(vovworld) - ວັນທີ 05/07, ກົມລົງທຶນຕ່າງປະເທດ, ກະຊວງແຜນການ ແລະ ການລົງທຶນ ໄດ້ສົມທົບກັບອົງການສົ່ງເສີມການຄ້າຍີ່ປຸ່ນ (Jetro) ຈັດກອງປະຊຸມສຳມະນາ “ເປີດກວ້າງການລົງທຶນ, ດຳເນີນທຸລະກິດກັບຕະຫຼາດຍີ່ປຸ່ນ” ເພື່ອແນໃສ່ແນະນຳໃຫ້ວິສາຫະກິດສຳພັດ, ລົງທຶນເຂົ້າຕະຫຼາດຍີ່ປຸ່ນ. ຕາມກົມລົງທຶນຕ່າງປະເທດຫວຽດນາມ ແລ້ວ, ປະຈຸບັນ, ວິສາຫະກິດຫວຽດນາມ ໄດ້ລົງທຶນອອກສູ່ຕ່າງປະເທດກວ່າ 1.000 ໂຄງການ, ດ້ວຍຍອດຈຳນວນທຶນຈົດທະບຽນປະມານ 9 ຕື້ USD. ບັນດາຂົງເຂດລົງທຶນຕົ້ນຕໍແມ່ນກະສິກຳ, ໂທລະຄົມມະນາຄົມ, ເຕັກໂນໂລຊີຂໍ້ມູນຂ່າວສານ… ສະເພາະຍີ່ປຸ່ນ, ວິສາຫະກິດຫວຽດນາມ ໄດ້ລົງທຶນເກືອບ 40 ໂຄງການ, ດ້ວຍຍອດເງິນລົງທຶນປະມານ 7 ລ້ານ USD, ຢືນອັນດັບທີ 45 ໃນຈຳນວນ 68 ປະເທດ, ເຂດແຄ້ວນເຊິ່ງຫວຽດນາມ ມີໂຄງການລົງທຶນ. ຕາມທ່ານ ໂດ້ຢືດຮ່ວາງ, ຫົວໜ້າກົມລົງທຶນຕ່າງປະເທດ, ຕະຫຼາດຍີ່ປຸ່ນ ແມ່ນຕະຫຼາດມີຄວາມສາມາດບົ່ມຊ້ອນທີ່ສຸດໃຫ້ແກ່ການຮ່ວມມື, ລົງທຶນຂອງວິສາຫະກິດຫວຽດນາມ.
“ພວກຂ້າພະເຈົ້າໄດ້ສົມທົບກັບ Jetro ເພື່ອຊຸກຍູ້, ໜູນຊ່ວຍວິສາຫະກິດຫວຽດນາມ ໄປລົງທຶນຢູ່ຍີ່ປຸ່ນ, ສຸມໃສ່ເຂົ້າໃນການພັດທະນາບັນດາຂົງເຂດເຊິ່ງຫວຽດນາມ ມີທ່າແຮງ, ຕົວຢ່າງຄື: ເຕັກໂນໂລຊີ, ຊອບແວ… ໄປລົງທຶນຢູ່ຍີ່ປຸ່ນ ຜ່ານນັ້ນກໍ່ໄດ້ຮໍ່າຮຽນເອົາບັນດາເຕັກໂນໂລຊີຂອງຍີ່ປຸ່ນ ກໍຄືຮ່ຳຮຽນເອົາວຽກງານການບຳລຸງສ້າງ, ການຜະລິດບັນດາຜະລິດຕະພັນ ຈາກນັ້ນສາມາດສົ່ງອອກກັບເມືອຫວຽດນາມ ຫຼື ສົ່ງໄປຍັງບັນດາຕະຫຼາດທີ່ພວກເຮົາໄດ້ລົງນາມໃນບັນດາສັນຍາການຄ້າ, ຫຼຸດຜ່ອນຄ່າໃຊ້ຈ່າຍ, ເພີ່ມຄຸນນະພາບ, ຊ່ວຍຍົກສູງປະສິດທິຜົນຂອງວິສາຫະກິດຢູ່ຫວຽດນາມ.”
ທ່ານ Atsusuke Kawada, ຫົວໜ້າຜູ້ຕາງໜ້າອົງການສົ່ງເສີມການຄ້າຍີ່ປຸ່ນ, ຫ້ອງການຕາງໜ້າປະຈຳຮ່າໂນ້ຍ (Jetro), ໃຫ້ຮູ້ວ່າ, ນີ້ແມ່ນກອງປະຊຸມຄັ້ງທຳອິດໂຄສະນາ ແລະ ແນະນຳກ່ຽວກັບສະພາບແວດລ້ອມແຫ່ງການລົງທຶນຂອງຍີ່ປຸ່ນ ແລະ ບັນດາການໜູນຊ່ວຍຂອງ Jetro ສຳລັບວິສາຫະກິດຫວຽດນາມ ທີ່ລົງທຶຶນຢູ່ຍີ່ປຸ່ນ. ຍີ່ປຸ່ນຈະສ້າງທຸກເງື່ອນໄຂສະດວກທີ່ສຸດເພື່ອໃຫ້ວິສາຫະກິດຫວຽດນາມ ສຳພັດກັບຕະຫຼາດຍີ່ປຸ່ນ.