(ພາບ: vietnamplus.vn)
(vovworld)- ແຕ່ວັນທີ 2-7/6, ຄະນະຜູ້ແທນກະຊວງການເງິນຫວຽດນາມ ໂດຍທ່ານຮອງລັດຖະມົນຕີເຈິ່ນວັນຮຽວ ນຳໜ້າ ໄດ້ມີການຢ້ຽມຢາມ ແລະ ເຮັດວຽກຢູ່ກູບາ ເພື່ອແນໃສ່ຊຸກຍູ້ການພົວພັນຮ່ວມມື ແລະ ແລກປ່ຽນບົດຮຽນແຫ່ງການເຄື່ອນໄຫວຂອງຂະແໜງການເງິນສອງປະເທດໃນໄລຍະໃໝ່. ທ່ານຮອງລັດຖະມົນຕີເຈິ່ນວັນຮຽວ ໄດ້ມີການເຮັດວຽກກັບທ່ານນາງ Lina Olinda Pedraza ລັດຖະມົນຕີກະຊວງການເງິນ ແລະ ລາຄາສິນຄ້າກູບາ, ກ່ຽວກັບສະພາບການພັດທະນາເສດຖະກິດສັງຄົມຢູ່ແຕ່ລະປະເທດ, ແບ່ງປັນບັນດາຜົນສຳເລັດ ແລະ ສິ່ງທີ່ຍັງຄົງຄ້າງໃນວິວັດການຜັນຂະຫຍາຍບັນດານະໂຍບາຍກ່ຽວກັບການຄຸ້ມຄອງດ້ານການເງິນຂອງລັດວິສາຫະກິດ. ທ່ານນາງ Lina Olinda Pedraza ໄດ້ຕີລາຄາສູງການເພີ່ມທະວີການພົວພັນຮ່ວມມື, ແລກປ່ຽນບົດຮຽນລະຫວ່າງຂະແໜງການເງິນສອງປະເທດຫວຽດນາມ ແລະ ກູບາ ພ້ອມທັງເນັ້ນໜັກວ່າ: ການປະຕິບັດງານຂອງຄະນະຈະປະກອບສ່ວນຊຸກຍູ້ສາຍພົວພັນຖານອ້າຍນ້ອງອັນເປັນມູນເຊື້ອລະຫວ່າງສອງປະເທດ, ຮັບໃຊ້ໃຫ້ແກ່ພາລະກິດສ້າງສາປະເທດຊາດ ແລະ ສັງຄົມນິຍົມຢູ່ແຕ່ລະປະເທດ.