ຍູ້ແຮງການໂຄສະນາ, ຂົນຂວາຍ, ໜູນຊ່ວຍຊາວກະສິກອນພັດທະນາເສດຖະກິດ, ສ້າງຊົນນະບົດໃໝ່
(VOVWORLD) - ຕອນບ່າຍວັນທີ 8 ທັນວາ, ຢູ່ຮ່າໂນ້ຍ, ສະມາຄົມຊາວກະສິກອນ ຫວຽດນາມ ໄດ້ສົມທົບກັບກະຊວງກະສິກຳ ແລະ ພັດທະນາຊົນນະບົດ ຫວຽດນາມ ຈັດພິທີລົງນາມໃນໂຄງການສົມທົບກ່ຽວກັບການ “ຍູ້ແຮງວຽກງານໂຄສະນາ, ຂົນຂວາຍ, ໜູນຊ່ວຍຊາວກະສິກອນພັດທະນາເສດຖະກິດເຂດຊົນນະບົດ, ສ້າງຊົນນະບົດໃໝ່ ຕິດພັນກັບການສ້າງໂຄງປະກອບຂະແໜງກະສິກຳຄືນໃໝ່, ໄລຍະ 2021 – 2025”.
 ພິທີລົງນາມໃນໂຄງການສົມທົບ (ພາບ: nongnghiep.vn) |
ໂຄງການສົມທົບນີ້ໄດ້ກຳນົດ 5 ກຸ່ມເນື້ອໃນລະອຽດ ທີ່ຕ້ອງເອົາໃຈໃສ່ຊີ້ນຳປະຕິບັດໃນໄລຍະຈະມາເຖິງ ນັ້ນແມ່ນ: ສົມທົບກັນໃນການປະຕິບັດໜ້າທີ່ພັດທະນາກະສິກຳ, ໃນນັ້ນ ເອົາໃຈໃສ່ເຖິງການຍູ້ແຮງການໝູນໃຊ້ວິທະຍາສາດເຕັກໂນໂລຢີເຂົ້າໃນການຜະລິດກະສິກຳຕາມທິດປອດໄພ, ມີປະສິດທິຜົນ ແລະ ພັດທະນາແບບຍືນຍົງເປັນພິເສດ; ລົງທະບຽນ ແລະ ຄຸ້ມຄອງລະຫັດເຂດປູກຝັງ ແລະ ເພີ່ມທະວີວຽກງານຕິດຕາມກວດກາວັດຖຸອຸປະກອນການກະເສດ; ວຽກງານຮັບປະກັນຫຼັກອະນາໄມຄວາມປອດໄພດ້ານສະບຽງອາຫານ; ພັດທະນາເສດຖະກິດລວມໝູ່, ສະຫະກອນໃນຂົງເຂດກະສິກຳ; ພັດທະນາຜະລິດຕະພັນ OCOP ແລະ ການທ່ອງທ່ຽວກະສິກຳຢູ່ເຂດຊົນນະບົດ; ຈັດການເຄື່ອນໄຫວບຳລຸງສ້າງວິຊາຊີບໃຫ້ມີປະສິດທິຜົນ.