ບັນດາຜູ້ນຳພັກ, ລັດ ເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 10 ຂອງຄະນະຊາວຫນຸ່ມກອມມູນິດໂຮ່ຈິມິນ
ພາບ: thanhnien.com.vn
|
(vovworld) - ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 10 ຂອງຄະນະຊາວຫນຸ່ມກອມມູນິດໂຮ່ຈິມິນ ພາຍໃຕ້ຫົວຂໍ້ວ່າ: “ຄວາມມຸ່ງຫວັງຂອງໄວຫນຸ່ມໃນການສ້າງສາປະເທດຊາດ” ແລະ ຄຳຂວັນແຫ່ງການກະທຳທີ່ວ່າ:“ ໄວຫນຸ່ມຫວຽດນາມ ສ້າງຄວາມໄຝ່ຝັນ, ຝືກຝົນຫລໍ່ຫລອມ, ສາມັກຄີ, ມີຫົວຄິດປະດິດສ້າງ, ປະຈັນບານໃນການສ້າງສາ ແລະ ປົກປັກຮັກສາປະເທດຊາດ.” ຖືກໄຂຂຶ້ນໃນຕອນເຊົ້າວັນທີ 12/12 ຢູ່ ຮ່າໂນ້ຍ. ເຂົ້າຮ່ວມກອງປະຊຸມໃຫຍ່ ມີທ່ານ ຫງວຽນຟູຈ້ອງ ເລຂາທິການໃຫຍ່ພັກກອມມູນິດ ຫວຽດນາມ, ທ່ານປະທານປະເທດ ເຈືອງເຕີນຊາງ, ທ່ານນາຍົກລັດຖະມົນຕີ ຫງວຽນເຕີນຢູ໋ງ, ປະທານສະພາແຫ່ງຊາດ ຫງວຽນຊິງຮຸ່ງ ພ້ອມກັບຜູ້ແທນກວ່າ 1.200 ທ່ານ ຊຶ່ງແມ່ນການນຳ, ອະດີດການນຳພັກ, ລັດ, ແນວໂຮມປະເທດຊາດ ຫວຽດນາມ ແລະ ຜູ້ແທນມາຈາກອົງການຈັດຕັ້ງອື່ນເຂົ້າຮ່ວມ.
ໃນສູນທອນພົດໄຂກອງປະຊຸມໃຫຍ່, ທ່ານ ຫງວຽນດັກວີງ ເລຂາທີຫນຶ່ງ ສູນກາງຄະນະຊາວຫນຸ່ມກອມມູນິດ ໂຮ່ຈິມິນ ຊຸດທີ 9 ໄດ້ເນ້ັນຫນັກວ່າ: ກອງປະຊຸມໃຫຍ່ແມ່ນເຫດການການເມືອງສຳຄັນຂອງໄວຫນຸ່ມ ຫວຽດນາມ, ເປັນຂີດໝາຍແຫ່ງບາດກ້າວພັດທະນາໃຫມ່ຂອງອົງການຈັດຕັ້ງຊາວຫນຸ່ມ ແລະ ຂະບວນການຊາວຫນຸ່ມເຍົາວະຊົນ. ທ່ານ ຫງວຽນດັກວີງ ຊີ້ແຈງວ່າ:
“ດ້ວຍຄວາມຮຽກຮ້ອງຕ້ອງການຂອງໄລຍະໃຫມ່ແຫ່ງການເຊື່ອມໂຍງ ແລະ ພັດທະນາ, ເພື່ອພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ, ດ້ວຍຄວາມມຸ້ງຫວັງຂອງໄວຫນຸ່ມແມ່ນສ້າງສາປະເທດຊາດ, ກອງປະຊຸມໃຫຍ່ຄັ້ງນີ້ ໄດ້ຮຽກຮ້ອງໃຫ້ຊາວຫນຸ່ມເຍົາວະຊົນໝົດທຸກຄົນ ສືບທອດມູນເຊື້ອຂອງລຸ້ນພໍ່ລຸ້ນອ້າຍ, ກຳແຫນ້ນກາລະໂອກາດ, ຊາຕະກຳໃຫມ່, ຕັດສິນໃຈຜ່ານຜ່າຄວາມຫຍຸ້ງຍາກ, ການທ້າທາຍທຸກຢ່າງ, ສູ້ຊົນພ້ອມກັບທົ່ວພັກ, ທົ່ວປວງຊົນ, ທົ່ວກອງທັບປະຕິບັດພາລະກິດສ້າງສາ, ຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມໃຫ້ສຳເລັດຜົນ, ເພື່ອຈຸດໝາຍປະຊາຊົນຮັ່ງມີ, ປະເທດຊາດເຂັ້ມແຂງ, ປະຊາທິປະໄຕ, ສີວິໄລ, ກ້າວຂຶ້ນສັງຄົມນິຍົມ.”
ທີ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 10, ທ່ານເລຂາທິການໃຫຍ່ ຫງວຽນຟູຈ້ອງ ມີບົດຂຽນສຳຄັນສົ່ງເຖິງລຸ້ນໄວຫນຸ່ມ ຫວຽດນາມ ດ້ວຍຄວາມປາດຖະຫນາວ່າ ໄວຫນຸ່ມ ຫວຽດນາມ ຈະພ້ອມກັບປະເທດຊາດກ້າວຂຶ້ນຢ່າງໝັ້ນຄົງ.
ກ່າວຄວາມເຫັນທີ່ກອງປະຊຸມໃຫຍ່, ທ່ານປະທານຄະນະກຳມະການສູນກາງແນວໂຮມປະເທດຊາດຫວຽດນາມ ຮີ່ນດາມ ເນັ້ນໜັກວ່າ, ແນວໂຮມປະເທດຊາດຫວຽດນາມ ຍາມໃດກໍ່ເອກອ້າງທະນົງໃຈຕໍ່ຄະນະຊາວໜຸ່ມກອມມູນິດໂຮ່ຈີມິນ. ສະມາຊິກຊາວໜຸ່ມຫວຽດນາມລຸ້ນຕ່າງໆ ໄດ້ເສີມຂະຫຍາຍມູນເຊື້ອຮັກຊາດ, ຈົ່ງຮັກພັກດີຕໍ່ພັກ, ຕໍ່ອຸດົມຄະຕິກອມມູນິດສັງຄົມ, ປະກອບສ່ວນຢ່າງໃຫຍ່ຫຼວງເຂົ້າໃນພາລະກິດຕໍ່ສູ້ປົດປ່ອຍຊາດ, ທ້ອນໂຮມປະເທດຊາດເປັນເອກະພາບ, ສ້າງສາ ແລະ ປົກປັກຮັກສາປະເທດຊາດ.