(vovworld) - ຕອນຄໍ່າວັນທີ 27/11, ຢູ່ນະຄອນຫຼວງວຽງຈັນ, ທ່ານເລຂາທິການໃຫຍ່, ປະທານປະເທດ ສປປ ລາວ ຈູມມະລີ ໄຊຍະສອນ ໄດ້ໃຫ້ການຕ້ອນຮັບທ່ານເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ຕະມິນເຈົາ ເຂົ້າຢ້ຽມອຳລາໃນໂອກາດສິ້ນສຸດໜ້າທີ່ການທູດຢູ່ລາວ. ທ່ານເລຂາທິການໃຫຍ່, ປະທານປະເທດລາວ ຈູມມະລີ ໄຊຍະສອນ ໄດ້ຮັບຮູ້ ແລະ ຕີລາຄາສູງບົດບາດຂອງທ່ານເອກອັກຄະລັດຖະທູດ ຕະມິນເຈົາ ແລະ ອົງການສະຖານທູດຫວຽດນາມ ໃນໄລຍະຜ່ານມາ ທີ່ໄດ້ປະກອບສ່ວນຢ່າງແທດຈິງ, ມີປະສິດທິຜົນ ໃນການຊຸກຍູ້ສາຍພົວພັນແບບພິເສດ ແລະ ການຮ່ວມມືຮອບດ້ານລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດ ໃຫ້ນັບມື້ນັບເຂົ້າສູ່ລວງເລິກ ແລະ ມີຄວາມໝາຍອັນແທດຈິງກວ່າ. ທ່ານເລຂາທິການໃຫຍ່, ປະທານປະເທດລາວ ຈູມມະລີ ໄຊຍະສອນ ເນັ້ນໜັກວ່າ, ສາຍພົວພັນລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດລາວ - ຫວຽດນາມ ໄດ້ຮັບການພັດທະນາຢ່າງດີງາມ, ນັບມື້ນັບມີຫຼາຍປັດໃຈພົ້ນເດັ່ນ ແລະ ມີຫົວຄິດປະດິດສ້າງ. ທ່ານເລຂາທິການໃຫຍ່ ຈູມມະລີ ໄຊຍະສອນ ສະແດງຄວາມເພິ່ງພໍໃຈຕໍ່ຜົນສຳເລດຂອງໂຄງການຮຽບຮຽງ “ປະຫວັດສາດສາຍພົວພັນແບບພິເສດຫວຽດນາມ - ລາວ, ລາວ - ຫວຽດນາມ ໄລຍະ 1930 - 2007” ແລະ ຖືວ່ານັ້ນແມ່ນຊັບສົມບັດອັນລ້ຳຄ່າ ເພື່ອສຶກສາບັນດາລຸ້ນສືບທອດ ເຄົາລົບຄຸນຄ່າຊີວິດເຊິ່ງບັນພະບຸລຸດໄດ້ຄຸນສ້າງດ້ວຍເລືອດເນື້ອເຫື່ອແຮງ.