(vovworld) – ວັນທີ 12/1, ບັນດາການເຄື່ອນໄຫວພົບປະແລກປ່ຽນກິລາ ກາຍຍະກຳ, ວັດທະນະທຳສິລະປະ ແລະ ໂອ້ລົມສົນທະນາຫົວເລື່ອງສະເພາະລະຫວ່າງຊາວໜຸ່ມ, ນັກສຶກສານະຄອນ ໂຮ່ຈີມິນ ແລະ ນັກສຶກສາ ລາວ, ກຳປູເຈຍ ທີ່ພວມຮຳ່ຮຽນຢູ່ນະຄອນ ໂຮ່ຈີມິນ ໄດ້ດຳເນີນຢ່າງຟົດຟື້ນ, ມ່ວນຊື່ນ. ນີ້ແມ່ນຄັ້ງທຳອິດທີ່ການເຄື່ອນໄຫວຄືດັ່ງກ່າວໄດ້ຮັບການຈັດຕັ້ງຢູ່ນະຄອນ ໂຮ່ຈີມິນ ເພື່ອແນໃສ່ສ້າງເງື່ອນໄຂໃຫ້ແກ່ບັນດານັກສຶກສາ ລາວ, ກຳປູເຈຍ ທີ່ພວມຮຳ່ຮຽນຢູ່ນະຄອນ ໂຮ່ຈີມິນ ພົບປະແລກປ່ຽນ, ແຮກສ່ຽວກັບຊາວໜຸ່ມນະຄອນ ໂຮ່ຈີມິນ, ຜ່ານນັ້ນປະກອບສ່ວນເພີ່ມພູນຄູນສ້າງນ້ຳໃຈສາມັກຄີ, ສະໜິດຕິດພັນ, ການພົວພັນມິດຕະພາບແບບພິເສດລະຫວ່າງຊາວໜຸ່ມ 3 ປະເທດ ຫວຽດນາມ, ລາວ, ກຳປູເຈຍ. ໃນລາຍການພົບປະແລກປ່ຽນ, ມີນັກສຶກສາລາວ, ກຳປູເຈຍ ແລະ ນະຄອນ ໂຮ່ຈີມິນ ເກືອບ 300 ຄົນ ໄດ້ຮັບຟັງບົດລາຍງານຫົວເລື່ອງສະເພາະ “ປະຫວັດສາດແຫ່ງສາຍພົວພັນແບບພິເສດ ຫວຽດນາມ - ລາວ - ກຳປູເຈຍ ແລະ ບົດບາດ, ໜ້າທີ່ຂອງຊາວໜຸ່ມ 3 ປະເທດ”, ເຂົ້າຮ່ວມບັນດາການລະຫຼີ້ນກາງແຈ້ງ, ແຂ່ງຂັນບານເຕະມິດຕະພາບ, ຮັບຊົມງານວາງສະແດງຮູບພາບກ່ຽວກັບການພົວພັນຫວຽດນາມ - ລາວ - ກຳປູເຈຍ ແລະ ງານພົບປະແລກປ່ຽນສິລະປະວັດທະນະທຳຊົມເຊີຍຜົນສຳເລັດຂອງປີແຫ່ງຄວາມສາມັກຄີ ມິດຕະພາບຫວຽດນາມ - ລາວ 2012, ສະເຫຼີມສະຫຼອງ 45 ປີແຫ່ງວັນສ້າງຕັ້ງສາຍພົວພັນທາງການທູດ ຫວຽດນາມ - ກຳປູເຈຍ.