແລະ ຟິລີບປີນ ໄດ້ຮັບການປັບປຸງ ແລະ ພັດທະນາຢ່າງບໍ່ຢຸດຢັ້ງ. ລະດັບການເຕີບໂຕຂອງວົງເງິນການຄ້າລະຫວ່າງສອງປະເທດໄລຍະ 2008-2016 ບັນລຸ 11%/ປີ. ພິເສດ ນັບແຕ່ເດືອນ 11/2015 ຫວຽດນາມ ແລະ ຟິລີບປີນ ໄດ້ສ້າງຕັ້ງການພົວພັນຄູ່ຮ່ວມມືຍຸດທະສາດ. ນີ້ແມ່ນບາດກ້າວໃຫມ່ເພື່ອໃຫ້ສອງຝ່າຍຍູ້ແຮງບັນດາການເຄື່ອນໄຫວສົ່ງເສີມການລົງທຶນ ແລະ ເສີມຂະຫຍາຍຄວາມສາມາດບົ່ມຊ້ອນການຮ່ວມມືໃນການແລກປ່ຽນການຄ້າ. ທ່ານ Angel Ngu, ປະທານຫ້ອງການການຄ້າ ແລະ ອຸດສາຫະກຳຂອງຊາວຈີນ ຢູ່ ຟີລີບປີນ ໃຫ້ຮູ້ວ່າ: ຫວຽດນາມ ແມ່ນຫນຶ່ງໃນບັນດາຕະຫລາດທີ່ມີຄວາມສາມາດບົ່ມຊ້ອນທີ່ສຸດຂອງ ຟິລີບປີນ ໃນປະຊາຄົມເສດຖະກິດ ອາຊຽນ. ໃນຊຸມປີຜ່ານມາ ມີວິສາຫະກິດຈຳນວນຫນຶ່ງຂອງ ຟິລີບປີນ ໄດ້ລົງທຶນ ແລະ ສ້າງ ເຄື່ອງໝາຍການຄ້າ ຢູ່ຕະຫລາດຫວຽດນາມ ສຳເລັດຜົນ. ໃນໄລຍະຈະມາເຖິງ, ຟີລີບປີນ ປາດຖະຫນາຢາກສອງຝ່າຍເພີ່ມທະວີການຮ່ວມມື ແລະ ຊຸກຍູ້ການພົວພັນແລກປ່ຽນການຄ້າໃນບັນດາຂົງເຂດຄື: ຜະລິດຕະພັນກະເສດ, ທັນຍາຫານ, ວັດສະດຸກໍ່ສ້າງ, ເຫລັກກ້າ, ເຄື່ອງອຸປະກອນໃຊ້ໃນຫ້ອງການ, ເຄື່ອງໃຊ້ສອຍ, ເກີບຫນັງ…